ދިވެހިރާއްޖޭގެ އާންމު ޞިއްޙަތުގެ ނިޒާމު ހަރުދަނާކުރުމަށް ކުރެވެމުންދާ މަސައްކަތްތަކުގެ ތެރެއިން، ފީލްޑް އެޕިޑިމިއޮލޮޖީ ޓްރެއިނިންގ ޕްރޮގްރާމް (އެފް.އީ.ޓީ.ޕީ) ފްރަންޓްލައިން ލެވެލްގެ ފުރަތަމަ ބެޗްގެ ތަމްރީންތައް ކާމިޔާބުކަމާއެކު ނިންމާލައިފިއެވެ.
މި ޕްރޮގްރާމްގެ ފަހު މަސައްކަތު ބައްދަލުވުން ފެބްރުއަރީ 10 އިން 12 އަށް މާލޭގައި ބާއްވާފައިވާއިރު، މިއީ ރާއްޖޭގެ އެކި ކަންކޮޅުތަކުގައި ބަލިތައް ދެނެގަތުމާއި ބަލިމަޑުކަމަށް އިޖާބަދިނުމުގެ ގާބިލުކަން އިތުރުކުރުމަށް އެޅުނު މުހިންމު ފިޔަވަޅެކެވެ.
ޖުމްލަ 4 މަސްދުވަހުގެ މުއްދަތަށް ކުރިއަށްގެންދިޔަ މި ތަމްރީން ޕްރޮގްރާމަކީ ތިއަރީ ބައިތަކާއި އަމަލީ މަސައްކަތްތައް ހިމެނޭ ގޮތަށް ފަރުމާކުރެވިފައިވާ ޕްރޮގްރާމެކެވެ. މި ޕްރޮގްރާމްގެ ތެރޭގައި 3 މަސައްކަތު ބައްދަލުވުމެއް ބޭއްވުނެވެ. ފުރަތަމަ ބައްދަލުވުން 2024 އޮކްޓޫބަރުގައި ފެށިއިރު، ދެވަނަ ބައްދަލުވުން ބާއްވާފައިވަނީ އެ އަހަރުގެ ޑިސެމްބަރު މަހުގައެވެ. މި ޕްރޮގްރާމްގައި ރާއްޖޭގެ 16 އަތޮޅަކުން ޞިއްޙީ ދާއިރާގެ ފަންނީ ބޭފުޅުން ބައިވެރިވެ، ފީލްޑް މަސައްކަތްތަކުގެ ތެރެއިން ގިނަ ތަޖުރިބާތަކެއް ހާސިލުކޮށްފައިވެއެވެ.
މި ތަމްރީން ޕްރޮގްރާމަކީ ދުނިޔޭގެ ސިއްހަތު ޖަމްއިއްޔާ (ޑަބްލިއު.އެޗް.އޯ) އާއި ޕެންޑަމިކް ފަންޑްގެ ދީލަތި އެހީގައި ހެލްތު ޕްރޮޓެކްޝަން އެޖެންސީ (އެޗް.ޕީ.އޭ) އިން އިންތިޒާމުކޮށްގެން ކުރިއަށްގެންދިޔަ ހަރަކާތެކެވެ. މި ޕްރޮގްރާމްގެ މައިގަނޑު މަޤްސަދަކީ އާންމު ޞިއްޙަތުގެ ދާއިރާގައި މަސައްކަތްކުރާ ފަރާތްތަކަށް ފީލްޑް އެޕިޑިމިއޮލޮޖީގެ އަމަލީ ތަމްރީނުތައް ފޯރުކޮށްދިނުމެވެ. މީގެ ސަބަބުން، އާންމު ޞިއްޙަތާ ގުޅުންހުރި ކުއްލި ހާލަތްތަކުގައި އަވަސް އަދި ހަރުދަނާ އިޖާބައެއް ދިނުމުގެ ފަންނީ ގާބިލުކަން މުވައްޒަފުންގެ ކިބައިގައި އަށަގަންނުވައިދެއެވެ.
މި ތަމްރީނުގެ ތެރެއިން ބައިވެރިންނަށް މައިގަނޑު ގޮތެއްގައި ދަސްކޮށްދެވުނީ ބަލިމަޑުކަމެއް ފެތުރެން ފަށާ ހާލަތްތަކުގައި އެކަން އަވަހަށް ދެނެގަންނާނެ ގޮތްތަކާއި، ބަލިތައް މޮނިޓަރކޮށް ބެލެހެއްޓުމުގެ އުކުޅުތަކެވެ. މީގެ އިތުރުން، އާންމު ޞިއްޙަތަށް ކުރިމަތިވާ ނުރައްކާތައް ދެނެގަނެ، އެކަންކަމުން ރައްކާތެރިވުމަށް އެޅޭނެ ފިޔަވަޅުތަކާއި، ބަލި ފެތުރޭ މިންވަރު ދަށްކުރުމަށް ކުރެވިދާނެ ސައިންޓިފިކް މަސައްކަތްތަކަށް މި ޕްރޮގްރާމްގައި ބޮޑު އިސްކަމެއް ދީފައިވެއެވެ.
މިފަދަ ރޭވުންތެރި ތަމްރީނުތަކެއްގެ ސަބަބުން ގައުމީ ފެންވަރުގައި ޞިއްޙީ ތައްޔާރީތައް އިތުރަށް ވަރުގަދަވެގެންދާނެއެވެ. ޚާއްޞަކޮށް އަތޮޅުތަކުގައި މަސައްކަތްކުރާ ފަންނީ ބޭފުޅުންނަށް މިފަދަ ތަމްރީނެއް ލިބުމަކީ، ރާއްޖޭގެ ކޮންމެ ސަރަޙައްދެއްގައިވެސް ބަލިމަޑުކަމެއް ފެށޭ ހިނދު، އެކަމަށް ވަގުތުން އިޖާބަދިނުމުގެ ފުރުޞަތު ފަހިވެގެންދާނެ ކަމެކެވެ. މިއީ މުޅި ރާއްޖޭގެ އާންމު ޞިއްޙަތު ރައްކާތެރިކުރުމުގެ ނިޒާމު އިތުރު ހަރުފަތަކަށް ގެންގޮސްދޭނެ މުހިންމު މަސައްކަތެކެވެ.
ފީލްޑް އެޕިޑިމިއޮލޮޖީ ޓްރެއިނިންގ ޕްރޮގްރާމްގެ ފުރަތަމަ ބެޗް ނިމިގެންދިއުމަކީ ރާއްޖޭގެ ޞިއްޙީ ދާއިރާއަށް ލިބުނު ފަޚުރެކެވެ. މި ތަމްރީނު ފުރިހަމަކުރި ބައިވެރިންގެ ސަބަބުން، ކުރިމަތީގައި ހުރި ޞިއްޙީ ގޮންޖެހުންތަކާ ކުރިމަތިލުމުގެ ގާބިލުކަން އިތުރުވެ، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކުރެވޭ މަސައްކަތްތަކަށް އައު ދިރުމެއް ލިބިގެންދާނެއެވެ.
