ހުއްދަ ނެތް ފާމަސީތަކާއި ލައިސެންސް ނެތި ފާމަސިސްޓުން ބޭސް ވިއްކާ ނަމަ ފިޔަވަޅު އަޅާނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު ބުނެފިއެވެ.
މިކަން އިއުލާން ކޮށްފައިވަނީ އެ އޮތޯރިޓީން ކުރި އިއުލާނެއްގައެވެ. އެގޮތުން ރާއްޖެއަށް ބޭސް އިމްޕޯޓުކޮށް ވިއްކޭނީ އެކަމުގެ ހުއްދަ ލިބިގެންކަމަށެވެ. އެއާ ހިލާފަށް ބޭސް ވިއްކަމުންދާތީ، އެކަން ހަނދާންކޮށްދިނުމަށް އެމްއެފްޑީއޭއިން ނެރުނު އިއުލާނުގައި ބުނީ ފާމަސީތަކުގައި އެ އޮތޯރިޓީން ދޫކުރާ ”ބޭސް ވިއްކުމުގެ ހުއްދަ“ ނެތި ބޭސް ވިއްކުމާއި ހުއްދަ ނެތް ފާމަސިސްޓުން ނެތި މަސައްކަތްކުރުމަކީވެސް މަނާކަމެއްކަމަށެވެ.
އޭގެ އިތުރުން ފާމަސީތަކުން ބޭސް ނަގާއިރު ބައެއް ކަންކަމަކީ އަމިއްލަ މީހާގެ ސަލާމަތާއި ރައްކާތެރިކަމާ ގުޅިފައިވާ ކަންކަމަށް ވާތީ އަމިއްލަ ޒިންމާ ނެގުމަށް އެމްއެފްޑީއޭ ވަނީ އެދިފައެވެ. އޭގެ ތެރޭގައި؛
– ފާމަސީއަކީ ބޭސް ވިއްކުމުގެ ހުއްދަ އޮތް ފާމަސީއެއްކަން ކަށަވަރުކުރުމަށްޓަކައި ބޭސް ވިއްކުމުގެ ހުއްދަ ފާމަސީގައި ހަރުކޮށްފައިވޭތޯ ބެލުން
– ބޭސް ދޫކުރަނީ ހުއްދަ އޮތް މީހެއްކަން ކަށަވަރުކުރަން އެމްއެފްޑީއޭއިން ދޫކޮށްފައިވާ ފާމަސިސްޓު އައިޑީކާޑު އަޅާފައިވޭތޯ ބެލުން
– މުއްދަތު ހަމަނުވާ ބޭސް ނެގިތޯ ކަށަވަރުކުރަން ބޭހުގައި ބަޔާންކޮށްފައިވާ މުއްދަތު ހަމަވާ ތާރީހު ބެލުން
– ބޭސް ބޭނުންކުރަން ވީ ގޮތުގެ އިރުޝާދު ރަނގަޅަށް ކިޔައި ސާފުކޮށް ލިޔެފައިވޭތޯ ބެލުން
– ބޭސް ޕެކްކޮށްފައި ހުރީ ރަނގަޅަށްތޯ ބެލުން
އެކަމާ ގުޅޭ އިތުރު މައުލޫމާތު ހޯދަން އެމްއެފްޑީއޭގެ ހޮޓްލައިން 7200321 އަށް ގުޅުމަށް ވަނީ އެދިފައެވެ.
