ސަރުކާރާއި އިދިކޮޅު ނުވަތަ އިދިކީލި ކައުންސިލެއް އޮންނަނަމަ، ރިޔާސީ އިންތިޚާބުގައި ރައްޔިތުން ބޭނުންވި ކަންކަން ކޮށްދިނުމަށާއި ސަރުކާރުގެ ވައުދުތައް ފުއްދުމަށް ބޮޑެތި ދަތިތަކެއް ކުރިމަތިވާނެ ކަމަށް މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން ޢަބްދުﷲ ރާފިއު ވިދާޅުވެއްޖެއެވެ.
ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ގަލޮޅު ދެކުނު ކެމްޕެއިން ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ ރާފިއު ވިދާޅުވީ، ކަންކަން ކުރުމަށްޓަކައި ރައްޔިތުން ބަޔަކު އިންތިޚާބު ކުރަނީ ވަކި ސިޔާސަތުތަކެއް ކަމުދާތީ ނުވަތަ އެމީހަކު ކަންކަން ކޮށްދޭނެ ކަމުގެ އިތުބާރު އޮތުމުން ކަމަށެވެ. އަދި ދިވެހި ރައްޔިތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް އައްޔަނު ކުރީ އެމަނިކުފާނުގެ ސިޔާސަތުތަކާއި ވައުދުތައް ފުއްދަވައިދޭނެ ކަމުގެ އުންމީދުގައި ކަމަށްވެސް މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ ރައީސް އިންތިޚާބު ވުމަށްފަހު، އެމަނިކުފާނުގެ މަސައްކަތްޕުޅުތަކަށް ހުރަސްއެޅުމަކީ ކަންކަން ކުރަންޖެހޭނެ ގޮތް ނޫން ކަމަށެވެ.
”އަޅުގަނޑުގެ ސުވާލަކީ އެކަންކަން ކުރުމަށްޓަކައި އަޅުގަނޑުމެންގެ މުވައްސަސާތަކުން އަޅުގަނޑުމެންނަށް އެކަން ކުރުމަށް މަގުފަހި ނުވާގޮތަށް ކަންކަން ބައްޓަމް ކޮށްފިއްޔާ އޭރު އަޅުގަނޑުމެން ބޭނުންވި ކަންކަން ހާސިލް ކުރެވޭނެ ތޯ؟ އެ ސުވާލު އަޅުގަނޑު މި ކުރީ. ހަމަ ޔަގީނުންވެސް ވަރަށް ދަތިވާނެ،“ ރާފިއު ވިދާޅުވިއެވެ.
މިނިސްޓަރ އިތުރަށް ފާހަގަކުރެއްވި ގޮތުގައި ކަންކަން ފުރިހަމައަށް ކުރެވޭނީ ކަންކަން ކޮށްދޭން ބޭނުންވާ މީހުންނާއެކު މަސައްކަތް ކުރާނެ ރަނގަޅު ޓީމެއް އޮވެގެންނެވެ. އެހެންކަމުން، ސަރުކާރުގެ ވައުދުތައް ހަލުވިކަމާއެކު ކުރިއަށް ގެންދިއުމަށްޓަކައި ޕީއެންސީގެ ކެންޑިޑޭޓުން އިންތިޚާބު ކުރަންޖެހޭ ކަމަށް އެމަނިކުފާނު ވިދާޅުވިއެވެ.
މިނިސްޓަރ ރާފިއު ވިދާޅުވީ މިހާރުވެސް ރައީސް ގެންދަވަނީ އެމަނިކުފާނުގެ ވައުދުފުޅުތައް ތަންފީޒު ކުރައްވަމުން ކަމަށާއި، ނަމަވެސް ސަރުކާރާ ދެކޮޅު ކައުންސިލެއް އޮތުމަކީ ރައްޔިތުން އެދޭ ތަރައްޤީއަށް އޮތް ހުރަހަކަށް ވެދާނެ ކަމަށެވެ.
