ތިމާވެށި ރައްކާތެރިކުރުމަށް އިސްކަންދޭ، ތަރައްގީވަމުން އަންނަ ކުދި ޖަޒީރާ ގައުމެއްގެ ހައިސިއްޔަތުން، ވައިގެ ކޮލިޓީ ރަނގަޅު ކުރުމަށް ބޭރުގެ ފަރާތްތަކާއެކު ކުރާ މަސައްކަތްތައް ރާއްޖެއިން ކުރަމުންދާނެކަމަށް ފޮރިން މިނިސްޓްރީން ބުނެފި އެވެ.
ރާއްޖޭގެ ވައި ނުސާފުވެ، ކުރިމަތިވަމުންދާ ދުންފިނީގެ މައްސަލައަކީ އާންމު ސިއްހަތާއި، ތިމާވެށި އަދި އިގްތިސާދީ ދެމެހެއްޓެނިވިކަމާ ސީދާ ގުޅިފައިވާ ކަމަކަށްވާތީ، މި މައްސަލަ ހައްލުކުރުމަށް ސަރުކާރުން ގައުމީ ފެންވަރުގައި ބޮޑު އިސްކަމެއް ދޭކަމަށް ފޮރިން މިނިސްޓްރީގެ ބަޔާނުގައި ވެއެވެ.
މިނިސްޓްރީން އާންމު ކުރި ބަޔާނުގައި ވަނީ ދުންފިނީގެ ސަބަބުން އާންމުންގެ މެދުގައި ކަންބޮޑުވުންތައް އުފެދިފައިވާކަމަށެވެ. ބަޔާނުގައި ވަނީ ބޯޑަރުތައް ހުރަސްކޮށް އަންނަ ވައިގެ ތަޣައްޔަރުކަމަށް ގިނަ ވަގުތު ހުށަހެޅިފައި ހުރުމަކީ އާންމު ސިއްހަތަށާއި، އިޖުތިމާއީ ދުޅަހެޔޮކަމުގެ އިތުރުން، ފަތުރުވެރިކަމަށް ބަރޯސާވެފައިވާ ރާއްޖޭގެ އިގްތިސާދަށް އޮތް ބޮޑު ނުރައްކަލެއްކަމަށެވެ.
މި ހާލަތަކީ މައިގަނޑު ގޮތެއްގައި ދެކުނު އޭޝިއާ ސަރަހައްދުގެ ޖައްވަށް އަންނަ ބަދަލުތަކުގެ ނަތީޖާއަށްވާއިރު، މޫސުމީ ވައިގެ ދައުރުވުމާއި، ސަރަހައްދީ ގައުމުތަކުން ބޭރުކުރާ ވިހަ މާއްދާތަކުގެ ސަބަބުން ވައި ތަޣައްޔަރުކުރާ މާއްދާތައް އެއް ތަނުން އަނެއް ތަނަށް ދަތުރުކުރާކަމަށް ބަޔާނުގައި ވެއެވެ. އަދި ރާއްޖެ ޖިއޮގްރަފީ ގޮތުން އުފެދިފައިވާ ގޮތާއި، ކުޑަ ބިންކޮޅެއްގައި އާބާދީ ތޮއްޖެހިފައި އޮތުމުގެ ސަބަބުން، ބޭރު ގައުމުތަކުން އަންނަ މިފަދަ ތިމާވެށީގެ ނޭދެވޭ އަސަރުތައް ރާއްޖެއަށް ވަރަށް ބޮޑަށް ހުންނަކަން ވަނީ ފާހަގަކޮށްފަ އެވެ.
ފޮރިން މިނިސްޓްރީން ބުނެފައި ވަނީ، މިކަމަށް ދާއިމީ ހައްލެއް ހޯދުމަށްޓަކައި ސައިންޓިފިކް ގޮތުން ގުޅިގެން މަސައްކަތްކުރުމާއި، ތަފާސްހިސާބު ހިއްސާކުރުމުގެ އިތުރުން، ބައިނަލްއަގުވާމީ ފެންވަރުގައި ކުރެވޭ މަޝްވަރާތައް ހަރުދަނާކުރުމަށް ދަނީ މަސައްކަތް ކުރަމުން ކަމަށެވެ.
މީގެއިތުރުން ބަޔާނުގައި ވަނީ ދުންފިނީގެ ސަބަބުން ކުރިމަތިވާ ނޭދެވޭ އަސަރުތައް ކުޑަކޮށް، ވައިގެ ސާފުތާހިރުކަން ކަށަވަރުކުރުމަށްޓަކައި، ސަރަހައްދީ އަދި ބައިނަލްއަގުވާމީ ބައިވެރިންނާއެކު ދިގު މުއްދަތުގެ ހައްލުތައް ހޯދުމަށް ސަރުކާރުން ދެމިއޮންނާނެކަމަށެވެ. މިނިސްޓްރީން އިތުރަށް ބުނީ ތަރައްގީވަމުން އަންނަ ކުދި ޖަޒީރާ ގައުމެއްގެ ހައިސިއްޔަތުން، ތިމާވެށި ހިމާޔަތްކުރުމާއި ދެމެހެއްޓެނިވި ތަރައްގީ ކަށަވަރުކުރުމުގައި ރާއްޖެއިން އަބަދުވެސް ސާބިތުކަމާއެކު މަސައްކަތް ކުރާނެކަމަށެވެ.
