އެކި ހާދިސާތަކާއި ގުޅިގެން، އުޅަނދުތައް ފުންތައް ފުންނުކުރެވުމުގެ ސަބަބުން ބޮޑެތި ދަތިތައް ދިމާވާތީ ރައްޔިތުންގެ މަޖިލީހުގެ މެމްބަރުން ކަންބޮޑުވުން ފާޅުކޮށްފިއެވެ.
މެމްބަރުން މިފަދައިން ވާހަކަދެއްކެވީ، ދަނގެތި ދާއިރާގެ މެންބަރު މުޙައްމަދު ނާޒިމް ހުށަހަޅުއްވި މަސްދޯނިފަހަރާއި، މީހުންނާއި މުދާ އުފުލާ އުޅަނދުފަހަރާއި، ޓޫރިސްޓުން އުފުލާ އުޅަނދުފަހަރާއި، އޮޔާދާ އުޅަނދުފަހަރާއި، ބޭރު ދަތުރުކުރ އުޅަނދުފަހަރު ފަރަށް އެރުމުން އެ އުޅަނދު ފުންކުރުމުގައި ޢަމަލީ ގޮތުން މަސައްކަތް ކޮށްދޭނެ ދައުލަތުގެ އިދާރާއެއް ނެތުމުން އުފެދޭ ތަކުލީފުތައް، ސަރުކާރުގެ ސަމާލުކަމަށް ގެނައުމަށާއި، އެފަދަ އިދާރާއެއް ދައުލަތުގެ އިދާރާތަކުގެ ތެރޭގައި ހުރުމުގެ މުހިންމުކަން ފާހަގަކުރުމަށް ހުށަހެޅި ގަރާރަށް ބަހުސްކުރައްވަމުންނެވެ.
ކަނޑުމަތީގެ ހާދިސާތަކުގައި، މީހުން ސަލާމަތް ކުރުމުން ނުފުދޭކަން އެ މެމްބަރުން ފާހަގަކުރިއެވެ. އެގޮތުން މުދާ އުފުލާ ބައެއް ބޯޓުފަހަރުފަދަ ތަކެތި ފުން ނުކުރެވި އުޅަނދުގެ ވެރިމީހާއަށް ބޮޑެތި އަދަދުތަކުން ގެއްލުންވާ ކަމަށާ އެކަަމަށް ހައްލެއް ބޭނުންވާކަމަށް މެމްބަރުން ވިދާޅުވިއެވެ.
އެ މަސައްކަތަކީ ދައުލަތުގެ އެއްވެސް އިދާރާއަކާއި ހަވާލުކޮށްފައިވާ މަސައްކަތަކަށް ނުވުމުން އުޅަނދުގެ ވެރި ފަރާތަށް އެކަން ވަރަށް ބޮޑު ދައްޗަަކަށްވާކަން މެމްބަރުން ފާހަގަކުރިއެވެ. އެހެންކަމުން ހަރުދަނާ ނިޒާމެއްގެ ތެރެއިން އެ މަސައްކަތް ކުރަން ޖެހޭ ކަމަށް ހުރިހާ މެމްބަރުންވެސް އިއްތިފާގުވެލެއްވިއެވެ.