މިއަހަރުގެ އެންމެ ފުރަތަމަ ފަތުރުވެރިޔާއަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ހޫނު މަރުހަބާއެއް ކިޔަފިއެވެ.
އެމްއޭސީއެލްއިން އެކްސްގައި ހިއްސާކޮށްފައިވާ ޕޯސްޓުގައި ވަނީ އަހަރުގެ ފުރަތަމަ ފަތުރުވެރިޔާއަށް ވެލާނާ އިންޓަނޭޝަނަލް އެއަރޕޯޓުގެ ޓާމިނަލް 1އިން ހޫނު މަރުހަބާއެއް ކިޔާފައެވެ. މިއަހަރު ރާއްޖެއަށް ޒިޔާރަތް ކުރާ އެންމެ ފުރަތަމަ ފަތުރުވެރިޔާއަކީ ޖަރުމަންވިލާތުގެ ރައްޔިތެއް ކަމަށްވާ ތޯމަސް އެންޑްރިއާސް ހެލްވެގާރއެވެ.
އޭނާ ރާއްޖެއަށް އައިސްފައިވަނީ އިއްތިހާދު އެއަރވޭސްގެ ފްލައިޓަކުންނެވެ. މިއީ އޭނާ ރާއްޖެއަށް އައި ފުރަތަމަ ފަހަރު ކަމަށް އޭނާ ވަނީ ބުނެފައެވެ. އެމްއޭސީއެލްއިން ބުނެފައިވަނީ މިހާރު އައު ޓަރމިނަލް ނުވަތަ ޓަރމިނަލް 1 އިން 41 އެއަރލައިނަށް ހިދުމަތް ދެމުންދާ ކަމަށެވެ. އަދި ހުރިހާ އެއަރލައިނެއް އައު ޓަރމިނަލަށް ބަދަލުވިއިރު ހަމައެކަނި ޓަރމިނަލް 1 އިން މިހާތަނަށް 600،000 އަށްވުރެ ގިނަ ފަތުރުވެރިންނަށް ހިދުމަތް ދީފައިވާ ކަމަށެވެ.
އެމްއޭސީއެލްއިން ދަނީ ޓަރމިނަލް 1 އިން ދޭ ހިދުމަތްތައް ފުޅާކުރުމަށް ގިނަ މަސައްކަތްތަކެއް ކުރަމުންނެވެ. މިމަސައްކަތުގެ ދަށުން މިހާރު އައު ޓަރމިނަލުގެ ޑިއުޓީ ފްރީގެ ހިދުމަތް ފެށުމަށް ފަހުގެ ތައްޔާރީތައް ވަމުންދާއިރު ސީޕްލޭން ކައުންޓަރތަކުގެ ހިދުމަތްވެސް މި ޓަރމިނަލަށް ބަދަލު ކުރުމުގެ މަސައްކަތް ދަނީ ކުރަމުންނެވެ.
