ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ރައްޔިތުންގެ މަޖިލީހުން ނިންމާފައިވާ ނިންމުމާ ގުޅިގެން ކޯޓަށް މައްސަލަ ހުށަހެޅުމަކީ ބޭނުންތެރި ކަމެއް ނޫން ކަމަށާއި، އެކަމުން ކާމިޔާބީއެއް ނުލިބޭނެކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު މުހައްމަދު މުސްތަފާ ވިދާޅުވެއްޖެއެވެ.
މުސްތަފާ މިހެން ވިދާޅުވީ، ދެ އިންތިހާބު އެއްކޮށްލުމަށް ގާނޫނަށް ގެނައި ބަދަލާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނެރުއްވި ގަރާރު ބާތިލުކުރުމަށާއި، އެކަމާ ގުޅޭ ވޯޓު ހުއްޓުވުމުގެ ވަގުތީ އަމުރަކަށް އެދި އިދިކޮޅު އެމްޑީޕީން ކޯޓަށް މައްސަލަ ހުށަހަޅާފައިވާތީ އެވެ.
މައްސަލައިގައި ސަންގުޓީވީގެ ”ޚަބަރަށްފަހު“ ޕްރޮގްރާމްގައި މުސްތަފާ ވިދާޅުވީ، ދިވެހިރާއްޖޭގެ ދުސްތޫރީ ނިޒާމު ބައްޓަން ކުރެވިފައިވާ ގޮތުން، ރައްޔިތުންގެ މަޖިލީހުން ސާފު އަޣުލަބިއްޔަތުން ނިންމާފައިވާ ނިންމުމެއް ބަދަލުކުރުމަށް ކޯޓަށް ދިއުމުގެ ގާނޫނީ ބޭނުމެއް ނެތް ކަމަށެވެ. މުސްތަފާ ވިދާޅުވީ އިސްލާމްދީނާ ހިލާފުނުވާ ކޮންމެ ބިލެއް ހުށަހަޅައި ގާނޫނުހަދާ މަޖިލީހަށް ފާސްކުރެވޭނެ ކަމަށެވެ.
ދެ އިންތިހާބު އެއްކޮށްލުމުން ދައުލަތުގެ ބަޖެޓުން ގާތްގަނޑަކަށް 120 މިލިއަނާއި 180 މިލިއަން ރުފިޔާއާ ދެމެދުގެ އަދަދެއް ސަލާމަތްކުރެވޭނެކަން ފާހަގަކުރައްވައި މުސްތަފާ ވިދާޅުވީ، މިއީ މީގެ ކުރިން އެމްޑީޕީ ވެސް ގެންގުޅުނު ވިސްނުމެއް ކަމަށެވެ. އެގޮތުން ޕާޓީގެ ލީޑަރުންގެ ގޮތުގައި ތިއްބަވައިގެން ކުރީގެ ރައީސް މުހައްމަދު ނަޝީދާއި، ކުރީގެ ރައީސް އިބްރާހިމް މުހައްމަދު ސޯލިހު އިންތިހާބުތައް އެއްކޮށްލުމަށް ވަކާލާތު ކުރެއްވިކަމަށް މުސްތަފާ ވިދާޅުވި އެވެ. އެމްޑީޕީގެ ދެވަނަ ވެރިކަމުގައި ގެންނަން ބޭނުންވީ ބަދަލު ގާނޫނުއަސާސީއަށް ހުށަނޭޅުނު ސަބަބަކީ ޕާޓީގެ އެތެރޭގައި ޖެހުނު މައްސަލަތަކެއްގައި ބައިބައިވެގެން ދިއުންކަމަށް މުސްތަވާ ވިދާޅުވި އެވެ.
މުސްތަފާ ވިދާޅުވި ގޮތުގައި ދެ ރައީސުންގެ މެދުގައި އޮތް ހިތްހަމަނުޖެހުމެއްގެ ސަބަބުން، އެމްޑީޕީއަށް ތަންފީޒު ނުކުރެވުނު ބަދަލެއް މި ސަރުކާރުން ހުށަހަޅައި ފާސްކުރީތީ އެ ޕާޓީން އެކަމަށް ޝުކުރު އަދާކުރަން ޖެހެ އެވެ.
އެހެންވީމާ ގާއިމުވެސް އަޅުގަނޑުމެން ޕީއެންސީ މި ބިލު ގެނައީކީ ދިރާސާ ނުކޮށެއް ނޫން.. އަޅުގަނޑުމެން ކުއްލިއަކަށް މިއަދު ހަމަ ހޭލާފަ އާނ މި ބަދަލުކޮށްލަންވީއޭ، މިހެން ވާންވީއޭ، އެހެން ވާންވީއޭ.. އެހެން ނޫނޭ މިކަން މި ކުރަނީކީ.
އެމްޑީޕީން ކޯޓަށް ހުށަހެޅި މައްސަލައިގައި ރައީސްގެ ގަރާރު އޮތީ ގާނޫނާ ހިލާފަށްކަމަށް ބުނެފައި ވާތީ، ރައްދުގައި މުސްތަފާ ވިދާޅުވީ މިއީ ރައީސް މުއިއްޒުގެ ރިޔާސީ ވައުދެއް ކަމަށާއި، މި ބަދަލު ގެނައީ ދުރާލާ ދިރާސާކުރުމަށް ފަހު ގައުމުގެ އިގްތިސާދާއި ރައްޔިތުންގެ ލާބައަށްޓަކައި ކަމަށެވެ.
މީގެއިތުރުން މަޖިލިސް ޗުއްޓީގައި އޮއްވައި މި މަސައްކަތް ކުރަން ޖެހުނީ، 20 ވަނަ މަޖިލީހުގެ މެމްބަރުންނަށް ޗުއްޓީއަށް ވުރެ ގައުމީ މަސްލަހަތު މުހިންމު ވާތީކަމަށާއި، ގައުމަށް ފައިދާހުރި ކަމެއް ކުރަން ޖެހިއްޖެ ކޮންމެ ވަގުތަކު މެމްބަރުން ތިއްބަވާނީ ތައްޔާރަށްކަމަށް މުސްތަފާ ވިދާޅުވި އެވެ. އަދި އަބަދު އިންތިހާބުތަކުގެ ތެރޭގައި އުޅެންޖެހުމުން ރައްޔިތުންނަށް އުފުލަންޖެހޭ ތަކްލީފުތަކާއި ސިޔާސީ ހަލަބޮލިކަމުގެ ސަބަބުން ލިބޭ ގެއްލުން މި ބަދަލާއެކު ކުޑަވެގެންދާނެކަމަށް މުސްތަފާ ވިދާޅުވިއެވެ.
މުސްތަފާ ވިދާޅުވީ އިންތިހާބުތަކާ ދިމާކޮށް ބޮޑެތި ވައުދުތައްވެ، ރައްޔިތުން ”ގުނބޯ ހެއްދުމަކީ“ މި ސަރުކާރުގެ ސަގާފަތެއް ނޫން ކަމަށެވެ. މުސްތަފާ ވިދާޅުވީ، އިންތިހާބުތަކާ ކައިރިކޮށް، ރައްޔިތުންނާ ބައްދަލުކޮށް އޮޅުވާލުންތަކެއް އޮޅުވާލުމަކީ އެމްޑީޕީގެ ފަލްސަފާއެއްކަމަށް ވެދާނެ ކަމަށެވެ. ނަމަވެސް، ރައީސް ޑރ. މުހައްމަދު މުއިއްޒުގެ ވިސްނުންފުޅާއި ޕީއެންސީގެ ފިކުރު އެއާ މުޅިން ތަފާތުކަމަށް އޭނާ ވިދާޅުވި އެވެ.
މުސްތަފާ އިތުރަށް ވިދާޅުވި ގޮތުގައި، ރައީސް މުއިއްޒު ރާއްޖޭގެ ހުރިހާ ރަށަކަށް ވަޑައިގެން ރައްޔިތުންނާއި ކައުންސިލްތަކާ ބައްދަލުކުރައް ވަނީ އިންތިހާބަކާ ދިމާކޮށްގެން ނޫނެވެ. އެމަނިކުފާނު ރައްޔިތުންގެ ގާތަށް ވަޑައިގަންނަވަނީ ރާއްޖެއަށް ބޭނުންވާ ތަރައްގީއާއި ބަދަލުތައް ގެނައުމަށްޓަކައި އެއްކުރަންޖެހޭ މައުލޫމާތު އެއްކޮށް، ރައްޔިތުންގެ އަޑު އެއްސެވުމަށްކަމަށް މުސްތަފާ ވިދާޅުވިއެވެ.
މުސްތަފާ ވިދާޅުވީ ރައްޔިތުންނާ ގާތުން ވެރިކަން ކުރުމުގެ ހިތްވަރު މިއަދު އެމްޑީޕީގެ ކިބައިގައި ނެތްކަން އެ ޕާޓީން ގަބޫލު ކުރަން ޖެހެ އެވެ. އަދި ކޮންމެ އިންތިހާބަކާ ދިމާކޮށް ރައްޔިތުން ”ގުނބޯ ހައްދަން“ މަސައްކަތް ކުރުމުގެ ބަދަލުގައި، ގައުމުގެ ހައްގުގައި މަސައްކަތް ކުރެވޭތޯ ބެލުމަށް ގޮވާލި އެވެ.
