ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މީލާދީ އައު އަހަރުގެ މުނާސަބަތުގައި ބޭރު ޤައުމުތަކުގެ އިސްވެރިންނަށާއި، ސަރުކާރުތަކަށާއި، ބައިނަލްއަޤުވާމީ ޖަމާޢަތްތަކުގެ ވެރިންނަށް ތަހުނިޔާއާއި ހެޔޮ އެދުންތައް ފޮނުއްވައިފިއެވެ.
ރަޙްމަތްތެރި ޤައުމުތަކުގެ ވެރިންނަށް ރައީސުލްޖުމްހޫރިއްޔާ ވަކިވަކިން ފޮނުއްވި މެސެޖުތަކުގައި، ދިވެހި ސަރުކާރާއި ރައްޔިތުންގެ ނަމުގައި އަދި އެމަނިކުފާނުގެ އަމިއްލަ ނަންފުޅުގައި، އެ ޤައުމުތަކުގެ ވެރިންނަށާއި ސަރުކާރުތަކަށް އަދި ރައްޔިތުންނަށް ވަރަށް އިޚްލާޞްތެރިކަމާއެކު އައު އަހަރުގެ ތަހުނިޔާ ވަނީ ރައްދުކުރައްވާފައެވެ.
މި ފެށޭ އައު އަހަރަކީ ތަނަވަސްކަމާއި، އުފާފާގަތިކަން އަދި ކާމިޔާބީ ގެނެސްދޭނެ އަހަރަކަށް ވުމަށް އުންމީދު ކުރައްވާ ކަމަށް ރައީސްގެ މެސެޖުގައި ފާހަގަކުރެއްވިއެވެ. އަދި މި އަހަރަކީ ރާއްޖެއާއި އެ ޤައުމުތަކާ ދެމެދު އޮތް ގުޅުން އިތުރަށް ބަދަހިވެ، އެއް ޤައުމުން އަނެއް ޤައުމަށް ދޭ އެއްބާރުލުން އިތުރުވެގެންދާނެ އަހަރަކަށް ވާނެ ކަމަށް އުންމީދު ކުރައްވާ ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން، ބައިނަލްއަޤުވާމީ ޖަމުޢިއްޔާތަކުގެ ވެރިންނަށް ފޮނުއްވި މެސެޖުތަކުގައި، ދުނިޔެއަށް ކުރިމަތިވެފައިވާ އެކި ގޮންޖެހުންތައް ޙައްލުކުރުމަށާއި ދުނިޔޭގެ ޙާލަތު ރަނގަޅުކުރުމަށް އެ ޖަމުޢިއްޔާތަކާ ގުޅިގެން މަސައްކަތް ކުރައްވާނެ ކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
