ތޫފާނު އެރި ގައުމުތަކަށް އެމްފައިސާ މެދުވެރިކޮށް އިތުރު ޗާޖަކާ ޗާޖަކާ ނުލައި ފައިސާ ފޮނުވޭނެ

އުރީދޫ ފިންޓެކް މޯލްޑިވްސް އިން ވަނީ އެމްފައިސާގެ ޚިދުމަތް މެދުވެރިކޮށް، ތޫފާނުގެ ސަބަބުން ގެއްލުން ލިބުނު ސަރަހައްދުގެ ހަތަރު ޤައުމަކަށް އެއްވެސް ޓްރާންސްފަރ ޗާޖެއް ނުނަގައި ބައިނަލްއަޤްވާމީ ފައިސާ ފޮނުވޭނެ އިންތިޒާމެއް މިއަދު އިޢުލާންކޮށްފިއެވެ.

މި އިސްނެގުމަކީ، މި ސަރަހައްދުގެ މޫސުމީ ގޯސް ހާލަތްތަކުގެ ސަބަބުން ހާލުގައި ޖެހިފައިވާ އާއިލާތަކާއި މުޖުތަމަޢުތަކަށް އަވަސް އަދި ރައްކާތެރިކަމާއެކު މާލީ އެހީތެރިކަން ފޯރުކޮށްދިނުމަށް އަމާޒުކޮށްފައިވާ މަސައްކަތެކެވެ. މި ލިމިޓެޑް ޓައިމް އޮފަރގެ ދަށުން ލަންކާ، އިންޑޮނޭޝިއާ، މެލޭޝިއާ އަދި ތައިލެންޑަށް ފައިސާ ފޮނުވުމުގެ ފުރުސަތު ވަނީ ހުޅުވާލާފައެވެ.

މުހިންމު ޚިދުމަތުގެ ތަފްސީލު

މި ޚިދުމަތް ދިނުމަށް ހަމަޖެހިފައި ވަނީ 1 ޑިސެމްބަރު 2025 އިން ފެށިގެން 31 ޑިސެމްބަރު 2025 ގެ ނިޔަލަށެވެ. މި މުއްދަތުގެ ތެރޭގައި އެއްވެސް ޓްރާންސްފާ ޗާޖެއް ނުނަގާ، ވަގުތުން ވަގުތަށް އަދި ރައްކާތެރިކަމާއެކު މި ހަތަރު ޤައުމަށް ފައިސާ ފޮނުވޭނެއެވެ. އެމް-ފައިސާގެ އިންޓަނޭޝަނަލް މަނީ ޓްރާންސްފަރ (އައިއެމްޓީ) ޚިދުމަތަކީ، މަނީގްރާމްއާ ޕާޓްނަރވެގެން ކުރިއަށް ގެންދާ ޚިދުމަތެކެވެ. މި ޚިދުމަތުގެ ސަބަބުން ކަސްޓަމަރުންނަށް ފޯނުން ވަގުތުކޮޅެއްގެ ތެރޭގައި ރާއްޖެއިން ބޭރަށް ފައިސާ ފޮނުވުމުގެ ފަސޭހަކަން ލިބިގެންދެއެވެ.

ޑިޖިޓަލް ޓްރާންސްފަރގެ ފަސޭހަތައް

އެމްފައިސާ މެދުވެރިކޮށް ފައިސާ ފޮނުވުމުގައި ޑިޖިޓަލްކޮށް ގިނަ ފަސޭހަތަކެއް ލިބިގެންދެއެވެ. މިގޮތުން، ޓްރާންސްފަރ ޗާޖެއް ނުނަގާ ގައުމުތަކަށް ފައިސާ ފޮނުވުމުގެ އިތުރުން، ދުވާލަކު 10,000 ޑޮލަރާ ހަމައަށް ފައިސާ ފޮނުވުމުގެ ލިމިޓެއް ވެސް ވަނީ ކަނޑައަޅާފައެވެ. އެންމެ މުހިންމު ފަސޭހަތަކުގެ ތެރޭގައި، ފޯމު ފުރަން ނުޖެހުމާއި، ސަފުގައި މަޑުކުރަން ނުޖެހި ޑިޖިޓަލީ ފައިސާ ފޮނުވާލެވުން ހިމެނެއެވެ. އަދި، އެމްފައިސާ އެޕް މެދުވެރިކޮށް ރިއަލް ޓައިމް ޓްރާންސެކްޝަން ޓްރެކިންގެ ޚިދުމަތް ލިބޭތީ، ފައިސާ ފޮނުވުމުގެ ހުރިހާ މަރުޙަލާއެއް ވަގުތުން ބަލާލެވޭނެއެވެ. ކަސްޓަމަރުން އެމްފައިސާ ވޮލެޓަށް ފައިސާ އެޅުމަށްފަހު، ކަސްޓަމަރުންގެ މައުލޫމާތު ފުރިހަމަކޮށް، ޑިޖިޓަލްކޮށް ޓްރާންސްފަރ ފުރިހަމަކޮށް، ފައިސާ ޑެލިވަރީ ވީ ނުވަތަ ނުވީ ސްޓޭޓަސް ބެލޭނެއެވެ.

އުރީދޫގެ އަމާޒާއި ވިސްނުން

މި މަސައްކަތާ ގުޅޭގޮތުން އުރީދޫ ފިންޓެކް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ ޚާލިދު އަލް ހަމާދީ ވިދާޅުވެފައިވާ ގޮތުގައި، ދިވެހިރާއްޖެއަކީ މި ސަރަޙައްދުގެ އަވަށްޓެރި ޤައުމުތަކާ ވަރަށް ގާތް ގުޅުމެއް އޮންނަ ޤައުމެކެވެ. ރާއްޖޭގެ ގިނަ ރައްޔިތުންނާއި، ދިރިއުޅޭ ބިދޭސީންގެ ގާތްތިމާގެ މީހުން މި ޤައުމުތަކުގައި ދިރިއުޅެއެވެ. އެހެންކަމުން، ޓްރާންސްފަރ ފީއާނުލާ، ވަގުތުން ރައްކާތެރި ޑިޖިޓަލް ރެމިޓެންސްތައް ފޯރުކޮށްދިނުމަކީ، މި ދަތި އުނދަގޫ ދަނޑިވަޅުގައި އެހީއަށް އެންމެ ބޮޑަށް ބޭނުންވެފައިވާ ފަރާތްތަކަށް އެހީތެރިކަން ފޯރުކޮށްދިނުމަށް ލިބޭނެ ބޮޑު ފަސޭހައެކެވެ. ޚާލިދު އަލް ހަމާދީ އިތުރަށް ފާހަގަކުރެއްވީ، އުރީދޫގެ އަމާޒަކީ ޓެކްނޮލޮޖީއަކީ މާނަވީ މަޤްޞަދެއް ހާސިލުކުރާ އެއްޗެއްކަން ކަށަވަރުކުރުން ކަމަށާއި، އެއީ މީހުން ގުޅުވާލުމާއި، މުޖުތަމަޢުތައް ވަރުގަދަކޮށް، އެންމެ މުހިންމު ވަގުތުތަކުގައި އަވަސް އެހީ ފޯރުކޮށްދިނުން ކަމަށެވެ.

އުރީދޫއިން މި ފެށި ޚިދުމަތަކީ، ޑިޖިޓަލް ފައިނޭންޝަލް ޚިދުމަތްތައް ބޭނުންކޮށްގެން މުޖުތަމަޢަށް އެހީތެރިވުމަށާއި، އިންކްލޫސިވިޓީ އަދި ސަރަޙައްދީ ގުޅުންތައް ބަދަހިކުރުމަށް އުރީދޫއިން ކުރަމުން އަންނަ މަސައްކަތް އިތުރަށް ވަރުގަދަވެގެންދާނެ ކަމެކެވެ. ހާއްސަކޮށް، ހާލަތު ގޯސްވެފައިވާ ޤައުމުތަކަށް އެއްވެސް ޗާޖެއް ނުނަގައި ފައިސާ ފޮނުވޭނެ އިންތިޒާމު ހަމަޖެއްސުމަކީ، ދިވެހިރާއްޖެއާއި އަވަށްޓެރި ޤައުމުތަކާ ދެމެދު އޮތް ގާތް ގުޅުން ހާމަކޮށްދޭ އަދި މާލީ އެހީތެރިކަން ފޯރުކޮށްދިނުމަށް ލިބުނު ބޮޑު ފަސޭހައެކެވެ.