މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ކޮށްފައިވާ އިޢުލާނެއްގައި، މާލޭގައި ދިރިއުޅޭ ރައްޔިތުން ފުލެޓަށް އެދި ހުށަހެޅުމަށް ދީފައިވާ މުއްދަތު އިތުރުކޮށްފިއެވެ.
މިނިސްޓްރީން ހާމަކުރި ގޮތުގައި، އުސޫލު ނަންބަރ 2025/G-36 ގެ ދަށުން މާލޭގައި ދިރިއުޅޭ ފަރާތްތަކަށް ބޯހިޔާވަހިކަމުގެ ފުރުސަތަށް އެދި ހުށަހެޅުމަށް ކުރިން ދީފައިވާ މުއްދަތު މިހާރު ވަނީ އިތުރުކުރެވިފައެވެ.
މިގޮތުން، 18 ޖަނަވަރީ 2026 ގައި އެ މިނިސްޓްރީން ކޮށްފައިވާ ނަންބަރު 491/491/2026/6(IUL) އިޢުލާނާ ހަވާލާދީ، ފުލެޓަށް އެދި ހުށަހެޅުމުގެ އާ ސުންގަޑިއަކީ 30 އެޕްރީލް 2026 ވާ ބުރާސްފަތި ދުވަހުގެ ރޭގަނޑު 23:59 ކަމަށް ވަނީ ކަނޑައަޅައިފައެވެ.
އެގޮތުން މި މުއްދަތު އިތުރުކުރުމަށް ނިންމީ، ގިނަ އަދަދެއްގެ ރައްޔިތުންނަށް ފޯމު ހުށަހެޅުމުގައި ލުއިފަސޭހަ ގޮތްތަކެއް ހަމަޖައްސައިދިނުމަށާއި، ވީހާވެސް ގިނަ ބަޔަކަށް މި ފުރުސަތުގެ ބޭނުން ހިފުމުގެ މަގު ފަހިކޮށްދިނުމުގެ މަގުސަދުގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ކުރަމުންދާ މަސައްކަތުގެ ދަށުން، މި މަޝްރޫޢަކީ މާލޭގެ ތޮއްޖެހުން ކުޑަކޮށް، ރައްޔިތުންނަށް އަތްފޯރާފަށުގައި ދިރިއުޅޭނެ ތަންތަން ފޯރުކޮށްދިނުމަށް ކުރިއަށްގެންދާ މުހިންމު މަސައްކަތެކެވެ.
އެހެންކަމުން ފުލެޓަށް އެދި ހުށަހަޅަން ބޭނުންވާ ފަރާތްތަކުން ކަނޑައެޅިފައިވާ މުއްދަތުގެ ކުރިން ފޯމު ހުށަހެޅުމަށް މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ވަނީ އިލްތިމާސްކުރައްވާފައެވެ.
