މަސައްކަތް ބުރަކޮށް އުޅުމަކީ މޮޅު ކަމެއްގެ ގޮތުގައި ދުނިޔެ ގަބޫލުކުރާ މި ޒަމާނުގައި، އަރާމުކުރުމަކީ ގިނަ ފަހަރަށް ކަންނެތްކަމެއްގެ ގޮތުގައި ނުބައިކޮށް މާނަކުރެވެއެވެ.
ގިނަ ވަގުތު ނިދުމާއި، މަސައްކަތުގެ ދޭތެރެއިން ބްރޭކް ނެގުމަކީ ވަގުތު ބޭކާރުކުރުން ކަމަށް ބައެއް މީހުން ދެކުނު ނަމަވެސް، ސައިންޓިފިކް ދިރާސާތަކުން ދައްކާ ގޮތުގައި އަރާމުކުރުމަކީ ބަލިކަށިކަމެއް ނޫނެވެ. އެއީ އިންސާނާގެ ދިރިހުރުމަށްޓަކައި ކޮންމެހެން ބޭނުންތެރި ޒަރޫރީ ކަމެކެވެ.
ދުނިޔޭގެ ޞިއްޙަތު ޖަމްޢިއްޔާ (WHO) އިން މިހާރު ވަނީ ’ބާންއައުޓް‘ (Burnout) ނުވަތަ މަސައްކަތުގެ ސަބަބުން މާބޮޑަށް ވަރުބަލިވުމަކީ، ވަޒީފާގެ މާހައުލުގައި ދިމާވާ ދިގުދެމިގެންދާ ސްޓްރެސް މެނޭޖް ނުކުރެވުމުގެ ސަބަބުން ދިމާވާ ސީރިއަސް މައްސަލައެއްގެ ގޮތުގައި ކަނޑައަޅާފައެވެ. މާބޮޑަށް ވަރުބަލިވުމާއި، މަސައްކަތުގެ ފެންވަރު ދަށްވުމަކީ ކަންނެތްކަމުގެ ނިޝާނެއް ނޫނެވެ. އެއީ އިންސާނާގެ ކެތްތެރިކަމުގެ ހައްދަށްވުރެ ބޮޑަށް ހަށިގަނޑަށް ބާރުބޮޑުވަމުންދާކަމުގެ އިންޒާރެކެވެ.
ހާވަޑް މެޑިކަލް ސްކޫލުން ކުރި ދިރާސާތަކުން ދައްކާ ގޮތުގައި، ނިދުމާއި ސިކުނޑިއަށް އަރާމު ދިނުމަކީ ހަނދާންތައް ވަރުގަދަކުރުމަށާއި، ޖަޒުބާތުތައް ކޮންޓްރޯލްކުރުމަށް އެހީތެރިވެދޭ ކަމެކެވެ. އެކަށީގެންވާ އަރާމު ނުލިބޭނަމަ، ކަންކަމުގައި ގޮތް ނިންމުމަށާއި ސަމާލުކަން ދިނުމަށް ސިކުނޑި ނުކުޅެދެއެވެ. މީގެ އިތުރުން، ދިގު މުއްދަތަށް އަރާމު ނުލިބި ހުރުމަކީ ހާސްކަމާއި (Anxiety)، ނަފްސާނީ ބަލިތަކުގެ އިތުރުން ހިތުގެ ބަލިތަކަށް މަގުފަހިވާ ކަމެއްކަން ސައިންސްވެރިން ފާހަގަކުރެއެވެ.
ކާމިޔާބު މީހުންނަކީ އަބަދު މަސައްކަތުގައި އުޅޭ މީހުން ކަމަށް ބެލެވުނު ނަމަވެސް، އެމެރިކަން ފްސައިކޮލޮޖިކަލް އެސޯސިއޭޝަނުން ބުނާ ގޮތުގައި، މެދުކެނޑުމެއް ނެތި މަސައްކަތް ކުރުމަކީ އުފެއްދުންތެރިކަން ދަށްވާ ކަމެކެވެ. އޭގެ ބަދަލުގައި، ކުރު ބްރޭކްތައް ނަގައި، ރަނގަޅަށް އަރާމުކުރާ މީހުންގެ މަސައްކަތުގެ ފެންވަރު މާ ރަނގަޅެވެ.
ނަފްސާނީ ދާއިރާގަ މަސައްކަތްކުރާ މާހިރުން ފާހަގަކުރާ ގޮތުގައި އަރާމުކުރުމަކީ ހަމައެކަނި ނިދުމެއް ނޫނެވެ. އޭގެ ތެރޭގައި ފޯނާއި ސޯޝަލް މީޑިއާއާ ދުރުވެލުމާއި، ހިމޭންކޮށް ވަގުތު ހޭދަކުރުން ހިމެނެއެވެ. މިއީ ޚާއްޞަކޮށް ކިޔަވާ ކުދިންނާއި ޒުވާނުންނަށް ވަރަށް މުހިންމު ކަމެކެވެ.
އަރާމުކުރުމަކީ ކުށްވެރިވާންޖެހޭ ކަމެއް ނޫނެވެ. އަދި އެއީ ހަމައެކަނި ވަރުބަލިވެގެން ހަށިގަނޑު ހުއްޓުމުން ކުރަންޖެހޭ ކަމެއްވެސް ނޫނެވެ. އެއީ ދުޅަހެޔޮ ޞިއްޙަތެއްގައި ހުރުމަށްޓަކައި ކުރަންޖެހޭ ކަމެކެވެ. ސައިންސްގެ ހެކިތަކުން ސާފުވާ ގޮތުގައި އިންސާނުން އަރާމުކުރުމަކީ ނަފްސާނީ އަދި ޖިސްމާނީ ދުޅަހެޔޮކަމަށްޓަކައި ކޮންމެހެން ކުރަންޖެހޭ އަމިއްލަ ރައްކާތެރިކަމުގެ އަމަލެކެވެ.
