ސްރީލަންކާ އެކްސްޕޯގައި ބައިވެރިވާން ދިވެހި ވިޔަފާރިތަކަށް އިކޮނޮމިކް މިނިސްޓްރީން ފުރުސަތު ހުޅުވާލައިފިއެވެ.
އިކޮނޮމިކް މިނިސްޓްރީން ކުރި އިއުލާނެއްގައި ވަނީ އަންނަ ޖޫން މަހުގެ 18 އިން 21 އަށް ބޭއްވުމަށް ހަމަޖެހިފައިވާ ސްރީލަންކާ އެކްސްޕޯގައި ބައިވެރިވާން ދިވެހި ވިޔަފާރިތަކަށް ފުރުސަތު ހުޅުވާލެވިފައިވާކަން ލަންކާ ސަރުކާރުން އަންގާފައިވާ ކަމަށެވެ.
ސްރީލަންކާ އެކްސްޕޯ މައުރަޒު ބާއްވަން ހަމަޖެހިފައި ވަނީ، ސްރީލަންކާގެ ކޮލޮމްބޯގައި ހުންނަ ބަންޑާރަނައިކަ މެމޯރިއަލް އިންޓަނޭޝަނަލް ކޮންފަރެންސް ހޯލުގައެވެ.
އިކޮނޮމިކް މިނިސްޓްރީން ބުނީ، ފަތުރުވެރިކަމާއި ދަނޑުވެރިކަމާއި ކާބޯތަކެއްޗާ ގުޅުން ހުރި ދާއިރާތައް މި އެކްސްޕޯގައި ހިމެނޭނެ ކަމަށެވެ.
މިގޮތުން، އެ މައުރަޒުގައި ރަޖިސްޓްރީކުރާ މީހުންނަށް ޚާއްސަ ޕެކޭޖުތަކެއް ލިބޭނެ ކަމަށް އެ މިނިސްޓްރީން ވަނީ ބުނެފައެވެ.
ލަންކާގައި އޮންނަ މައުރަޒެއްގައި ބައިވެރިވުމަށް ފުރުސަތު ހުޅުވާލިއިރު، ރާއްޖޭގައި ވެސް އުފެއްދުންތައް ދައްކާލުމަށް ތަފާތު މައުރަޒުތައް ބާއްވައެވެ.
