ސަރުކާރަށް ބޭނުންވާ ފަންނީ ލަފަޔާއި މަޝްވަރާ ދިނުމަށްޓަކައި އެކުލަވާލުމަށް ނިންމާފައިވާ ތިން ކޮމިޓީއެއްގެ މެންބަރުކަމަށް ކުރިމަތިލުމުގެ ފުރުޞަތު ރައީސުލްޖުމްހޫރިއްޔާގެ އޮފީހުން މިއަދު އަލުން ހުޅުވާލައިފިއެވެ. މި ފުރުޞަތު ހުޅުވާލާފައިވަނީ ރާއްޖޭގެ އިޤްތިޞާދީ މުހިންމު ތިން ސިނާއަތެއް ކުރިއެރުވުމަށް ބޭނުންވާ ފަންނީ ލަފާ ހޯދުމުގެ މަޤްޞަދުގައެވެ.
ސަރުކާރުން އެކުލަވާލުމަށް ހަމަޖެހިފައިވާ ތިން ކޮމިޓީއަކީ ފަތުރުވެރިކަމުގެ ސިނާއަތް ދެމެހެއްޓެނެވި ގޮތެއްގައި ތަރައްޤީކުރުމަށް އެކުލަވާލާ ”ޓޫރިޒަމް ސެކްޓަރ އެޑްވައިޒަރީ ކޮމިޓީ“ އާއި، އިމާރާތްކުރުމުގެ ދާއިރާ ކުރިއެރުވުމަށް އެކުލަވާލާ ”ކޮންސްޓްރަކްޝަން ސެކްޓަރ އެޑްވައިޒަރީ ކޮމިޓީ“ ގެ އިތުރުން މަސްވެރިކަމާއި މެރިކަލްޗަރގެ ސިނާއަތަށް ޚާއްޞަ ”ފިޝަރީޒް ސެކްޓަރ އެޑްވައިޒަރީ ކޮމިޓީ“ އެވެ.
މި ކޮމިޓީތަކުގެ މެންބަރުކަމަށް ކުރިމަތިލުމަށް ޝައުޤުވެރިވާ ފަރާތްތަކަށް އިތުރު ފުރުޞަތު ދިނުމުގެ ގޮތުން، މިއަދުން ފެށިގެން 3 މާރިޗް 2026 ވާ އަންގާރަ ދުވަހުގެ މެންދުރު 12:00 އާ ހަމައަށް ވަނީ މުއްދަތު އިތުރުކޮށްދީފައެވެ.
މެންބަރުކަމަށް އެދި ހުށަހަޅާ ފޯމުތައް ބަލައިގަތުމަށް ހަމަޖެހިފައިވަނީ ރަސްމީ ބަންދުދުވަސްތައް ފިޔަވައި، އެހެން ދުވަސްދުވަހުގެ ހެނދުނު 08:30 އިން މެންދުރު 12:00 އާ ދެމެދުގައެވެ. ފޯމު ހުށަހެޅޭނީ ރައީސުލްޖުމްހޫރިއްޔާގެ އޮފީހުގެ އީމެއިލް info@po.gov.mv މެދުވެރިކޮށް ނުވަތަ އެ އޮފީހުގެ ރިސެޕްޝަން ކައުންޓަރަށެވެ.
ކޮމިޓީތަކަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުގެ ރިސެޕްޝަނުން ލިބެން ހުންނާނެއެވެ. މީގެ އިތުރުން، އެ އޮފީހުގެ ރަސްމީ ވެބްސައިޓުންވެސް ފޯމު ޑައުންލޯޑު ކުރެއްވޭނެ އިންތިޒާމު ވަނީ ހަމަޖައްސާފައެވެ.
