ދިވެހި ޒުވާނުންނަކީ ތަފާތު އެކި ދާއިރާތަކުން ހުނަރުވެރި، އުފެއްދުންތެރި ބައެކެވެ. މި ހުނަރުތައް ކުރިއަރުވައި، ޒުވާނުން ބާރުވެރިކުރުވުމަށްޓަކައި ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން އިންތިޒާމުކުރާ ’ލިޓް ފެސްޓް‘ އަކީ މި މަޤްޞަދުގައި ބާއްވާ ވަރަށް މުހިންމު ފެސްޓިވަލެކެވެ. މި މަހުގެ 25، 26 އަދި 27 ގައި ބޭއްވުމަށް ހަމަޖެހިފައިވާ މި ފެސްޓިވަލަކީ 14 އަހަރާއި 20 އަހަރާ ދެމެދުގެ ޒުވާނުންނަށް އެކުދިންގެ ފަންނުވެރިކަން މުޅި މުޖުތަމަޢަށް ދައްކާލުމަށް ލިބޭ ރަނގަޅު މައިދާނެކެވެ.
ލިޓް ފެސްޓަކީ ގިނަ ދާއިރާތަކެއް ހިމެނޭ ގޮތަށް ފަރުމާކޮށްފައިވާ ފެސްޓިވަލެކެވެ. މީގެ ތެރޭގައި އާޓްސް، ކުކަރީ، ހޭންޑީ ކްރާފްޓް އަދި މުނިފޫހިފިލުވުމުގެ ދާއިރާ ހިމެނެއެވެ. އަތްތެރި މަސައްކަތްތަކަށް ލޯބިކުރާ ކުދިންނަށް ކްލޭ އާޓް، ހެނާ އާޓް، ކެލިގްރަފީ އަދި އެމްބްރޮއިޑެރީ ފަދަ ކަންކަން ހުށަހެޅުމުގެ ފުރުޞަތު އޮންނާނެއެވެ. އަދި ޒަމާނީ ފަންނިއްޔާތަށް ޝައުޤުވެރިވާ ކުދިންނަށް ޑިޖިޓަލް އާޓްސް އާއި 3ޑީ އެނިމޭޝަން ފަދަ ހުނަރުތައް ދައްކާލެވޭނެއެވެ.
ސްޓޭޖް ހަރަކާތްތަކަށް ބަލާއިރު، ލަވަކިޔުމާއި، ނެށުމާއި، ބޮޑުބެރުގެ އިތުރުން ޑްރާމާ އާއި ސްޓޭންޑްއަޕް ކޮމެޑީ ފަދަ ހުނަރުތަކަށް ވެސް މި ފެސްޓިވަލުން ޖާގަ ދީފައިވެއެވެ. މީގެ އިތުރުން، މިހާރުގެ ޒުވާނުންގެ މެދުގައި މަޤްބޫލު ކޮންޓެންޓް ކްރިއޭޝަނާއި އޯޕަން މައިކް ފަދަ ހަރަކާތްތަކަކީ ޒުވާނުންގެ އަމިއްލަވަންތަކަން ހާމަކޮށްދޭނެ މުހިންމު ބައިތަކެކެވެ. މި ފެސްޓިވަލަކީ ހަމައެކަނި ހުނަރު ދައްކާލުމެއް ނޫނެވެ. ބައިވެރިން ތައްޔާރުކުރާ ތަކެތި އާންމުންނަށް ވިއްކުމުގެ ފުރުޞަތު ލިބުމަކީ ޒުވާނުންނަށް އާމްދަނީ ހޯދުމުގެ މަގު ފަހިވެ، އިޤްތިޞާދީ ގޮތުން ބާރުވެރިވުމަށް ލިބޭ ހިތްވަރެކެވެ.
ޔޫތު މިނިސްޓްރީން މި ފެސްޓިވަލްގައި ބައިވެރިވާ ޒުވާނުންނަށް ބޮޑެތި ލުއިފަސޭހަތަކެއް ވަނީ ހަމަޖައްސައިދީފައެވެ. އެގޮތުން، ހަރަކާތްތަކަށް ހިނގާނެ ޚަރަދާއި، ބޭނުންވާ ތަކެތި މިނިސްޓްރީގެ ފަރާތުން ފޯރުކޮށްދޭނެއެވެ. މިއީ މާލީ ދަތިކަމެއްގެ ސަބަބުން ހުނަރު ފާޅުކުރަން ފަސްޖެހޭ ކުދިންނަށް ލިބޭ ވަރަށް ބޮޑު އެހީތެރިކަމެކެވެ. ފެސްޓިވަލްގައި ބައިވެރިވުމަށްޓަކައި ސޯޝަލް މީޑިއާގައި ހިއްސާކޮށްފައިވާ ކިއުއާރް ކޯޑް މެދުވެރިކޮށް ފަސޭހަކަމާއެކު ރަޖިސްޓްރީ ކުރެވޭނެއެވެ. ނަމަވެސް، ކޮންމެ ކުއްޖަކުވެސް ބައިވެރިވާން ޖެހެނީ ބެލެނިވެރިޔަކާ އެކުގައި ކަމަށް މިނިސްޓްރީން ބުނެއެވެ.
ޖުމްލަގޮތެއްގައި ’ލިޓް ފެސްޓް‘ އަކީ ދިވެހި ޒުވާނުންގެ ހުނަރުތައް އެއް ފުރާޅެއްގެ ދަށުން ފެނިގެންދާނެ ތާރީޚީ ހަރަކާތަކަށް ވާނެއެވެ. މިއީ ޒުވާނުންގެ އުފެއްދުންތެރިކަން ކުރިއަރުވައި، އެކުދިންނަށް އަމިއްލަ ނަފްސަށް އޮންނަ އިތުބާރު ބޮޑުކުރުމަށް ލިބޭ ރަނގަޅު ފުރުޞަތެކެވެ. އެހެންކަމުން، މި ފުރުޞަތުގެ ބޭނުން ހިފައި، ގިނަ ޒުވާނުން މި ފެސްޓިވަލްގައި ބައިވެރިވުމަކީ އެކުދިންގެ މުސްތަޤްބަލަށް އެޅޭ މުހިންމު ފިޔަވަޅެކެވެ.
