ދިވެހިރާއްޖޭގައި ފަހަކަށް އައިސް އިތުރުވަމުންދާ ސްކޭމް ނުވަތަ މަކަރާއި ހީލަތުން ފައިސާ ހޯދުމުގެ މައްސަލަތަކަށް ހައްލެއް ހޯދުމަށް ދިވެހި ފުލުހުންގެ ޚިދުމަތުން އަންނަނީ މަސައްކަތްތަކެއް ކުރަމުންނެވެ. މިގޮތުން، ފުލުހުންގެ އެންޓި ސްކޭމް ސެންޓަރާއި ސައިބަރ ކްރައިމް ސެންޓަރުން ގުޅިގެން ކުރިއަށްގެންދާ އޮޕަރޭޝަންތަކުގައި ގިނަ އަދަދެއްގެ ބޭންކު އެކައުންޓުތަކާއި ޑިވައިސްތަކަކަށް ފިޔަވަޅު އަޅާފައިވާކަން ދާދިފަހުން ވަނީ ހާމަކޮށްފައެވެ.
ފުލުހުން ހާމަކޮށްފައިވާ ތަފާސްހިސާބުތަކަށް ބަލާއިރު، 2025 ވަނަ އަހަރުގެ މިހާތަނަށް ހުށަހެޅުނު 1663 މައްސަލައަކާ ގުޅިގެން 2946 ބޭންކު އެކައުންޓެއް ވަނީ 48 ގަޑިއިރަށް ފްރީޒްކޮށްފައެވެ. މީގެ ތެރެއިން 754 އެކައުންޓެއް ފްރީޒްކުރެވުނީ ކޯޓު އަމުރެއްގެ ދަށުންނެވެ. މިއީ ސްކޭމަރުން އެކަކު އަނެކަކަށް ފައިސާ ބަދަލުކުރުން ހުއްޓުވުމަށް އެޅުނު މުހިންމު ފިޔަވަޅެކެވެ.
މީގެ އިތުރުން، ޓެކްނޮލޮޖީގެ ވަސީލަތްތައް ބޭނުންކޮށްގެން ހިންގާ މިފަދަ ޖަރީމާތައް ހުއްޓުވުމަށްޓަކައި 727 ޑިވައިސްއެއް ވަނީ ބްލެކްލިސްޓު ކުރެވިފައެވެ. އަދި ސްކޭމް ކުރުމަށް ބޭނުންކުރާ 237 ސިމް ކާޑު ބްލޮކްކޮށް، 54 ވެބްސައިޓް ނުވަތަ ލައިންތައް ޓޭކްޑައުން ކުރެވިފައިވާ ކަމަށް ފުލުހުން ބުނެއެވެ.
2025 މާޗް 17 އިން ފެށިގެން ސްކޭމްގެ މައްސަލަތައް މަރުކަޒީކޮށް ތަހުގީގުކުރަން ފެށުމަކީ މި މަސައްކަތަށް ލިބުނު ބޮޑު ކުރިއެރުމެކެވެ. މި ބަދަލާއެކު މިހާތަނަށް 14 މީހަކު ހައްޔަރުކޮށް، 18 ތަނެއް ބަލާފާސްކޮށް، 72 ޑިވައިސްއެއް ފުލުހުންގެ ބެލުމުގެ ދަށަށް ވަނީ ގެނެސްފައެވެ. މިއީ މިފަދަ ކުށްތައް ކުރާ ފަރާތްތަކަށް ދެވުނު ވަރުގަދަ އިންޒާރެކެވެ.
ގެއްލުނު ފައިސާ އަނބުރާ ހޯދުން
ސްކޭމްގެ މައްސަލަތަކުގައި އެންމެ ބޮޑު ގޮންޖެހުމަކީ ގެއްލޭ ފައިސާ އަނބުރާ ހޯދުމެވެ. ނަމަވެސް، ފުލުހުންގެ އާ ނިޒާމުގެ ދަށުން 539 ފަރާތަކަށް ގެއްލުނު ފައިސާ އެއްކޮށް އަނބުރާ ހޯދައިދެވިފައިވެއެވެ. ޖުމްލަ ގޮތެއްގައި ބަލާއިރު، ގެއްލުނު 22.7 މިލިއަން ރުފިޔާގެ ތެރެއިން 8.5 މިލިއަން ރުފިޔާ (37 އިންސައްތަ) ވަނީ ރިކަވަރ ކުރެވިފައެވެ. މިއީ ކުރިއާ އަޅާބަލާއިރު ފާހަގަކޮށްލެވޭ ރަނގަޅު ނަތީޖާއެކެވެ.
ދިވެހި ފުލުހުންގެ އެންޓި ސްކޭމް ސެންޓަރުން ކުރަމުންދާ މި މަސައްކަތްތަކަކީ ރައްޔިތުންގެ މާލީ ރައްކާތެރިކަން ކަށަވަރުކުރުމަށް އެޅޭ މުހިންމު ފިޔަވަޅުތަކެކެވެ. ޑިޖިޓަލް ވަސީލަތްތައް ބޭނުންކޮށްގެން ހިންގާ މިފަދަ ޖަރީމާތަކުން ސަލާމަތްވުމަށް ފުލުހުންގެ އިރުޝާދުތަކަށް ބޯލެނބުމާއި، ޝައްކުކުރެވޭ ކަންކަން ވަގުތުން ރިޕޯޓްކުރުމަކީ ކޮންމެ ފަރުދެއްގެވެސް ޒިންމާއެކެވެ.
