ބޭހުގެ މައްސަލައަށް ހައްލެއް ހޯދުމަށްވެސް 2025 ވަނަ އަހަރު މަސައްކަތްތަކެއް ފަށައިފައިވެއެވެ. ދާއިމީ ބަލިތަކަށް ބޭސްކުރާ މީހުންނަށް ބޭސް ލިބުމުގައި ދިމާވާ ދަތިތައް ހައްލުކުރުމަށް، އެފަދަ ފަރާތްތަކުގެ ދަފްތަރެއް އެކުލަވާލައި، އެ މީހުންނަށް ބޭސް ފޯރުކޮށްދިނުމަށް ޚާއްސަ މަރުކަޒެއް ޤާއިމުކުރުމަށް ނިންމަވާފައެވެ.
ފެންވަރު ރަނގަޅު ބޭސް ލިބުން ކަށަވަރުކޮށް، ރެގިއުލޭޓަރީ ބުރަތައް ކުޑަކުރުމަށް، އިންޑިއަން ފާމަކޯޕީއާ ކޮމިޝަނާއި މޯލްޑިވްސް ފުޑް އެންޑް ޑްރަގް އޮތޯރިޓީއާ ދެމެދު ފާމަކޯޕީއާ އެއްބާރުލުމާ ބެހޭ އެއްބަސްވުމެއްގައި ސޮއިކުރިއެވެ. ސިއްޙީ ވުޒާރާއިން ވިދާޅުވެފައިވަނީ، ދިވެހިރާއްޖެއިން އިންޑިއަން ފާމަކޯޕީއާ ބަލައިގަންނާނީ ރާއްޖޭގައި އުފައްދާ އަދި އިމްޕޯޓްކުރާ ބޭސްތަކުގެ މިންގަނޑުތައް ކަނޑައަޅާ ރަސްމީ ފޮތެއްގެ ގޮތުގައިކަމަށެވެ. މިކަމުގެ ސަބަބުން ދިވެހި ރައްޔިތުންނަށް ލިބޭ ބޭހުގެ ފެންވަރު ކަށަވަރުވެ، ރެގިއުލޭޓަރީ މަރުޙަލާތައް ހަލުވިވެގެންދާނެކަމަށްވެސް އެވުޒާރާއިން ފާހަގަކުރެއެވެ. މި އެއްބަސްވުމުގެ ދަށުން، އިންޑިއާއިން އެތެރެކުރާ ބޭސްތައް ދެވަނަ ފަހަރަށް ޓެސްޓްކުރަން ނުޖެހި، އިންޑިއާގެ އުފެއްދުންތެރިން ދޫކުރާ ”ސެޓްފިކެޓް އޮފް އެނަލިސިސް“ ދިވެހި އިދާރާތަކުން ސީދާ ބަލައިގަނެވޭނެ ނިޒާމެއް ހަމަޖެހިގެންދާނެއެވެ.
މި އެއްބަސްވުމުގެ ސަބަބުން ދިވެހިރާއްޖޭގެ ސިއްޙީ ދާއިރާއަށް ވަރަށް ބޮޑު ފައިދާތަކެއް ލިބިގެންދާނެއެވެ. އެގޮތުން، ފެންވަރު ބެލުމުގެ ތަޙްލީލުތަކަށް ބޭނުންވާ އިންޑިއަން ފާމަކޯޕީއާ ރެފަރެންސް ސްޓޭންޑަޑްސް (IPRS) އަދި އިމްޕިއުރިޓީ ސްޓޭންޑަރޑްސް އެކަށީގެންވާ އަގުގައި ލިބިގެންދާނެއެވެ. ސިއްހީ ވުޒާރާއިން ފާހަގަކުރައްވާ ގޮތުގައި މި އެއްބާރުލުމުގެ ސަބަބުން ޖެނެރިކް ބޭސް ތައްޔާރުކުރުމަށް ރަނގަޅު ފުރުސަތުތަކެއް ހުޅުވި، ދިވެހިރާއްޖޭގައި ހެޔޮއަގުގައި ބޭސް ލިބުމަށް މަގުފަހިވެގެންދާނެއެވެ. ދިވެހިރާއްޖެ ފަދަ ޤައުމަކަށް، މި އެމްއޯޔޫގެ ސަބަބުން ފެންވަރު ރަނގަޅު ބޭސް ލިބުން ކަށަވަރުވެ، ރެގިއުލޭޓަރީ ބުރަތަކާއި އެކަމާ ގުޅުންހުރި ޚަރަދުތައް ކުޑަވެގެންދާނެއެވެ.
ރައްޔިތުން އައިނު ހައްދަން ކުރާ ބޮޑެތި ޚަރަދުތަކަށް ލުޔެއް ހޯއްދަވައިދެއްވުމަށް ރައީސުލްޖުމްހޫރިއްޔާ ނިންމެވި ނިންމެވުމާ އެއްގޮތަށް، ސަރުކާރުގެ ސިއްޙީ ޚިދުމަތުގެ ތެރެއިން މާލެ ސިޓީ ގްރޫޕް އޮފް ހޮސްޕިޓަލްސްގެ ދަށުން، އައިނު ހެއްދޭނެ އިންތިޒާމުވެސް މިހާރުވަނީ ހަމަޖައްސަވާފައެވެ. އައިނު ހެއްދުމަށް އޮތް ބޮޑު ޑިމާންޑާއެކު، އައިޖީއެމްއެޗްގެ އައިނު ފިހާރައަށް އިތުރު މެޝިނެއް ގެނެސްފައިވާއިރު، އެވްރެޖްކޮށް ދުވާލަކު 35 އާއި 40 އައިނާ ދެމެދު ހަދަމުންދާ އަދަދު މި މެޝިނާއެކު ދެގުނަ އިތުރުވެގެންދާނެއެވެ. މާލޭގެ އިތުރުން ރާއްޖޭގެ ހުރިހާ ޓަރޝަރީ ހޮސްޕިޓަލްތަކެއްގައި އައިނު ފިހާރަ ހެދުމަކީ ސަރުކާރުގެ ސިޔާސަތެކެވެ.
މީގެއިތުރުން، ޢާންމު ޞިއްޙަތުގެ ނިޒާމު ވަރުގަދަކުރެއްވުމުގެ ގޮތުން، އަދުގެ ސަރުކާރުން މާލެ ސަރަޙައްދުގައި ޤާއިމުކުރެއްވި ފުރަތަމަ އަރބަން ޕްރައިމަރީ ހެލްތުކެއަރ ސެންޓަރުން ޚިދުމަތް ދޭންވަނީ ފަށާފައެވެ. މި ސެންޓަރުގެ ޚިދުމަތް މައިގަނޑު ގޮތެއްގައި ބެހިފައިވަނީ ތިން ބަޔަކަށެވެ؛ އެއީ އާންމު ބަލިތަކުގެ ޑޮކްޓަރުންނަށް ދެއްކުމާއި، އިތުރު ފަރުވާ ބޭނުންވާ ހާލަތްތަކުގައި ޚާއްޞަ ޑޮކްޓަރުންގެ ލަފާ ހޯދުމާއި، ފަސޭހައިން ދެއްކޭ ޚާއްޞަ ޑޮކްޓަރުންނަށް ދެއްކުމުގެ އިންތިޒާމު ހަމަޖެއްސުމެވެ. އަދި ޢާންމު ޞިއްޙަތު ކުރިއެރުވުމަށް ޤައުމީ ފެންވަރުގައި ހިންގަވާ ޕްރޮގްރާމްތައްވެސް މި މަރުކަޒުގައި ކުރިއަށްގެންދަވާނެއެވެ.
އެގޮތުން، ޗައިލްޑް ހެލްތު ކްލިނިކް މެދުވެރިކުރައްވައި، ކުދިންގެ ހެދިބޮޑުވުން މޮނިޓަރކޮށް، ވެކްސިން ދިނުންފަދަ ޚިދުމަތްތައް މި ސެންޓަރުން ފޯރުކޮށްދެއްވާނެއެވެ. ހަމައެއާއެކު، ޞިއްޙީ ރަނގަޅު އާދަތަކަށް ހޭލުންތެރިކަން އިތުރުކުރުމާއި، ނަފްސާނީ ދުޅަހެޔޮކަމާއި، ދުންފަތާ ދުރުވުމަށް އެހީވެދޭ ކްލިނިކް ފަދަ ޚިދުމަތްތައްވެސް މި ސެންޓަރުން ލިބޭނެއެވެ.
ސަރުކާރުގެ މުހިންމު ސިޔާސަތެއްގެ ދަށުން ބޭހުގެ އަގު ތިރިކޮށް، ކޮލިޓީ ބޭސް ރާއްޖެއަށް އެތެރެކުރުމަކީ ރައީސްގެ މުހިންމު އަމާޒެކެވެ. މީގެއިތުރުން، ރައްޔިތުންނަށް ބޭނުންވާ އަސާސީ ކަންކަން ރަށްރަށުގެ ހޮސްޕިޓަލްތަކާއި ހެލްތު ސެންޓަރުތަކުގައިވެސް ޤާއިމުކުރުމުގެ މަސައްކަތްވަނީ ފަށާފައެވެ. އެގޮތުން، ރައީސް ކުރެއްވި ދަތުރުފުޅުތަކުގެ ތެރެއިން ރަށްރަށުގެ ހޮސްޕިޓަލްތަކާއި ހެލްތު ސެންޓަރުތައް ތަރައްޤީ ކުރުމުގެ ޢަމަލީ މަސައްކަތްތައްވެސްވަނީ ފަށާފައެވެ.
ސަރުކާރުގެ އަމާޒަކީ ރާއްޖޭގެ ސިއްހީ ނިޒާމު އިތުރަށް ފުޅާވެ، ރައްޔިތުންނަށް އަވަސް އަދި ފެންވަރު ރަނގަޅު ސިއްހީ ޚިދުމަތްތަކެއް ފޯރުކޮށްދިނުމެވެ.
