ހޮރްމޫޒު ކަނޑުއޮޅި އާންމު ދަތުރުފަތުރުތަކަށް ހުޅުވިފައި އޮތް ނަމަވެސް، އެ ސަރަހައްދުން ދަތުރުކުރާ އިސްރާއީލާއި އެމެރިކާގެ ބޯޓުތަކަށް ހަމަލާދޭނެ ކަމުގެ އިންޒާރު އީރާނުން ދީފިއެވެ. އީރާނުން މިހެން ބުނެފައިވަނީ މެދުއިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައެވެ.
އީރާން އަސްކަރިއްޔާގެ ތަރުޖަމާނަކު މައުލޫމާތު ދެއްވި ގޮތުގައި، ހޮރްމޫޒް ކަނޑުއޮޅި އެއްކޮށް ބަންދުކުރުމުގެ ގަސްތެއް އެ ގައުމުގެ ނެތެވެ. ނަމަވެސް، މި ދުވަސްވަރު އެ ކަނޑުއޮޅިން ދަތުރުކުރާ އުޅަނދުތަކުގެ އަދަދު މަދުވެފައިވަނީ މިހާރު ހިނގަމުންދާ ހަނގުރާމައިގެ ސަބަބުން ކުރިމަތިވެދާނެ ނުރައްކާތަކަށް ބަލައި، އުޅަނދުތަކުން ރައްކާތެރިކަން އިސްކުރާތީ ކަމަށް އޭނާ ވިދާޅުވިއެވެ.
ކަނޑުއޮޅީގެ ސަލާމަތީ ކަންކަމާ ގުޅޭގޮތުން ވާހަކަދައްކަވަމުން ތަރުޖަމާނު ވިދާޅުވީ، ”ހޮރްމޫޒް ކަނޑުއޮޅި ހުރަސްކުރަން ބޭނުންވާ އުޅަނދުތަކަށް އެތަން ހުރަސް ކުރަން ހުރަހެއް ނާޅާނަން. އެކަމަކު އެ ބޯޓުތަކުގެ ސަލާމަތީ ޒިންމާ އޮތީ ހަމައެކަނި ބޯޓުތަކަށް،“ ކަމަށެވެ. މިއީ އާންމު ވިޔަފާރި އުޅަނދުތަކަށް ދަތުރުކުރުމުގެ ފުރުސަތު އޮތް ނަމަވެސް، އީރާނުން އެ އުޅަނދުތަކުގެ ރައްކާތެރިކަމުގެ ޔަގީންކަން ނުދޭނެ ކަމުގެ އިޝާރާތެކެވެ.
އީރާނުގެ އަސްކަރިއްޔާއިން ވަނީ ވަކިން ހާއްސަކޮށް އިސްރާއީލާއި އެމެރިކާއަށް ނިސްބަތްވާ ބޯޓުތަކަށް ވަރުގަދަ އިންޒާރެއް ދީފައެވެ. އެގޮތުން، އިސްރާއީލާއި އެމެރިކާގެ ބޯޓުތައް އެ ކަނޑުއޮޅި ހުރަސްކުރަން މަސައްކަތްކޮށްފިނަމަ، އީރާނުން އެ ބޯޓުތަކަށް ހަމަލާދޭނެ ކަމަށް ތަރުޖަމާނު ކަށަވަރުކޮށްދެއްވިއެވެ.
މި ނިންމުމާއެކު ބައިނަލްއަގުވާމީ ކަނޑުގެ ދަތުރުފަތުރުގެ ރޫޓުތަކަށް ބޮޑެތި ބަދަލުތަކެއް އައުމަކީ އެކަށީގެންވާ ކަމެކެވެ. ހާއްސަކޮށް ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހޮރްމޫޒް ކަނޑުއޮޅީގައި އުފެދިފައިވާ މި ނުތަނަވަސްކަމުގެ ސަބަބުން ބައިނަލްއަގުވާމީ މާކެޓަށް އޭގެ އަސަރު ފޯރާނެ ކަމަށް ބެލެވެއެވެ.
