ހެލްތު ސެޓްފިކެޓާ ނުލައި ދިވެހިރާއްޖެއަށް ކާބޯތަކެތީގެ ޝިޕްމަންޓްތަކެއް އެތެރެކުރުމަށް ކްލިއަރެންސް ދިން ކަމުގެ ތުހުމަތުގައިމޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ ދެ މުވައްޒަފެއްގެ މައްޗަށް، ދައުވާ އުފުދައި، މިއަދު ކްރިމިނަލް ކޯޓަށް ހުށަހަޅައިފިއެވެ.
ޕްރޮސެކިއުޓާ ޖެނެރަލް (ޕީޖީ) ގެ އޮފީހުން މި މައްސަލަ ހުށަހަޅާފައި ވަނީ 2025 ވަނަ އަހަރުގެ މާޗު މަހުގެ ތެރޭގައި ކްލިއަރ ކުރި ޝިޕްމަންޓެއްގެ މައްސަލަ އެވެ. މައްސަލައިގައި ޕީޖީ އޮފީހުން ބުނީ ޕޯޓް ކްލިއަރަންސްގައި މަސައްކަތް ކުރާ އެމްއެފްޑީއޭގެ ފީލްޑް އޮފިސަރުންތަކެއް، ރާއްޖެއަށް ކާބޯތަކެތި އެތެރެކުރުމަށް ބޭނުންވާ ހެލްތް ސެޓްފިކެޓާއި ނުލައި، ކަނޑުމަގުންނާއި، ވައިގެ މަގުން އެތެރެކޮށްފައިވާ ޝިޕްމަންޓްތަކެއް އެތެރެކުރުމަށް ކްލިއަރެންސް ދީފައިވާކަމަށެވެ.
މި މައްސަލައިގައި ދައުވާ އުފުލާފައި ވަނީ، ދަފްތަރު ރސ 9244، އަޙްމަދު ހާޝިމްއާއި، ގދ. ތިނަދޫ، ޢަރަފާތު، އަޙްމަދު ޒާހިރުގެ މައްޗަށެވެ.
ހާޝިމްގެ މައްޗަށް ރަސްމީ ވާޖިބު އަދާކުރުމުގައި އެކަށީގެންނުވާ އަމަލެއް ހިންގުމުގެ ކުށުގެ 03 ދައުވާ ވަނީ އުފުލާފައެވެ. އަދި ޒާހިރުގެ މައްޗަށް ވެސް، ރަސްމީ ވާޖިބު އަދާކުރުމުގައި އެކަށީގެން ނުވާ އަމަލެއް ހިންގުމުގެ ކުށުގެ 03 ދައުވާ އުފުލާފައި ވެއެވެ. ކޮންމެ ދައުވާއަކަށް 4 މަހާއި 24 ދުވަހުގެ އަދަބެއް ދިނުމަށް ޕީޖީ އޮފީހުން ދައުވާގައި އެދިފައިވެއެވެ.
މައްސަލައިގައި ނަސޭހަތުގެ އެއްބަސްވުމެއް ހެދުމަށް ދެ މީހުންގެ ފަރާތުން ހުށަހެޅުމުން، ޕީޖީ އޮފީހުން ނިންމީ އެފަދަ އެއްބަސްވުމަކާއި އެކު ކުރިޔަށް ނުދިއުމަށެވެ. އެއީ މި ކުށަކީ ކުށަކީ ދިވެހިރާއްޖޭގެ ކާބޯތަކެތީގެ ސަލާމަތާއި ރައްކާތެރިކަމާ ސީދާ ގުޅުންހުރި ކުށަކަށްވެފައި، ކާބޯތަކެތީގެ ސަލާމަތާއި ރައްކާތެރިކަން ކަށަވަރުކުރުމަށް ހެދިފައިވާ ޤާނޫނުތަކާ އުޞޫލުތަކާ ޚިލާފަށް ޢަމަލުކޮށްފައިވާތީކަމަށް ޕީޖީ އޮފީހުން ބުންޏެވެ. އެހެންވެ އާންމު މަސްލަހަތު ވަޒަން ކުރުމަށް ފަހު ނަސޭހަތުގެ އެއްބަސްވުމެއް ނުހެދުމަށް ޕީޖީ އޮފީހުން ނިންމީ އެވެ.
