ރައީސުލްޖުމްހޫރިއްޔާ ޑރ މުހައްމަދު މުއިއްޒު ރާއްޖެއިން ޖަޕާނަށް ކަނޑައަޅުއްވާފައި ހުންނަވާ ސަފިރުގެ މަގާމަށް އަހުމަދު މަހުލޫފް އައްޔަން ކުރައްވައިފިއެވެ.
މިކަމަށްޓަކައި ރައީސުލްޖުމްހޫރިއްޔާގެ އޮފީހުގައި ވަނީ ޚާއްސަ ރަސްމިއްޔާތެއް ބާއްވާފައެވެ. ރާއްޖެއިން ބޭރު ޤައުމުތަކަށް ސަފީރުން އައްޔަންކުރެއްވުމުގެ ކުރިން ރައްޔިތުންގެ މަޖިލީހުގެ ރުހުން ހޯދަންޖެހެއެވެ.
މި މަޤާމަށް މަޚްލޫފު ޢައްޔަންކުރެއްވުމުގެ ކުރިން، އެމަނިކުފާނުގެ ނަން ރައްޔިތުންގެ މަޖިލީހުން ފާސްކުރައްވާފައިވަނީ ބުދަ ދުވަހުއެވެ. ދިވެހިރާއްޖޭގެ ފޮރިން ސަރވިސް ޤާނޫނުގެ ދަށުން ރާއްޖޭން ބޭރު ޤައުމުތަކަށް ސަފީރުން އައްޔަންކުރައްވަނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ.
އަޙްމަދު މަޚްލޫފަކީ ސިޔާސީ ދާއިރާގައި ގިނަ ދުވަހު މަސައްކަތް ކުރައްވާފައިވާ ބޭފުޅެކެވެ. އެމަނިކުފާނު ސިޔާސީ ދާއިރާއަށް ނިކުންނެވީ ކުރީގެ ރައީސް މައުމޫން އަބްދުއްގައްޔޫމްގެ ޑީއާރުޕީގެ ތެރެއިންނެވެ. އޭގެ ފަހުން އެމްޑީޕީއާ ގުޅިވަޑައިގެން ނިމިދިޔަ ވެރިކަމުގައި ކުޅިވަރާއި ބެހޭ ވަޒީރުކަންވެސް މަޚްލޫފު ވަނީ ކުރައްވާފައެވެ.
ސަފީރުކަމަށް ޢައްޔަންކުރެއްވުމުގެ ކުރިން، ގިނަ އަހަރުތަކެއްވަންދެން ސިޔާސީ މަސައްކަތް ކުރެއްވި މަޚްލޫފް ވަނީ އެމްޑީޕީން ވަކިވެވަޑައިގެންފައެވެ.
އެމަނިކުފާނު ސަރުކާރު ހިންގާ މައި ޕާޓީ ޕީއެންސީއާއި ގުޅިވަޑައިގަތީ މިމަހުގެ 14 ވަނަ ދުވަހުގެރޭ ބޭއްވި ޚާއްސަ ހަފްލާއެއްގައެވެ. ޖަޕާނަށް ކަނޑައަޅުއްވާފައި ހުންނަވާ ސަފީރެއްގެ ހައިސިއްޔަތުން މަޚްލޫފު ކުރައްވާނެ މަސައްކަތްތަކަށް ގިނަ ބަޔަކު އަންނަނީ އިންތިޒާރުކުރަމުންނެވެ.
