ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި ކެންޑިޑޭޓުންގެ ފޯމުތައް ހުށަހަޅަންޖެހޭނީ އިލެކްޝަންސް ކޮމިޝަންގެ ޕޯޓަލް މެދުވެރިކޮށް ކަމަށް އެ ކޮމިޝަނުން ކަނޑައަޅައިފިއެވެ.
މިއީ ރާއްޖޭގެ އިންތިޚާބެއްގައި ކެންޑިޑޭޓުންގެ ފޯމު ޑިޖިޓަލްކޮށް ބަލައިގަންނަ ފުރަތަމަ ފަހަރެވެ.
އިލެކްޝަންސް ކޮމިޝަނުން ބުނީ، މި އިންތިޚާބުގައި އެއްވެސް ކަރުދާސް ފޯމެއް ބަލައި ނުގަންނާނެ ކަމަށެވެ. ކެންޑިޑޭޓުން ފޯމު ހުށަހަޅަން ޖެހޭނީ ކޮމިޝަންގެ މައި ޕޯޓަލް މެދުވެރިކޮށް ކަމަށާއި، ފޯމާއެކު ހުށަހަޅަންޖެހޭ ކުށާއި ދަރަނީގެ ރެކޯޑުތައްވެސް އެ ޕޯޓަލަށް ހުށަހެޅޭނެ ކަމަށް ކޮމިޝަނުން ވަނީ ބުނެފައެވެ. މިގޮތުން ޑީޖޭއޭ، ކަރެކްޝަންސް އަދި މީރާގެ ރެކޯޑުތައް ނެގޭނެ އިންތިޒާމުތައް މިހާރު ވަނީ ހަމަޖެހިފައެވެ.
އަމިއްލަ ގޮތުން ކުރިމަތިލާ ކެންޑިޑޭޓުންނަށް ލުއި ފަސޭހަކޮށްދިނުމުގެ ގޮތުން، ތާޢީދު އޮތްކަން ހާމަކުރުމަށް ކުރިން ސޮއި ހޯދަން ޖެހުނު ނަމަވެސް، މިފަހަރު ޕޯޓަލް މެދުވެރިކޮށް ތާޢީދު ކުރުމުގެ ރިކުއެސްޓް ފޮނުވޭނެއެވެ. އިންތިޚާބަށް ކުރިމަތިލުމުގެ ފުރުސަތު ހުޅުވާލުމުގެ ކުރިން ޕޯޓަލް ބޭނުންކުރާނެ ގޮތުގެ ތަފްސީލީ ގައިޑެއް އާއްމުކުރާނެ ކަމަށް ކޮމިޝަނުން ވަނީ ބުނެފައެވެ. ކެންޑިޑޭޓުންނަށް ފޯމު ފުރިހަމަކޮށް ސޭވް ކުރެވުނު ނަމަވެސް، ފޯމު ހުށަހެޅޭނީ ރަސްމީކޮށް ފުރުސަތު ހުޅުވާލުމުންނެވެ.
މި ނިޒާމުގެ ސައްޚަކަން ކަށަވަރުކުރުމަށްޓަކައި ވެރިފައިޑް އީ-ފާސް އެކައުންޓެއް ބޭނުންކުރަން ޖެހޭނެއެވެ. އަދި ޑިޖިޓަލްކޮށް މި މަސައްކަތް ކުރިއަށްދާއިރުވެސް ދެފުށް ފެންނަ ގޮތަށް ހުރިހާ ކަމެއް ކުރިއަށްދާނެ ކަމުގެ ޔަޤީންކަން ކޮމިޝަނުން ދެއެވެ..
މި ބަދަލު ގެނައުމުގެ މައިގަނޑު މަޤްޞަދަކީ ކައުންސިލް އިންތިޚާބަކީ ގިނަ އަދަދެއްގެ ކެންޑިޑޭޓުން ކުރިމަތިލާ އިންތިޚާބަކަށް ވުމުން، ކެންޑިޑޭޓުންނަށާއި ކޮމިޝަންގެ މުވައްޒަފުންނަށް މަސައްކަތް ލުއިކޮށްދިނުމެވެ.
ސިޔާސީ ޕާޓީތަކަށްވެސް ”ސިމެދަ“ ޕޯޓަލް މެދުވެރިކޮށް އެ ޕާޓީތަކުގެ ކެންޑިޑޭޓުންގެ މައުލޫމާތު ބަލާލެވޭނެއެވެ. އިލެކްޝަންސް ކޮމިޝަނުން އަންނަނީ 2023 ވަނަ އަހަރުގެ ރިޔާސީ އިންތިޚާބުން ފެށިގެން އެ ކޮމިޝަނުގެ ޚިދުމަތްތައް ޑިޖިޓަލް ކުރުމަށް ގިނަ މަސައްކަތްތަކެއް ކުރަމުންނެވެ.
