މަސްތުވާތަކެތި ޓްރެފިކްކުރުމުގެ ދައުވާ ސާބިތުވެ، ޏ. ފުވައްމުލައް / ދޫޑިގަން. ގަސްދޮށުގެ، ޢަބްދުލްބާސިޠު (28އ) 75 އަހަރަށް ޖަލަށް ލުމަށާއި 3 ލައްކަ ރުފިޔާއިން ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފިއެވެ.
ޢަބްދުލްބާސިޠު ހައްޔަރުކޮށްފައިވަނީ ފުވައްމުލައް ސިޓީއަށް މަސްތުވާތަކެތި އެތެރެކޮށް، އެ ތަކެތި ވިއްކައި ވިޔަފާރިކޮށް، އެކަމުން ހޯދާ ފައިސާއިން މަނީލޯންޑަރކުރާ ނެޓްވޯކްތަކާ ދެކޮޅަށް 2024 ވަނަ އަހަރު ފުލުހުން ފަށާފައިވާ ހާއްސަ އޮޕަރޭޝަންގެ ތެރެއިންނެވެ.
އޭނާ ހައްޔަރުކޮށްފައިވަނީ 27 އޭޕްރީލް 2024 ގައެވެ. ފުލުހުން ބުނި ގޮތުގައި އޭނާ ދިރިއުޅޭ ގެ ބަލައިފާސްކުރިއިރު ގިނަ އަދަދެއްގެ މަސްތުވާތަކެތި ވަނީ ފެނިފައެވެ. މި މައްސަލައިގެ ތަހުގީގު ނިންމައި ދައުވާކުރުމަށް ޕީޖީ އޮފީހަށް ފޮނުވާފައިވަނީ 11 ޖޫން 2024 ގައެވެ.
މި އޮޕަރޭޝަނުގެ ތެރެއިން ފުވައްމުލައް ސިޓީގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ ދެ ނެޓްވޯކެއްގެ އިސްފަރާތްތަކާއެކު ޖުމްލަ 174 މީހަކު ފުލުހުންގެ ބެލުމުގެ ދަށަށް ގެނެސްފައިވެއެވެ. މި މީހުންގެ މައްޗަށް 188 މައްސަލައެއް ތަހުގީގުކޮށް، އޭގެ ތެރެއިން 78 މައްސަލައެއްގައި ދައުވާކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ވަނީ ހުށަހަޅާފައެވެ.
ފުލުހުންގެ ތަހުގީގަށް ހާމަވެފައިވާ ގޮތުގައި، ޢަބްދުލްބާސިޠުގެ ނަމުގައި ބޭންކުތަކުގައި ހުޅުވާފައިވާ އެކައުންޓުތަކަށް އެކި ފަރާތްތަކުން ތިން މިލިއަނަށް ވުރެ ގިނަ ރުފިޔާއާއި، 19،000 އަށް ވުރެ ގިނަ އެމެރިކާ ޑޮލަރު ޖަމާކޮށްފައިވެއެވެ. މި ފައިސާއަކީ މަސްތުވާތަކެތީގެ ވިޔަފާރިކޮށްގެން ހޯދާފައިވާ ފައިސާކަން ތަހުގީގަށް ވަނީ ކަށަވަރުވެފައެވެ.
ފުލުހުންގެ ޚިދުމަތުން ހާމަކުރި ގޮތުގައި، ސްޓްރެޓީޖިކް ޕޮލިސިންގ ރިކުއާމަންޓްގެ ދަށުން މަސްތުވާތަކެއްޗާ ދެކޮޅަށް ކުރާ މަސައްކަތުގައި މިއީ ލިބުނު ވަރަށް ބޮޑު ކުރިއެރުމެކެވެ. މި ހުކުމަކީ މަސްތުވާތަކެތީގެ ނެޓްވޯކްތައް ރޫޅާލުމަށް ފުލުހުން ކުރަމުންދާ މަސައްކަތަށް ލިބުނު ކާމިޔާބީއެއްގެ ގޮތުގައި ފުލުހުން ސިފަކުރެއެވެ.
