ކުޑަކުދިންތަކަކަށް ޖިންސީ ގޯނާ ކުރިކަމަށް ތުހުމަތުކުރެވޭ މައްސަލައެއްގައި، ހައްޔަރު ކުރި ޙުސައިން ސަނީ ޢުމަރު 30 ދުވަހުގެ މުއްދަތަށް ބަންދުކޮށްފި އެވެ.
ސަނީގެ މައްޗަށް ތުހުމަތު ކުރެވޭ، ޖިންސީ ގޯނާގެ މައްސަލަތައް ފެންމަތިވީ އެންމެ ފުރަތަމަ ސޯޝަލް މީޑިއާގަ އެވެ. އަދި މައްސަލަ ފެންމަތިވެ، އާއިލާއަށް އެކަން އެނގުމާއި އެކު އޭނާ ފުރައިގެން ދިޔަކަމަށް ވެސް ވާހަކަ ދެކެވުނެވެ.
ސަނީ ފުލުހުންގެ ބެލުމުގެ ދަށަށް ގެނައީ، ރާއްޖެއިން ބޭރުގައި ހުރުމަށް ފަހު އެނބުރި އައިތަނުން ވެލާނާ އިންޓަނޭޝަނަލް އެއާޕޯޓުންނެވެ. އޭރު ހަމައެކަނި މައްސަލައިގައި ސުވާލު ކުރުމަށް ފެމިލީ އެންޑް ޗައިލްޑް ޕްރޮޓެކްޝަން އިދާރާއަށް ގެންދިއުމަށް ފަހު ތަހުގީގަށް އެއްބާރުލުން ދިނުމަށް ޝަރުތުކޮށް އޭނާ އެ ދުވަހުގެ ހަވީރު އޭނާ ދޫކޮށްލީ އެވެ. އެފަހުން އަނެއްކާވެސް ހަމަ އެރޭ އޭނާ ހައްޔަރު ކުރީ، ފުރަން އެއާޕޯޓަށް ގޮސް ހުއްޓައެވެ.
މައްސަލައިގައި ޕްރޮސެކިއުޓަރ ޖެނެރަލްގެ އޮފީހުން މީޑިއާތަކަށް ފޮނުވި މެސެޖެއްގައި ބުނީ ސަނީ އުމަރު ބަންދުގައި ބެހެއްޓުމުގެ އަމުރަކަށް އެދިފައި ވަނީ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ 30 ވަނަ މާއްދާއާއި، 33 ވަނަ މާއްދާގެ ދަށުން އަދި ޤާނޫނުއަސާސީގެ 49 ވަނަ މާއްދާއަށް ރިޢާޔަތްކޮށް ކަމަށެވެ.
މި ހުށަހެޅުމާ އެއްގޮތަށް ކްރިމިނަލް ކޯޓުން ވަނީ ސަނީ އުމަރު 30 ދުވަހުގެ މުއްދަތަށް ބަންދުގައި ބެހެއްޓުމުގެ އަމުރެއް ނެރެދީފަ އެވެ.
މައްސަލައިގެ ތަހުގީގަށް ކުރިއެރުން ލިބެމުންދިޔަ ވަރަކުން ގާނޫނުގައި ބަޔާންކޮށްފައިވާ ގޮތުގެ މަތިން ބަންދުގެ މުއްދަތު އިތުރުކުރުމަށް، އަދި ޝަރީޢަތް ނިމެންދެން ބަންދުކުރުމުގެ އަމުރަކަށް އެދި ހުށަހަޅާޅާނެކަމަށް ޕީޖީ އޮފީހުން ވަނީ ބުނެފަ އެވެ.
ސަނީ އުމަރުއަކީ، ޓްރެވެލް އޭޖެންސީތައް ހިންގުމާއި އެ ދާއިރާއާއި ގުޅުން ހުރި އެކި ޕްރޮގްރާމްތައް ހިންގާކަމަށް މަޝްހޫރު މީހެކެވެ. އަދި އޭނާ އައީ ހަލާލް ޓޫރިޒަމް ބްރޭންޑުގެ ދަށުން ހިންގާ ޓްރެވެލް އެޖެންސީއަކާއި ޓްރެވެލް ދާއިރާގެ މީޑިއާއެއް ހިންގާ ޕީއާރު ފާމްގައި އިސްކޮށް މަސައްކަތް ކުރަމުންނެވެ. ސަނީއާއި ގުޅޭގޮތުން މީޑިއާތައް ރިޕޯޓު ކުރުމުން، އެ ކުންފުނިތަކުން ނެރުނު ބަޔާނެއްގައި ބުނީ އެ ތުހުމަތުތަކާއި ގުޅިގެން އޭނާގެ ހިއްސާ އަތުލުމަށް ކުންފުނީގެ ބޯޑުން ނިންމާފައިވާކަމަށެވެ. އަދި ބުނީ ޓްރެވަލް ގައިސް ހިންގާ ”ޓްރެވެލޫއުޝަން މީޑިއާ“ ހިންގުމުގައި ސަނީ އުމަރުގެ އެއްވެސް ބައިވެރިވުމެއް ނެތްކަމަށެވެ.
