އަންނަ އެޕްރީލް 4 ގައި ބޭއްވުމަށް ހަމަޖެހިފައިވާ އިންތިހާބުތަކުގައި ވޯޓުގެ ސިއްރުކަން ގެއްލޭ ފަރާތްތަކަށް އަލުން ރަޖިސްޓްރީވުމުގެ ފުރުސަތު އިލެކްޝަންސް ކޮމިޝަނުން މިއަދު ހުޅުވާލައިފިއެވެ.
ކައުންސިލްތަކާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބާއި އެކު އެ ދުވަހު، ދެ އިންތިހާބު އެއްކޮށްލުމާއި ގުޅޭ ރައްޔިތުންގެ ފެންނަ ނުފެނަ ވޯޓުގެ ރިފެރެންޑަމް ނެގުމަށް ވަނީ ހަމަޖެހިފަ އެވެ.
އިލެކްޝަންސް ކޮމިޝަނުން އާންމު ކުރި މައުލޫމާތުގައި ވަނީ، މިހާރު ވޯޓުލުމަށް ރަޖިސްޓަރީކޮށްފައިވާ ފޮށީގެ ގޮތުން ވޯޓުގެ ސިއްރުކަން ގެއްލޭ މީހުންގެ މައުލޫމާތު ހިމެނޭ ލިސްޓެއް އާންމުކޮށްފައިވާނެ ކަމަށެވެ. އެހެންކަމުން، މި ލިސްޓުގައި ހިމެނޭ ފަރާތްތަކުން ވޯޓު ފޮށި ބެހެއްޓޭނެކަން ކަށަވަރުވެފައިވާ އެހެން ތަނަކަށް ރަޖިސްޓަރީ ކުރުމުގެ ފުރުސަތު 2026 ފެބުރުވަރީ 24 ވާ އަންގާރަ ދުވަހުގެ ރޭގަނޑު 08:00 އިން މާދަމާގެ މެންދުރުފަހު 1:30 ގެ ނިޔަލަށް ހުޅުވާލާކަމަށް ކޮމިޝަނުން ވަނީ ބުނެފަ އެވެ.
މި ލިސްޓު ދިވެހިސަރުކާރުގެ ގެޒެޓާއި، އިލެކްޝަންސް ކޮމިޝަނުގެ ވެބްސައިޓުގެ އިތުރުން، މާލެ ފިޔަވައި މީހުން ދިރިއުޅޭ ކޮންމެ ރަށެއް ނުވަތަ ސިޓީއެއްގެ ކައުންސިލް އިދާރާތަކުން ފެންނަން ހުންނާނެކަމަށް އީސީން ބުންޏެވެ. އަދި މި މުއްދަތުގެ ތެރޭގައި ރަޖިސްޓަރީވެފައިވާ ތަން ބަދަލުކުރެ ވޭނީ ހަމައެކަނި މި އިއުލާނުގައިވާ ލިސްޓުގައި ހިމެނޭ ފަރާތްތަކަށް އެކަނިކަން ވަނީ ފާހަގަކޮށްފަ އެވެ.
ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށް އެދި ހުށަހަޅާނީ އިލެކްޝަންސް ކޮމިޝަނުގެ ”ރީ-ރަޖިސްޓްރޭޝަން ޕޯޓަލް“ ނުވަތަ ”މައި ޕޯޓަލް“ މެދުވެރިކޮށް އޮންލައިންކޮށެވެ.
”ރީ-ރަޖިސްޓްރޭޝަން ޕޯޓަލް“ މެދުވެރިކޮށް ފޯމު ހުށަހަޅާއިރު، ރަޖިސްޓަރީވުމަށް އެދޭ މީހާގެ ވޯޓުލުމަށް ބޭނުންކުރެވޭ ކާކުކަން އަންގައިދޭ ރަސްމީ ލިޔުމެއްގެ ކޮޕީއާއި ފޮޓޯ އަޕްލޯޑު ކުރަންޖެހެ އެވެ. ކޮމިޝަނުން ބުނެފައި ވަނީ“މައި ޕޯޓަލް“’ މެދުވެރިކޮށް ހުށަހަޅާނަމަ، އެކަން ކުރެވޭނީ ވެރިފައިޑް އީފާސް އެކައުންޓެއް މެދުވެރިކޮށްކަމަށެވެ. އަދި މިގޮތަށް ހުށަހަޅާއިރު ފޮޓޯ ނުވަތަ އައިޑީ ކާޑުގެ ކޮޕީ ހުށަހަޅާކަށް ނުޖެހޭނެއެވެ.
އިލެކްޝަންސް ކޮމިޝަނުން އިތުރަށް ބުނެފައި ވަނީ، މި މުއްދަތުގެ ތެރޭގައި ވޯޓުލާން ރަޖިސްޓަރީވެފައިވާ ތަން ބަދަލު ނުކޮށްފިނަމަ، އެ ފަރާތްތަކަށް ވޯޓު ލެވޭނީ މިހާރު ވެސް ރަޖިސްޓަރީވެފައިވާ ތަނުގައި ކަމަށެވެ.
މިހާރު ރަޖިސްޓަރީވެފައިވާ ތަނުގެ މައުލޫމާތު ސާފުކުރުމަށްޓަކައި VR (space) ID Number ޖެއްސެވުމަށްފަހު 1414 އަށް އެސްއެމްއެސް ކޮށްގެން ނުވަތަ ކޮމިޝަނުގެ އޮންލައިން ރަޖިސްޓަރީ ޕޯޓަލް މެދުވެރިކޮށް ބަލާލެވޭނެ އެވެ. އިތުރު މައުލޫމާތު 1414 އަށް ގުޅައިގެން ނުވަތަ ނުވަތަ ކޮމިޝަނުގެ މައި އިދާރާއިން ލިބޭނެކަމަށް އީސީން ވަނީ ބުނެފަ އެވެ.
