ސޯޝަލް ހައުސިންގެ ގޮތުގައި ދޫކޮށްފައިވާ ޔުނިޓްތަކުގެ ތެރެއިން ބިދޭސީންނަށް ކުއްޔަށް ދީފައިވާ ތަންތަން ހުސްކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މުހުލަތެއް ދީފިއެވެ.
އެޗްޑީސީން ރޭ ހާމަކުރި ގޮތުގައި، ސޯޝަލް ހައުސިން ޔުނިޓްތަކަކީ އެކަމަށް ޝަރުތުހަމަވާ ދިވެހި ރައްޔިތުންނަށް ދޫކޮށްފައިވާ ތަންތަން ކަމަށްވީ ނަމަވެސް، ބައެއް ތަންތަން ބިދޭސީންނަށް ކުއްޔަށް ދީފައިވާކަން ވަނީ ފާހަގަކުރެވިފައެވެ.
އެޗްޑީސީން ބުނީ ސޯޝަލް ހައުސިން ޔުނިޓެއް ބިދޭސީއަކަށް ކުއްޔަށް ދިނުމަކީ ގަވާއިދާ ހިލާފު ކަމެއް ކަމަށެވެ. އެހެންކަމުން، އެފަދަ އެއްވެސް ތަނެއް ބިދޭސީންނަށް ކުއްޔަށް ދީފައިވާނަމަ، އަންނަ ޖަނަވަރީ މަހުގެ ތިންވަނަ ދުވަހުގެ ކުރިން އެ ތަންތަން ހުސްކުރުމަށް އެޗްޑީސީން ވަނީ އަންގާފައެވެ. މިއީ މިފަދަ ކަންކަން އިސްލާހުކުރުމަށް އެ ކުންފުނިން ދިން ފުރުސަތެކެވެ.
ސޯޝަލް ހައުސިން ޔުނިޓްތައް ލިބިފައިވާ ފަރާތްތަކުން އެޗްޑީސީއާއެކު ވެފައިވާ އެއްބަސްވުމަށް ފުރިހަމައަށް އަމަލުކުރުމަށް އެ ކުންފުނިން ވަނީ އިލްތިމާސްކޮށްފައެވެ. އަދި ޖަނަވަރީ ތިނެއްގެ ފަހުން ވެސް ބިދޭސީންނަށް ކުއްޔަށް ދީފައިވާކަން ފާހަގަކުރެވިއްޖެނަމަ، އެ ފަރާތްތަކާއެކު ވެފައިވާ އެއްބަސްވުން އުވާލާނެ ކަމުގެ އިންޒާރު ވެސް އެޗްޑީސީން ވަނީ ދީފައެވެ.
ސޯޝަލް ހައުސިން އަކީ ބޯހިޔާވަހިކަމަށް ބޭނުންވެފައިވާ މީހުންނަށް ހާއްސަކޮށްގެން ހިންގާ ސްކީމްތަކަކަށް ވާއިރު، ބައެއް ފަރާތްތަކުން އޮޅުވާލައިގެން ފްލެޓް ހޯދުމަށްފަހު ބޮޑު އަގުގައި ބިދޭސީންނަށް ކުއްޔަށް ދޭ މައްސަލައަކީ އާންމުންގެ ބޮޑު ޝަކުވާއެއް އޮތް ކަމެކެވެ. މިފަދަ އަމަލުތަކުގެ ސަބަބުން ބޯހިޔާވަހިކަމުގެ މައްސަލައަށް ހައްލެއް ނުލިބޭ ކަމަށް ގިނަ ބަޔަކު ގަބޫލުކުރެއެވެ.
