ސިނަމާލެ ބްރިޖު ކައިރިން ބާރު ސްޕީޑުގައި ދުއްވި ސައިކަލެއް ކޮންޓްރޯލް ނުވެގެން ރޭ ދަންވަރު ހިނގި ނުރައްކާތެރި އެކްސިޑެންޓެއްގައި، ސައިކަލުގެ ފަހަތުގައި އިން 16 އަހަރުގެ ކުއްޖަކު ނިޔާވެއްޖެއެވެ.
މި ހާދިސާ ހިނގާފައިވަނީ ރޭ ދަންވަރު 1:39 ހާއިރު ކަމަށް ފުލުހުން މައުލޫމާތު ދެއެވެ.
ފުލުހުން މިއަދު ހެނދުނު ބުނި ގޮތުގައި، މި އެކްސިޑެންޓު ހިނގީ ސިނަމާލެ ބްރިޖު ލައިޓު ކައިރިން ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލް ނުވެ، މަގުގެ ޕޭވްމަންޓަށް އަރައިގެންނެވެ. މި ހާދިސާގައި ސައިކަލުގައި ތިބި ދެ މީހުންނަށްވެސް އެކިވަރުގެ އަނިޔާވެގެން ހޮސްޕިޓަލަށް ގެންގޮސް ފަރުވާ ދީފައިވެއެވެ.
މި އެކްސިޑެންޓުވި ސައިކަލު ދުއްވަން އިނީ 19 އަހަރުގެ ދިވެހި ފިރިހެނެކެވެ. ފުލުހުން ހާމަކުރި ގޮތުގައި އޭނާގެ އަތުގައި އެ ކެޓަގަރީގެ އުޅަނދު ދުއްވުމުގެ ލައިސެންސެއް ނެތެވެ. ސައިކަލުގެ ފަހަތުގައި އިނީ ނިޔާވި 16 އަހަރުގެ ދިވެހި ފިރިހެން ކުއްޖާއެވެ.
ހޮސްޕިޓަލުގައި ފަރުވާ ދެމުން ދަނިކޮށް 16 އަހަރުގެ ކުއްޖާ ނިޔާވެފައިވާކަން ފުލުހުން ވަނީ ކަށަވަރުކޮށްދީފައެވެ. ނަމަވެސް ސައިކަލު ދުއްވަން އިން ޒުވާނާއަށް ލިބުނު އަނިޔާގެ ތަފްސީލެއް ފުލުހުން ހާމައެއް ނުކުރެއެވެ.
މިއީ ރޭގެ ވަގުތެއްގައި މާލޭގައި ހިނގި ނުރައްކާތެރި ދެވަނަ އެކްސިޑެންޓެވެ. މީގެ ކުރިން ރޭ 11:35 ހާއިރު އަމީނީމަގު، ބިލަބޮންގް ސްކޫލް ކައިރީގައިވެސް ނުރައްކާތެރި އެކްސިޑެންޓެއް ހިނގާފައިވެއެވެ. އެ ހާދިސާގައި ދެ މީހަކަށް އަނިޔާވެގެން މިހާރުވެސް ދަނީ ފަރުވާ ދެމުންނެވެ.
ފުލުހުން ދަނީ ބްރިޖު ކައިރީގައި ހިނގި މި އެކްސިޑެންޓާ ގުޅިގެން ބަލަންޖެހޭ އިތުރު ކަންކަން ތަހުގީގު ކުރަމުންނެވެ.
