ޖަޕާންއަށް ދިވެހި ރާއްޖެއިން ކަނޑައަޅާ ނޮން ރެސިޑެންޓު ސަފީރުކަމަށް ކުރީގެ ޔޫތް މިނިސްޓަރު އަހުމަދު މަހުލޫފްގެ ނަން ރައްޔިތުންގެ މަޖިލީހުން ފާސްކޮށްފިއެވެ. މަހުލޫފް މި މަގާމަށް އައްޔަނު ކުރުމަށް ފެންނަކަމަށް 60 މެންބަރުން ވަނީ ވޯޓު ދެއްވާފައެވެ.
ރައީސް ޑރ. މުހައްމަދު މުއިއްޒު، ޖަޕާނުގައި ހުންނަވާ ސަފީރުކަމަށް މަހުލޫފް އައްޔަން ކުރުމާ މެދު މަޖިލީހަށް ފެންނަ ގޮތެއް ނިންމަން އެދިވަޑައިގެން ފޮނުއްވި ސިޓީ މަޖިލީހަށް އިއްވީ ނޮވެމްބަރު 26 ވަނަ ދުވަހު އޮތް ޖަލްސާގައެވެ. އެ ސިޓީ އިއްވުމަށް ފަހު، މި މައްސަލަ ދިރާސާކުރުމަށް މަޖިލީހުގެ ހާރިޖީ ގުޅުންތަކުގެ ކޮމިޓީއަށް ފޮނުވުނެވެ.
މަހުލޫފަކީ ސިޔާސީ ދާއިރާގައި ގިނަ ދުވަސްތަކެއް ހޭދަކުރައްވާފައިވާ ބޭފުޅެކެވެ. އެމްޑީޕީ ސަރުކާރުގައި ޔޫތު މިނިސްޓަރުކަމުގެ މަގާމު ފުރުއްވުމުގެ ކުރިން، އޭނާ ވަނީ ރައްޔިތުންގެ މަޖިލީހުގެ މެމްބަރުކަން ވެސް ކުރައްވާފައެވެ. ކުރީގެ ރައީސް މައުމޫނުގެ ވެރިކަމުގައި އެމަނިކުފާނު އުފެއްދެވި ދިވެހި ރައްޔިތުންގެ ޕާޓީ (ޑީއާރުޕީ) ގެ މެމްބަރެއްގެ ގޮތުގައި އޭނާ ފުރަތަމަ އިންތިހާބުވީ 17 ވަނަ ރައްޔިތުންގެ މަޖިލީހަށެވެ. އޭގެ ފަހުން 18 ވަނަ މަޖިލީހަށް އިންތިހާބުވީ ޕީޕީއެމްގެ މެމްބަރެއްގެ ގޮތުގައެވެ.
މި މަގާމަށް އައްޔަން ކުރެއްވުމުގެ ކުރިން، މަހުލޫފް ވަނީ ވެރިކަން ކުރާ ޕީއެންސީއަށް ސޮއިކުރައްވާފައެވެ. އޭނާ އެ ޕާޓީއާ ގުޅިވަޑައިގަތީ މި މަހުގެ 17 ވަނަ ދުވަހު އެ ޕާޓީން ބޭއްވި ބޮޑު ޖަލްސާގައެވެ. މަޖިލީހުގެ ރުހުން ލިބުމާއެކު، މަހުލޫފްގެ ސަފީރުކަމުގެ މަސްއޫލިއްޔަތުތައް ވަރަށް އަވަހަށް ފައްޓަވާނެ ކަމަށް ބެލެވެއެވެ.
