ސަރުކާރު ހިއްސާވާ ކުންފުނިތައް ގިންތިކޮށް ބޯޑް ޗެއަރ އަދި މެންބަރުންގެ އިނާޔަތްތައް ކަނޑައަޅާ އުސޫލު އިސްލާހުކޮށްފި

ސަރުކާރު ހިއްސާވާ ކުންފުނިތައް ގިންތިކުރުމާއި، އެ ކުންފުނިތަކުގެ ބޯޑު ޗެއަރ އަދި މެންބަރުންގެ އިނާޔަތްތައް ކަނޑައެޅުމުގެ އުސޫލަށް ޕްރައިވެޓައިޒޭޝަން އެންޑް ކޯޕަރޭޝަން ބޯޑް (ޕީ.ސީ.ބީ) އިން އިސްލާހުތަކެއް ގެނެސްފި އެވެ.

މި އިސްލާހުތަކުގެ އެންމެ ބޮޑު ބަދަލަކީ، ކުންފުނިތައް ގިންތިކުރުމުގައި ކުރިން ބޭނުންކުރަމުން އައި އުސޫލުގެ ބަދަލުގައި، އިންސާފުވެރިކަން އިތުރުކުރުމަށްޓަކައި، ’ވައިޓޭޖް‘ މެތަޑަށް ބަދަލުކުރުމެވެ. މި ބަދަލުތަކުގެ ސަބަބުން ސަރުކާރު ކުންފުނިތަކުގެ ހިންގުމުގެ އޮނިގަނޑާއި މާލީ ކަންކަމަށް ފުޅާ ބަދަލުތަކެއް އަންނާނެއެވެ.

ގިންތިކުރުމުގެ އުސޫލަށް ގެނައި ބަދަލު: ވައިޓޭޖް މެތަޑް

ޕީ.ސީ.ބީގެ ބޯޑު މެންބަރުންގެ ބައްދަލުވުމުގައި ނޮވެމްބަރު މަހުގެ 26 ވަނަ ދުވަހު ފާސްކުރި މި އިސްލާހުގެ އެންމެ މުހިންމު އެއް މަޤްސަދަކީ، ކުރިން އޮތް އުސޫލުގައި ވަކި ޝަރުތެއް ފުރިހަމަ ނުވުމުގެ ސަބަބުން ގިންތި ބަދަލުނުވެ އޮތް އޮތުން ނިމުމަކަށް ގެނައުމެވެ. ’ވައިޓޭޖް‘ މެތަޑަކީ ކުންފުނިތަކުގެ ކާމިޔާބީއާއި، މާލީ ހާލަތާއި، އަދި އެހެނިހެން މުހިންމު މިންގަނޑުތަކަށް ބަރުދަން ދީގެން، ވަކިވަކި ކުންފުނިތަކުގެ ހާލަތު އިންސާފުވެރިކަމާއެކު ވަޒަންކުރެވޭނެ ގޮތެކެވެ. މިގޮތަށް ބަދަލުކުރުމުން، ކުންފުނިތަކުގެ ހިންގުން ރަނގަޅުކުރުމަށް އިތުރަށް ބާރުއަޅާނެ ކަމަށް ޕީ.ސީ.ބީން ބުނެއެވެ.

ކުންފުނިތަކުގެ ޓާގެޓްތަކާއި މެދު ނިންމުން

އުސޫލަށް ގެނެވުނު ބަދަލުތަކާ ގުޅިގެން، ސަރުކާރު ހިއްސާވާ ކުންފުނިތަކަށް ވަކި އަމާޒުތަކެއް ކަނޑައެޅުމަށް ޕީ.ސީ.ބީން ވަނީ އެދިފައެވެ. އެގޮތުން، 2026 ވަނަ އަހަރަށް ކަނޑައަޅާފައިވާ އަމާޒުތަކަށް ވާސިލްވުމަށްޓަކައި، ޑިސެންބަރު 31 ގެ ކުރިން އެ ބޯޑަށް ޓާގެޓްތައް ހިއްސާކުރުމަށް ވަނީ އެދިފައެވެ. ނަމަވެސް، އެއްވެސް ސަބަބަކާހުރެ އެ މުއްދަތުގައި ޓާގެޓްތައް ކަނޑަނޭޅިއްޖެނަމަ، ލަސްވެގެން ޖެނުއަރީ 15، 2026 ގެ ކުރިން ޓާގެޓްތައް ހިއްސާކުރުމަށް ލާޒިމުކޮށްފައިވެއެވެ.

މީގެ އިތުރުން، ކުރިއަށް އޮތް އަހަރުތަކުގައި ޓާގެޓް ކަނޑައަޅާނެ ގޮތްތަކާއި، ކުންފުނިތަކަށް ދިމާވާ ދަތިތަކަށް ރިޢާޔަތްކޮށް، ’މިޑް ޓާމް ޓާގެޓް ރިވިޝަން‘ ކުރެވޭނެ ފަސޭހަ ގޮތްތައް ވެސް މި އުސޫލަށް ވަނީ އިތުރުކުރެވިފައެވެ. މިކަމުގެ ސަބަބުން، ކުންފުނިތަކުގެ އަމަލީ ހާލަތާ އެއްގޮތަށް އަމާޒުތައް ބަދަލުކުރުމުގެ ފުރުސަތު ލިބި، ހިންގުމުގެ ހަރުދަނާކަން އިތުރުވާނެއެވެ.

އެގްޒެކެޓިވް ސްޓާފުންގެ މުސާރަ އާއި އިނާޔަތްތަކަށް އައި ބަދަލު

ގިންތިކުރުމުގެ އުސޫލަށް ގެނައި ބަދަލާއެކު، މެނޭޖިން ޑިރެކްޓަރ (އެމް.ޑީ) ފިޔަވައި އެހެނިހެން އެގްޒެކެޓިވް ސްޓާފުންގެ އަސާސީ މުސާރައާއި ޕާފޯމަންސް އެލަވަންސްތައް ވަނީ އުނިކޮށްފައެވެ.

މި މަޤާމްތަކުގެ މުސާރައާއި އިނާޔަތްތައް ކަނޑައަޅާނީ ކުންފުނީގެ އޮނިގަނޑާއި އެއްގޮތަށް، ކުންފުނީގެ ބޯޑުންނެވެ. މިއީ ސަރުކާރު ކުންފުނިތަކުގެ މާލީ ކަންކަން މަރުކަޒީކޮށް ކޮންޓްރޯލްކުރުމުގެ ބަދަލުގައި، ކުންފުނިތަކުގެ ބޯޑުތަކަށް އިތުރު ބާރުތަކެއް ދިނުމުގެ ގޮތުން ގެނެސްފައިވާ ބަދަލެކެވެ.

ނަމަވެސް، މުސާރައިގެ އޮނިގަނޑު ބަދަލުކުރަން ޖެހިއްޖެނަމަ، ސަރުކާރުގެ މެޖޯރިޓީ ހިއްސާވާ، އަދި ޕަބްލިކް ލިސްޓް ނުކުރާ ކުންފުނިތަކުން، ޕީ.ސީ.ބީގެ ގައިޑްލައިނާ އެއްގޮތަށް ފިނޭންސް މިނިސްޓްރީގެ ހުއްދަ ހޯދަން ޖެހެއެވެ. މީގެ ބޭރުންގެ ކުންފުނިތަކުން އެ ކުންފުންޏެއްގެ އުސޫލާ އެއްގޮތަށް އަމަލުކުރެވޭނެއެވެ.

ބޯޑު މެންބަރުންގެ އިނާޔަތްތައް

އިސްލާހުކުރެވުނު އުސޫލުގައި، އެގްޒެކެޓިވް މުވައްޒަފަކު ސަރުކާރުން ބޯޑު މެންބަރެއްގެ ގޮތުގައި އައްޔަންކޮށްފައިވާނަމަ، ބޯޑު ޑިރެކްޓަރުންގެ އިނާޔަތުގެ ގޮތުގައި އުސޫލުގައި ކަނޑައަޅާފައިވާ މިންވަރަށް އެލަވަންސް ދޭންވާނެ ކަމަށް ވަނީ ކަނޑައަޅާފައެވެ. މިކަމުގެ ސަބަބުން، ކުންފުނިތަކުގެ ހިންގުމުގައި ބައިވެރިވާ ސަރުކާރުގެ މުވައްޒަފުންނަށް ލިބޭ އިނާޔަތްތަކުގެ އޮނިގަނޑު ސާފުކޮށްދީ، ހަމަހަމަކަން ޤާއިމުކުރުމަށް މަގުފަހިވެގެންދެއެވެ.