ރައްޔިތުންގެ މަޖިލީހުގެ 3 ވަނަ ދައުރު ނިންމާލެވުނުއިރު، މި ދައުރުގައި މަޖިލީހުގެ މެންބަރުން ކުރައްވާފައިވާ މަސައްކަތްތަކުގެ ތަފްސީލު މަޖިލީހުގެ ރިޔާސަތުން ވަނީ އިއުލާންކުރައްވާފައެވެ.
މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، މި ދައުރުގައި ޖުމްލަ 28 ޖަލްސާ ބާއްވާފައިވާއިރު، ޖަލްސާތަކުގައި 64 ގަޑިއިރު ހޭދަކުރެވިފައިވާކަމަށެވެ. މީގެ އިތުރުން، މަޖިލީހުގެ ކޮމިޓީތަކުގައި ޖުމްލަ 142 ބައްދަލުވުން ބާއްވާފައިވާކަމަށާއި، މި ބައްދަލުވުންތަކުގައި 120 ގަޑިއިރު ހޭދަކޮށްފައިވާކަމަށް އެމަނިކުފާނު ފާހަގަކުރެއްވިއެވެ.
ގާނޫނު ހެދުމުގެ މުހިންމު މަސައްކަތްތައް
މި ދައުރުގައި ގާނޫނު ހެދުމުގެ ގޮތުން 15 ބިލެއްގެ މަސައްކަތް ކޮށް ނިންމާފައިވާކަމަށް މަޖިލީހުގެ ރައީސް ވިދާޅުވިއެވެ. މި ބިލުތަކަކީ ގައުމީ މަސްލަހަތުތަކާ ގުޅިފައިވާ، އަދި ދައުލަތުގެ ތަފާތު ދާއިރާތަކަށް އަސަރުކުރާ މުހިންމު ބިލުތަކެކެވެ. ނިންމާލެވުނު މުހިންމު ބިލުތަކުގެ ތެރޭގައި ހިމެނެނީ:
- ސްޕެޝަލް އިކޮނޮމިކް ޒޯންގެ ގާނޫނަށް ގެނާ އިސްލާހު
- ދިވެހި ރާއްޖޭގެ މަތީ ތައުލީމާ ތަމްރީނުގެ ގާނޫނަށް ގެނެވުނު އިސްލާހު
- ޓްރޭޑް މާކް ބިލު
- ދިވެހިރާއްޖޭގެ ފަނޑިޔާރުންގެ ގާނޫނަށް ގެނެވުނު އިސްލާހު
- ޖަނަވާރު ގެންގުޅުމާއި، ޖަނަވާރުގެ ރައްކާތެރިކަމުގެ ބިލު
- ދިވެހި ރާއްޖޭގެ ޖުމްހުރިއްޔާގެ ގާނޫނު އަސާސީއަށް ގެނެވުނު އިސްލާހު
- ދިވެހި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެވުނު އިސްލާހު
- ދައުލަތުގެ ފިސްކަލް ޒިންމާގެ ގާނޫނަށް ގެނެވުނު އިސްލާހު
- ރައީސުލްޖުމްހުރިއްޔާކަން ކޮށްފައިވާ މީހަކަށް ދޭން ޖެހޭ ރައްކާތެރިކަމާއި އިނާޔަތްތަކާއި ބެހޭ ގާނޫނަށް ގެނެވުނު އިސްލާހު
- ދިވެހި ރާއްޖޭގެ ޓޫރިޒަމާއި ބެހޭ ގާނޫނަށް ގެނެވުނު އިސްލާހު
- ޒަކާތުގެ ބިލު
- މަސްތުވާތަކެއްޗާއި ބެހޭ ގާނޫނަށް ގެނެވުނު އިސްލާހު
ސަރުކާރުގެ މަސްއޫލިއްޔަތު އަދާކުރުން
ގާނޫނު ހެދުމުގެ މަސައްކަތުގެ އިތުރުން، ސަރުކާރުގެ މަސްއޫލިއްޔަތު އަދާކުރާނެ ގޮތްތައް ކަށަވަރުކުރުމަށް މަޖިލީހުން ވަނީ ގިނަ މަސައްކަތްތަކެއް ކޮށްފައެވެ. މި ދައުރުގައި ޖުމްލަ 29 ސުވާލު ވަޒީރުންނާ ކުރެވިފައިވާކަމަށް މަޖިލީހުގެ ރައީސް އަބްދުއްރަހީމް ފާހަގަކުރެއްވިއެވެ. މިއީ ސަރުކާރުގެ މަސައްކަތްތަކަށް ފާރަވެރިވުމުގައި މަޖިލީހުން އަދާކުރި މުހިންމު ދައުރެކެވެ. މީގެ އިތުރުން، ސަރުކާރުން 16 މައްސަލައެއް މަޖިލީހަށް ހުށަހަޅުއްވާފައިވާއިރު، މަޖިލީހުގެ ރައީސްގެ މޭޒުން 9 މައްސަލައެއް ހުށަހަޅާފައިވެއެވެ.
ދައުރު ދިގުދެމާލުމުގެ ސަބަބު
މަޖިލީހުގެ ގަވާއިދުގައިވާ ގޮތުން ޑިސެމްބަރު މަހުގެ 1 ވަނަ ދުވަހު މަޖިލީސް ޗުއްޓީއަށް ދާން ޖެހުނު ނަމަވެސް، މި ދައުރު ވަނީ ދިގުދެމާލާފައެވެ. މަޖިލީހުގެ ރައީސް ވިދާޅުވީ، 20 ވަނަ މަޖިލީހުގައި ގެންގުޅޭ ވިސްނުމަކީ، ޗުއްޓީއަށް ދާން އޮތް ނަމަވެސް، ސަރުކާރު ހިންގުމަށާއި ރައްޔިތުންނަށް ހިދުމަތް ދިނުމަށް މުހިންމު ބިލެއް އޮންނަ ނަމަ، އެ ބިލުތަކުގެ މަސައްކަތް ނިންމުންކަމަށެވެ.
އާންމު ރައްޔިތުންނާ ގުޅުން ބަދަހިކުރުން
މަޖިލީހުގެ 3 ވަނަ ދައުރުގައި ޕާލިމެންޓްގެ މަސައްކަތްތަކާ ގުޅޭ ގޮތުން އާންމު ރައްޔިތުންނަށް މައުލޫމާތު ދިނުމަށް ގިނަ މަސައްކަތްތަކެއް ވަނީ ކޮށްފައެވެ. ސިވިލް ސޮސައިޓީ ޕާލިމަންޓްރީ ފޯރަމްއާއި، ސްކޫލު، ކޮލެޖު އަދި ޔުނިވަރސިޓީ ދަރިވަރުން ހިމެނޭ ގޮތަށް 19 ސްކޫލަކާއި، ދެ ކޮލެޖާއި 1 ޔުނިވަރސިޓީއެއްގެ ފަރާތުން ޖުމްލަ 3،238 ދަރިވަރުންނާއި، 179 މުދައްރިސުން މަޖިލީހުގެ އިދާރާއަށް ޒިޔާރާތްކޮށްފައިވެއެވެ. މީގެ އިތުރުން، ޕްރެކްޓިސް ޕާލިމަންޓް ސީރީޒްއާއި، ލިޓްލް ލެޖިސްލޭޓަރ ޕްރޮގްރާމްގެ ދަށުން ޕާލިމަންޓްރީ އެޑިއުކޭޝަން ޕްރޮގްރާމްތައް ބާއްވާފައިވެއެވެ.
