ދިވެހިރާއްޖޭގެ އިސްލާމީ ނިޒާމު ހަރުދަނާކުރުމަށްޓަކައި ކުރެވެމުންދާ މަސައްކަތްތަކުގެ ތެރެއިން، ޒަކާތުގެ ކަންކަން ހަރުދަނާ އުސޫލެއްގެ ދަށުން ހިންގުމަށްޓަކައި ޒަކާތުގެ ޤާނޫނަށް ޢަމަލުކުރަން ފަށައިފިއެވެ.
މި ޤާނޫނަށް ޢަމަލުކުރަން ފެށުމާއެކު، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ޤާނޫނު ނަންބަރު 2025/27 (ޒަކާތުގެ ޤާނޫނު) ގެ 11 ވަނަ މާއްދާގެ (ހ) ގެ ދަށުން ’މޯލްޑިވްސް ޒަކާތު ހައުސް‘ އަލުން އިދާރީ ގޮތުން ޤާއިމުކުރައްވާފައެވެ.
ޒަކާތުގެ ޤާނޫނަކީ އިސްލާމްދީނުގައި ޒަކާތް ޝަރުޢުކުރައްވާފައިވާ މަތިވެރި މަޤުޞަދުތައް އެންމެ ފުރިހަމަ ގޮތުގައި ޙާޞިލުކުރުމަށްޓަކައި އެކުލަވާލެވުނު މުހިންމު ޤާނޫނެކެވެ. މި ޤާނޫނުގެ މައިގަނޑު މަޤްޞަދަކީ ރާއްޖޭގައި ޒަކާތް ދެއްކުމާއި، ބަލައިގަތުމާއި، އަދި ޒަކާތުގެ ގޮތުގައި ލިބޭ މުދަލާއި ފައިސާ ބެހުމުގެ ކަންކަން ދެފުށް ފެންނަ، ހަރުދަނާ ނިޒާމެއްގެ ތެރެއިން އިންތިޒާމުކުރުމެވެ. 2025 ވަނަ އަހަރުގެ ޑިސެންބަރު 6 ވަނަ ދުވަހު ތަސްދީޤުކުރެވުނު މި ބިލަށް ޢަމަލުކުރަން ފެށުމާއެކު، ޒަކާތާ ގުޅޭ ހުރިހާ ކަމަކަށް ޤާނޫނީ ބާރުވެރިކަން ވަނީ ލިބިފައެވެ.
އާ ޤާނޫނަށް ޢަމަލުކުރަން ފެށުމުގެ ކުރިން މިނިސްޓްރީ އޮފް އިސްލާމިކް އެފެއާޒްގެ ދަށުން ހިނގަމުންއައި މޯލްޑިވްސް ޒަކާތު ހައުސް ވަނީ އުވާލައްވާފައެވެ. އޭގެ ބަދަލުގައި މިހާރު ޤާއިމުކުރެވުނު އިދާރާއަކީ ޒަކާތުގެ ޤާނޫނުގެ ދަށުން އުފެދިފައިވާ، އިތުރު ބާރުތަކާއި މަސްއޫލިއްޔަތުތައް ހަވާލުކުރެވިފައިވާ މުއައްސަސާއެކެވެ. މި އިދާރާ ހިނގަމުންދާނީ މިނިސްޓްރީ އޮފް އިސްލާމިކް އެފެއާޒްގެ ބެލުމުގެ ދަށުންނެވެ.
ޒަކާތުގެ ނިޒާމަށް އަންނާނެ ހެޔޮ ބަދަލުތައް
މި އައު ބަދަލާއެކު ޒަކާތުގެ ފަންޑު މެނޭޖްކުރުމާއި، ޒަކާތް ޙައްޤުވާ ފަރާތްތަކަށް އެހީތެރިކަން ފޯރުކޮށްދިނުމުގައި އިތުރު ހަލުވިކަމެއް އަންނާނެއެވެ. ޚާއްޞަކޮށް ޒަކާތުގެ ފައިސާ އިންވެސްޓްކޮށް، އޭގެ ނަފާ އިތުރުކުރުމާއި، މުޖުތަމަޢުގެ ފަޤީރުކަން ނައްތާލުމަށް ކުރެވޭ މަސައްކަތްތަކަށް ޤާނޫނީ ހިޔާވަހިކަން ލިބިގެންދާނެއެވެ. މީގެ އިތުރުން، ޒަކާތް ދައްކާ ފަރާތްތަކުގެ އިތުބާރު ބޮޑުވެ، ޒަކާތުގެ ނިޒާމަކީ ދިވެހި އިޤްތިޞާދުގެ މުހިންމު ތަނބަކަށް ވެގެންދާނެއެވެ.
ޒަކާތުގެ ޤާނޫނަށް ޢަމަލުކުރަން ފެށުމާއި މޯލްޑިވްސް ޒަކާތު ހައުސް އަލުން ޤާއިމުކުރެވުމަކީ ރާއްޖޭގެ އިސްލާމީ ފައިނޭންސްގެ ދާއިރާއަށް ލިބުނު ވަރަށް ބޮޑު ކާމިޔާބީއެކެވެ. މި ބަދަލުގެ ސަބަބުން ޒަކާތުގެ ބޭނުން އޭގެ އެންމެ ފުރިހަމަ ގޮތުގައި ހިފި، މުޖުތަމަޢުގެ ފުދުންތެރިކަން އިތުރުވެ، އިސްލާމީ އުޞޫލުތަކުގެ މަތީގައި ދިވެހި އުންމަތް ބިނާކުރުމަށް މަގުފަހިވެގެންދާނެއެވެ.
