ނަތީޖާއާ ހަމައަށް މަސައްކަތް ނުކުރެވޭނަމަ ފުލުހުންގެ ޚިދުމަތުން ޖާގައެއް ނޯންނާނެ ކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.
ހޯމް މިނިސްޓަރ މިފަދައިން ވިދާޅުވީ، ލޯކަލް ޕޮލިސިންގ ކޮންފަރެންސް ފެށުމުގެ ރަސްމިއްޔާތުގައި، ފުލުހުންގެ އޮޕަރޭޝަނަލް މަސައްކަތްތައް ހަރުދަނާކުރުމުގެ މުހިންމުކަން ފާހަގަކުރައްވަމުންނެވެ.
ވަޒީރު ޢަލީ އިޙުސާން ފާހަގަކުރެއްވި ގޮތުގައި، ފުލުހުންގެ ޚިދުމަތަކީ، ވަރަށް ޒިންމާދާރު ކަމާއެކު ރައްޔިތުންނަށް ފޯރުކޮށްދޭންޖެހޭ ޚިދުމަތެކެވެ. މިއީ ހަމައެކަނި ދިވެހި ފުލުހުންގެ ޚިދުމަތުގެ ތާރީޚަށް ބަލާއިރު ވެސް، ވަރަށް ޒަމާންވީ މުއައްސަސާއެކެވެ. ނަމަވެސް، ފުލުހުންގެ މުއައްސަސާއަށް ޒަމާނީ ބަދަލުތައް އަންނަން ފެށިތާ ގާތްގަނޑަކަށް ވިއްސަކަށް އަހަރު ވެފައިވާއިރު، އެ ބަދަލުތަކަށް ވުރެ އަވަހަށް ރާއްޖޭގެ ޤާނޫނުތަކަށާއި، ރައްޔިތުންގެ އުންމީދުތަކަށް ބޮޑެތި ބަދަލުތަކެއް އައިސްފައިވާކަން ވަޒީރު ފާހަގަކުރެއްވިއެވެ. މި ބަދަލުތަކުގެ ސަބަބުން، ފުލުހުންގެ މަސައްކަތުގެ ފެންވަރު އަދިވެސް އިތުރަށް މަތިކުރަންޖެހިފައިވާކަން އެނގޭ ކަމަށް މިނިސްޓަރ ވިދާޅުވިއެވެ.
ވަޒީރުގެ ވާހަކަފުޅުގައި، ކްރައިމް އެންވަޔަރަންމަންޓަށް އައިސްފައިވާ ބަދަލުތަކުގެ މައްޗަށް އަލިއަޅުވާލެއްވިއެވެ. މިހާރުގެ ޤާނޫނުތަކާއި، ސަރުކާރުން ކަނޑައަޅާ ސްޓްރެޓެޖިކް ޕޮލިސިންގ ރިކުއަރމެންޓްތަކާ އެއްވަރަށް ފުލުހުންނަށް މަސައްކަތް ކުރެވެމުން ދޭތޯ ބެލިއިރު، އަދިވެސް ބައެއް ކަންކަން ފުރިހަމަ ކުރެވެންޖެހޭކަން ފާހަގަކުރެއްވިއެވެ. މިއީ ހަމައެކަނި ފުލުހުންގެ މުއައްސަސާއަށް އަމާޒުކޮށް ދައްކާ ވާހަކައެއް ނޫން ކަމަށް މިނިސްޓަރ ވިދާޅުވިއެވެ. އެއީ، ރައްޔިތުން ގަބޫލުކުރާ ފެންވަރަށް އަދި މަސައްކަތް ކުރިއަށް ނުގެންދެވޭކަން އިޢުތިރާފުވެ، ކުރިއަށް އޮތްތަނުގައި ހެޔޮ ބަދަލުތައް ގެނައުމަށް އޮތް ޢަޒުމެއްގެ ގޮތުގައި ދެކެންޖެހޢ ކަމަށް މިނިސްޓަރ ވިދާޅުވިއެވެ.
ފުލުހުންގެ ޚިދުމަތަށް ގެންނަންޖެހޭ ބަދަލުތައް
ލޯކަލް ޕޮލިސިންގ ކޮންފަރެންސްގެ މަޤްޞަދަކީ، ފުލުހުންގެ މަސައްކަތްތައް ހަރުދަނާކުރުމަށް ކުރަންޖެހޭ އަސާސީ ކަންކަން ދެނެގަތުމެވެ. ވަޒީރު ވަނީ ކުރިއަށް އޮތް ދުވަސްތަކުގައި ފުލުހުންގެ މުއައްސަސާއަށް ގެންނަންޖެހޭ މުހިންމު ބަދަލުތަކެއް ފާހަގަކުރައްވާފައެވެ. އެގޮތުން:
- ތަހުގީގުތައް އަވަސްވުން: ޖިނާއީ މައްސަލަތައް އަވަހަށް ނިންމައި، ޢަދުލުގެ ނިޒާމަށް ހުށަހެޅުން.
- މަގުމަތީގައި ފުލުހުންގެ ޕްރެސެންސް ގިނަވުން: ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި މަގުމަތީގައި ފުލުހުންގެ ހަރަކާތްތައް އިތުރުކުރުން.
- ފުލުހުންގެ އެންގޭޖްމަންޓް އިތުރުވުން: ރައްޔިތުންނާ ގުޅިގެން މަސައްކަތްކުރުމާއި، މުޖުތަމަޢުގެ ބައިވެރިވުން އިތުރުކުރުން.
- ޖަވާބުދާރީވުން ރަނގަޅުވުން: ފުލުހުންގެ މަސައްކަތުގައި ޒިންމާދާރުކަމާއި، ޖަވާބުދާރީވުން އިތުރުކުރުން.
- ކްރައިމްތައް މަދުކަމުގެ އިޙުސާސް ރައްޔިތުންނަށްވުން: މަގުމަތިން ފެންނަ ކުށްތައް މަދުކޮށް، ރައްޔިތުންނަށް އަމާންކަން އިޙުސާސްކުރުވުން.
- އިދާރީ ބައިތައް މަދުވުން: ބިއުރޯކްރަސީ ކުޑަކޮށް، އޮޕަރޭޝަނަލް މަސައްކަތަށް އިސްކަންދިނުން.
މި ބަދަލުތަކަކީ މުސްތަޤުބަލުގައި ފުލުހުންގެ ޚިދުމަތުން ފެންނާނެ ކަންކަންކަމަށް ވަޒީރު ވިދާޅުވިއެވެ. މިއީ ފުލުހުންގެ ޚިދުމަތުގެ ފެންވަރު މަތިކޮށް، ރައްޔިތުންގެ އިތުބާރު ހޯދުމަށްޓަކައި އަޅަންޖެހޭ މުހިންމު ފިޔަވަޅުތަކެކެވެ.
