ނ. އަތޮޅު ކައުންސިލަށް ލިބެންޖެހޭ ދެ މިލިއަނަށް ވުރެ ގިނަ ރުފިޔާ ނުލިބި ހުރި އިރު، އޭގެ ތެރޭގައި ކައުންސިލްގެ ރައީސް މުހައްމަދު ބަޝީރު ދައްކަވަންޖެހޭ އެއްލައްކައަށް ވުރެ ގިނަ ރުފިޔާ ހިމެނޭކަމަށް އޮޑިޓަރ ޖެނެރަލްގެ އޮފީހުގެ އޮފީހުގެ އޮޑިޓު ރިޕޯޓުން ދައްކައިފި އެވެ.
އޮޑިޓަރ ޖެނެރަލް ނެރުއްވި ރިޕޯޓުގައި ވަނީ ދައުލަތުގެ މާލިއްޔަތު ގަވާއިދުގެ 5.21 ވަނަ މާއްދާގެ (ހ) އަދި 5.26 ވަނަ މާއްދާގައި ލިބެންޖެހޭ ފައިސާ ހޯދުމަށް އަޅަންޖެހޭ ފިޔަވަޅުތައް ވަރަށް ތަފްސީލުކޮށް ބަޔާން ކުރާކަމަށެވެ. އެގޮތުން ފައިސާ ދެއްކުމަށް ކަނޑައެޅިފައިވާ މުއްދަތުގައި ފައިސާ ނުދައްކައިފިނަމަ، 7 ދުވަހުގެ ތެރޭގައި ދެ ފަހަރު ލިޔުމުން ހަނދާންކޮށްދިނުމަށާއި، އެ މުއްދަތުގައި ފައިސާ ނުދައްކައިފިނަމަ ޝަރީއަތަށް ހުށަހަޅައިގެން ފައިސާ ހޯދުމަށް މަސައްކަތް ކުރަންޖެހޭއިރު ނ. އަތޮޅު ކައުންސިލުން މި ގަވާއިދާ އެއްގޮތަށް އަމަލުކޮށްފައި ނުވާކަން އޮޑިޓުން ވަނީ ފާހަގަކޮށްފައެވެ.
އޮޑިޓް ރިޕޯޓުގައިވާ ގޮތުން، ކައުންސިލްގެ ރައީސް މުހައްމަދު ބަޝީރު ދައްކަން ޖެހޭ ޖުމްލަ 118,220 ރުފިޔާ އެބައޮތެވެ. މީގެ ތެރޭގައި ހިމެނެނީ ސްޓޭޓް ހައުސްގެ ކުލީގެ ގޮތުގައި ދައްކަންޖެހޭ 89,820 ރުފިޔާ އާއި، ލޯންޗު ދަތުރުތަކަށް ދައްކަންޖެހޭ 28,400 ރުފިޔާއެވެ. ލޯންޗު ދަތުރުތަކުގެ ތެރޭގައި ކެންޕެއިން ހަރަކާތްތަކަށް ކުރައްވާފައިވާ ދަތުރުތައް ހިމެނޭކަން ވެސް އޮޑިޓުން އެނގެ އެވެ.
މީގެ އިތުރުން، 2000 ވަނަ އަހަރުން ފެށިގެން 2009 އާ ހަމައަށް އަތޮޅު ރައްޔިތުންގެ ފަންޑުންނާއި ސުނާމީ ފަންޑުން އާންމު ރައްޔިތުންނަށް ދޫކޮށްފައިވާ ލޯނުތަކުގެ ތެރެއިން ޖުމްލަ 574,761 ރުފިޔާ ވަނީ ނުލިބި އެވެ. މި ފައިސާ ހޯދުމަށް 2014 ވަނަ އަހަރު ސިޓީއެއް ފޮނުވުން ފިޔަވައި، 2024 ސެޕްޓެމްބަރުގެ ނިޔަލަށް އިތުރު އެއްވެސް މަސައްކަތެއް ކައުންސިލުން ކޮށްފައި ނުވާކަން ރިޕޯޓުގައި ވަނީ ފާހަގަކޮށްފަ އެވެ.
މިއާއި އެކު އޮޓިގައި ބުނީ އެސްޓީއޯ އަށް ބޭސް ވިއްކި މުއާމަލާތަކާ ގުޅިގެން ލިބެންޖެހޭ 55,618 ރުފިޔާ ވެސް 12 ޑިސެންބަރު 2024 ގެ ނިޔަލަށް ލިބިފައި ނުވާއިރު، އެ ފައިސާ ހޯދުމަށްވެސް ގަވާއިދާ އެއްގޮތަށް ފިޔަވަޅު އަޅާފައި ނެތް ކަމަށެވެ. އަދި ކައުންސިލްގެ އިދާރާގެ 2 ބުރީގެ ހޯލު އިމާރާތް ކުރުމުގެ އެއްބަސްވުން ބާތިލުކުރުމާ ގުޅިގެން، އެޑްވާންސް ފައިސާގެ ގޮތުގައި އަނބުރާ ލިބެންޖެހޭ 419,537 ރުފިޔާ އާއި، ޕާފޯމަންސް ގެރެންޓީގެ ގޮތުގައި ލިބެންޖެހޭ 224,079 ރުފިޔާ ހޯދުމަށް 2023 ވަނަ އަހަރު ސިވިލް ކޯޓަށް ހުށަހެޅި ނަމަވެސް، 2024 އޮކްޓޫބަރުގެ ނިޔަލަށް އެ ފައިސާ ވެސް ލިބިފައި ނުވާކަން އޮޑިޓުގައި ވަނީ ބުނެފަ އެވެ.
އޮޑިޓް ރިޕޯޓުގައި އިތުރަށް ބުނެފައި ވަނީ، ދައުލަތުގެ މާލިއްޔަތު ގަވާއިދުގެ ދަށުން ދައުލަތުގެ އިދާރާތަކަށް ލިބެންޖެހޭ އާމްދަނީއާއި ފައިސާގެ ތަފްސީލު ތައްޔާރުކޮށް، އެފަދަ ފައިސާއެއް ލިބެންޖެހޭ ދުވަހުން ފެށިގެން ލަސްވެގެން އެއް މަސްދުވަހުގެ ތެރޭގައި އެ ފައިސާ ހޯދަން ޖެހޭކަމަށެވެ. އެހެން ނަމަވެސް، 2023 ވަނަ އަހަރުގެ ނިޔަލަށް ނ. އަތޮޅު ކައުންސިލަށް ލިބެންޖެހޭ ފައިސާގެ ގޮތުގައި ޖުމުލަ 2,234,119 ރުފިޔާ އޮތްކަން އޮޑިޓަށް ވަނީ ފާހަގަކުރެވިފައެވެ. މީގެ ތެރެއިން ކައުންސިލްގެ ދަފްތަރުގައި ރިކޯޑުކޮށްފައިވަނީ 960,124 ރުފިޔާ ކަމަށްވީ ނަމަވެސް، އިތުރު 1,273,995 ރުފިޔާ ލިބެންޖެހޭކަން ލިޔެކިޔުންތަކުން އެނގެން އޮތް ކަމަށް އޮޑިޓްގައިވެއެވެ.
އޮޑިޓަރ ޖެނެރަލްގެ އޮފީހުން ފާހަގަކުރި ގޮތުގައި، މާލިއްޔަތު ގަވާއިދުގައި ފައިސާ ހޯދުމަށްޓަކައި ލިޔުމުން އެންގުމާއި، އެންގުމާ އެއްގޮތަށް ފައިސާ ނުދައްކައިފިނަމަ ޝަރީޢަތަށް މައްސަލަ ހުށަހަޅައިގެން ފައިސާ ހޯދުމަށް ބަޔާންކޮށްފައި އޮތް ނަމަވެސް، ކައުންސިލުން ގިނަ މައްސަލަތަކުގައި މިފަދަ ފިޔަވަޅުތައް އަޅާފައެއް ނުވެއެވެ. މީގެ ސަބަބުން ދައުލަތަށް ލިބެންޖެހޭ ގިނަ އަދަދެއްގެ ފައިސާ ނުލިބި ދިގުލައިގެން ގޮސްފައިވާކަން އެ އޮފީހުން ވަނީ ކަންބޮޑުވުމާއެކު ފާހަގަކޮށްފައެވެ.
