ރާއްޖޭގެ ސިޔާސީ މަސްރަހުގައި 2025 ވަނަ އަހަރު ފާހަގަކުރެވުނީ އާންމުކޮށް އެހެން އަހަރުތަކާއި ހިލާފަށް ސިޔާސީ ގޮތުން މާބޮޑު ހަލަބޮލިކަމެއް ހިނގާފައި ނުވާ އަހަރެއްގެ ގޮތުގަ އެވެ. އާންމުކޮށް ސަރުކާރަކަށް އަހަރެއް ވެގެންދާއިރު އިދިކޮޅުގެ އެކި ހަރަކާތްތައް ގިނަކުރުމާއި، ސަރުކާރުގެ އެކި މަޝްރޫއުތަކާއި ގުޅުވައި އަމާޒުކުރާ ފާޑުކިއުންތައް ގިނަ ނަމަވެސް އިދިކޮޅު ސިޔާސީ ޕާޓީތަކުގެ ވެސް މާބޮޑު ހަރަކާތެއް ފެނިފައި ނުވެ އެވެ.
ވާދަވެރި އިދިކޮޅު ސިޔާސީ ޕާޓީއެއްގެ ގޮތުގައި ހަރަކާތްތައް ކުރިޔަށް ގެންދިޔައީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ނަމަވެސް، އެ ޕާޓީގެ އެތެރޭގައި އުފެދިފައިވާ މައްސަލަތަކާއި ހިޔާލުތަފާތުވުންތަކުގެ ސަބަބުން މާބޮޑު މަސައްކަތެއް ކުރިޔަށް ގެންދެވޭތަނެއް ނުފެނެ އެވެ.
މީގެއިތުރުން ދެން ކިރިޔާ ވެސް ހަރަކާތެއް ނުވަތަ ބައްދަލުވުމެއް ކުރިޔަށް ގެންގޮސްފައި ވަނީ ސަރުކާރާއި ވަކިވެ ޕީޕަލްސް ނެޝަނަލް ފްރޮންޓް (ޕީއެންއެފް) ގެ ނަމުގައި އައު ސިޔާސީ ޕާޓީއެއް އުފައްދަވައިގެން މަސައްކަތް ކުރައްވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ.
ރައީސް ޔާމީން އިސްވެ ޕީއެންއެފްގެ ޖަލްސާތައް ކުރިޔަށް ގެންދިޔަ ނަމަވެސް މި ޖަލްސާތައް އެ ޕާޓީގެ އޮފީހާއި ހަރަކާތްތައް ހިންގާ އެމަނިކުފާނުގެ ގެކޮޅުން ބޭރުގައި ބާއްވާފައި ވަނީ މަދު ހަރަކާތެކެވެ. އެއީ ހުޅުމާލެ ފޭސް ދޭއްގައި ބޭއްވި ޖަލްސާއަކާއި މާލޭގެ އާޓިފިޝަލް ބީޗުގައި ބޭއްވި ޖަލްސާ އެކެވެ.
މި ދެ ޕާޓީ ނޫން އެހެން އެއްވެސް ޕާޓީއެއްގެ ހިލަމެއް ނުވެ އެވެ. ހާއްސަކޮށް އަދާލަތު ޕާޓީއާއި ޖުމްހޫރީ ޕާޓީ ފާހަގަކުރެވޭއިރު މި ހިނގާ 2025 ވަނަ އަހަރުގެ ތެރޭގައި ޕާޓީން ހަމައެކަނި ބަސް ބުނެފައި ވަނީ އާންމު ކުރާ ބަޔާންތަކުން އެކަންޏެވެ. ނަމަވެސް އަދާލަތު ޕާޓީން އިސްވެ 2 ނޫސްވެރިންގެ ބައްދަލުވުމެއް ބޭއްވި އެވެ. ނަމަވެސް އަމަލީ ގޮތުން ކުރެވުނު އެއްވެސް މަސައްކަތެއް ނުފެނެ އެވެ.
ސަރުކާރުގެ މަސައްކަތްތަކާއި، އާންމުން ސަރުކާރާއި މެދު ދެކޭ ގޮތަށް ބަލާއިރު 2025 ވަނަ އަހަރު ފާހަގަކުރެވިފައި ވަނީ ވަރަށް ތަފާތު ގޮތަކަށެވެ. އެގޮތުން ސަރުކާރުން ސީދާ ރައްޔިތުންގެ އަޑުއަހައި، ކަންބޮޑުވުންތައް އޮޅުންފިލުވުމުގެ ގޮތުން ރައީސުލްޖުމްހޫރިއްޔާ ކުރެއްވި ދަތުރުފުޅުތައް ފާހަގަކުރެވެ އެވެ.
އެގޮތުން 2025 ވަނަ އަހަރު ރައީސް ޑރ. މުހައްމަދު މުއިއްޒު ނިންމަވާލެއްވީ ރާއްޖޭގެ ހުރިހާ ރަށަކަށް ދަތުރު ކުރެއްވުމާއި އެކު ހުރިހާ ކައުންސިލަކާއި ވެސް ބައްދަލު ކުރައްވަ އެވެ. އަދި އަހަރުގެ ފަހުކޮޅު ކުރިޔަށް ގެންގޮސްފައި ވަނީ މާލޭގެ އެކި އަވަށްތަކުގެ ބައްދަލުވުމެވެ.
މި ބައްދަލުވުންތަކުގައި ސީދާ ރައްޔިތުންގެ ކަންބޮޑުވުންތައް ހުށަހެޅުމަށް ފުރުސަތު ހުޅުވާލެވުނެވެ. އެކި ދާއިރާތަކާއި ގުޅުން ހުރި، އެކި މައްސަލަތަކާއި ގުޅުން ހުރި އަދި އިޖްތިމާއީ ގޮތުން ބޮޑުވެފައިވާ އެކި މައްސަލަތަކުގެ އިތުރުން ވަކިވަކި ފަރުދުންގެ އެ ހުރި ދަތިތައް ވަނީ ރައީސުލްޖުމްހޫރިއްޔާއަށް ހުށަހަޅާފަ ވެ.
މި ބައްދަލުވުންތައް ރޭގަނޑުގެ ދަންވަރު 3 ޖެހުމާއި ހަމައަށް ކުރިޔަށް ގެންދިޔަ އެވެ.
މި ރިޕޯޓުގައި މިހާ ހިސާބުން މި ބަލާލަނީ ޖުމްލަކޮށް 2025 ވަނަ އަހަރު ފާހަގަކުރެވިފައިވާ ސިޔާސީ ބޮޑެތި ކަންތައްތަކެވެ.
ރާއްޖޭގެ ސިޔާސީ މަސްރަހަށް ތާރީހުގައި ވެސް ފެނިގެން ދިޔަ އެންމެ ބޮޑުކަމެއްގެ ގޮތުގައި ފެނިގެން ދިޔައީ އެމްޑީޕީގެ އެތެރޭގައި ޖެހުނު މައްސަލަތަކެވެ. މި މައްސަލަތައް ހާމަކަން ބޮޑު ގޮތެއްގައި ބޭރުވެ ޕާޓީގެ އެންމެ ފުރަތަމަ ޑިމޮކްރެޓިކް ރައީސް ޕާޓީން ވަކިވެގެން ދިއުން ފާހަގަކުރެވެ އެވެ. އެމަނިކުފާނާއި އެކު، އެމަނިކުފާނުގެ އެންމެ އަރިސްކޮށް ތިއްބެވި މެމްބަރުންތައް ވެސް އެމްޑީޕީން ވަކިވި އެވެ.
2025 ވަނަ އަހަރު އެންމެ ފުރަތަމަ ވެސް ފެށިގެން އައީ، އޭރު ޕާޓީގެ ތިއްބެވި ބައެއް ބޭފުޅުން މަޑުމަޑުން އެމްޑީޕީއާއި ގުޅެން ފެށުނު ހިސާބުންނެވެ. އޭރު ވެސް ކޮންމެވެސް ވަރަކަށް ގަބޫލު ކުރެވިފައި އޮތީ ރައީސް ނަޝީދު ވެސް އެމްޑީޕީއަށް އެނބުރި ވަޑައިގަންނަވާނެ ކަމަށެވެ. ސަބަބަކީ އެމްޑީޕީން ވަކިވި މެމްބަރުންތައް ސަރުކާރުގެ ތާއީދުގައި ނެތް ނަމަވެސް ފާޑުކިއުން އަމާޒުކޮށް އެމްޑީޕީގެ އެތެރޭގެ ކަންކަމަށް އަނެއްކާވެސް ބަސް ކިޔަން ފެށުމެވެ.
2025 ވަނަ އަހަރުގެ ޖެނުއަރީ މަހުގެ ތެރޭގައި އެމްޑީޕީއާއި އަލަށް ގުޅިވަޑައިގެންނެވި މެމްބަރުންނަކީ 2023 ގެ ރިޔާސީ އިންތިހާބުގައި އެމްޑީޕީގެ ރަނިންމޭޓެއްގެ ގޮތުގައި ވާދަކުރެއްވި އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރުއާއި، އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް (ޝިއްޕެ) އަދި ޕާޓީގެ ކުރީގެ ޗެއާޕާސަން ހަސަން ލަތީފާއި، މެދުހެންވޭރު ދާއިރާގެ ކުރީގެ މެމްބަރު އަދި 19 ވަނަ މަޖިލީހުގެ ޕާޓީގެ ޕާލިމަންޓްރީ ގުރޫޕުގެ ލީޑަރު އަލީ އާޒިމް އެވެ.
ސަރުކާރިގެ ސިޔާސަތުތަކާއި ދެކޮޅަށް އަޑުއުފުލައި އެމްޑީޕީން މާލޭގައި ބޮޑު ހިންގާލުމެއް މި ތަރީހުގައި ބާއްވާފައި ވެއެވެ. މި ހިނގާލުމުގައި ޕާޓީގެ ލީޑާޝިޕާއި، ގައުމީ މަޖިލިސް މެމްބަރުން އަދި ޕާޓީގެ އާންމު މެމްބަރުންގެ ތެރެއިން ގިނަ އަދަދެއްގެ ބަޔަކު ބައިވެރިވެފައި ވެއެވެ.
އޭގެ ފަހުން ވެސް އެކި އެއްވުންތައް އެމްޑީޕީ ކުރިޔަށް ގެންދިޔައިރު ދެން ފާހަގަކުރެވެނީ އޮކްޓޯބަރ 3 އަށް ތާވަލު ކުރި އެއްވުމެވެ. ގައުމީ މަޖިލީހުގެ ބައްދަލުވުމެއް ބާއްވައި، ދޮޅު މަހެއްހާ ދުވަހު ތައްޔާރުވެގެން ބޭއްވި އެ އެއްވުން އެރޭ ކުރިޔަށް ނުގެންދެވި ނިންމާލީ ފުލުންނާއި ކުރިމަތިލުމަށް ފަހު އެވެ.
އެގޮތުން އެ އެއްވުން ކުރިޔަށް ގެންދިއުމަށް ފުލުހުންނާއި އެކު އެއްބަސްވެފައި ވަނީ އަމީނީ މަގުން ނަމަވެސް ކުއްލި ގޮތަކަށް އާޓިފިޝަލް ބީޗުން ހަރަކާތް ފަށައި މަޖީދީ މަގުން ކުރިޔަށް ދިއުމަށް މަސައްކަތް ކުރި އެވެ. އެހެންވެ ފުލުހުން އެންގީ އެގޮތަށް ކުރިޔަށް ނުދެވޭނެކަމަށާއި، އަދިވެސް ބޮޑުތަކުރުފާނު މަގުން ގޮސް، އަމީނީ މަގުން ކުރިޔަށް ދާނަމަ އެއްވުން ނުވަތަ އެ ހިނގާލުން ކުރިޔަށް ގެންދަން އެއްވެސް ހުރަހެއް ނެތްކަމަށެވެ.
އެއަށް ބެލުމެއް ނެތި އެމްޑީޕީން އެއްވުން ކުރިޔަށް ގެންދަން މަސައްކަތް ކުރުމުން، ފުލުހުން ވަނީ ބެރިކޭޑު ޖަހައި ހެންވޭރު ދަނޑު ކައިރިން މަޖީދީ މަގު ބަންދުކޮށްފަ އެވެ.
މި އެއްވުމުގެ ތެރޭގައި ފުލުހުން ބާރު ގަދަ އެލާމެއް ވެސް ބޭނުން ކުރި އެވެ. އަދި ބަޔަކު ހައްޔަރު ކުރި އެވެ.
އެ މައްސަލައިގައި އެއްވުމެއް ބޭއްވުމަށް ފަހު އަނެއްކާވެސް ގައުމީ މަޖިލިސް ބައްދަލުވުމެއް ބާއްވައި މެމްބަރުންގެ މެދުގައި ފާސްކުރީ ސަރުކާރަށް ދެ އަހަރު ފުރުމާއި ދިމާކޮށް ނޮވެމްބަރު 17 ގައި ބޮޑު އެއްވުމެއް ބޭއްވުމަށެވެ. އެހެން ނަމަވެސް ތާރީހު ގާތްވެފައި ވަނިކޮށް އެމްޑީޕީން އެ އެއްވުން ފަސްކުރީ ސަރުކާރުން ހަރަކާތަށް ހުރަސްއަޅަމުންދާކަމަށް ބުނެ އެވެ.
ފަހުން ޕާޓީގެ ބައެއް މެމްބަރުން ތުހުމަތު ކުރި ގޮތުގައި އެ އެއްވުން ކެންސަލް ކުރީ، އެތެރޭގެ މައްސަލަތަކުގެ ސަބަބުންނެވެ.
