އެމެރިކާގެ އަސްކަރީ މަރުކަޒުތައް ހުންނަ ގަލްފުގެ ގައުމުތަކަށް އަމާޒުކޮށް އީރާނުން ދެމުންދާ ޑްރޯން އަދި މިސައިލް ހަމަލާތަކާ ގުޅިގެން، ޔުނައިޓެޑް އަރަބް އެމިރޭޓްސް (ޔޫއޭއީ) ގެ ރައީސް ޝެއިޚް މުހައްމަދު ބިން ޒައިދު އަލް ނަހްޔާން ފުރަތަމަ ފަހަރަށް ބަހެއް ވިދާޅުވެއްޖެއެވެ.
ހޮސްޕިޓަލެއްގައި ފަރުވާ ހޯދަމުންދާ ޒަޚަމްވީ މީހުންގެ ހާލު ބައްލަވައިލެއްވުމަށްފަހު، އަބޫދާބީ ޓީވީ މެދުވެރިކޮށް ދެއްވި ބަޔާނެއްގައި ރައީސް ވިދާޅުވީ ޔޫއޭއީއަކީ ފަސޭހައިން ގުޑުވާލެވޭނެ ގައުމެއް ނޫން ކަމަށެވެ. އެމަނިކުފާނު ސިފަކުރެއްވި ގޮތުގައި ޔޫއޭއީއަކީ ވަރުގަދަ އަދި ކެތްތެރި ގައުމެއް ކަމުން، އެ ގައުމަކީ ފަސޭހަ ޝިކާރައަކަށް ނުވާނެއެވެ.
މީގެ އިތުރުން، ސޯޝަލް މީޑިއާގައި ކުރެއްވި ޕޯސްޓެއްގައި ޝެއިޚް މުހައްމަދު ވިދާޅުވީ، ވައިގެ ބަނދަރުތަކާއި، ފަތުރުވެރިކަމުގެ ސަރަހައްދުތަކުގެ އިތުރުން ދުބާއީގައި ހުންނަ އެމެރިކާގެ ކޮންސިއުލޭޓް ފަދަ މުހިންމު ބިނާތަކަށް ކުރިމަތިވެދާނެ ކޮންމެ ނުރައްކަލަކުން ދިފާއުވުމަށް ޔޫއޭއީ އޮތީ ތައްޔާރަށް ކަމަށެވެ. އަދި ރައްޔިތުންގެ ރައްކާތެރިކަން ކަށަވަރުކުރުމަށް ކުރަންޖެހޭ ހުރިހާ މަސައްކަތެއް ކުރައްވާނެ ކަމުގެ ޔަގީންކަން އެމަނިކުފާނު ދެއްވިއެވެ.
ސަރަހައްދީ މަސްރަހާ ބެހޭގޮތުން ވާހަކަދައްކަވަމުން ޔޫއޭއީގެ ރައީސް ފާހަގަކުރެއްވީ، މިހާރު ޔޫއޭއީ އޮތީ ހަނގުރާމައިގެ ހާލަތެއްގައި ކަމަށް ވީނަމަވެސް، މި ދަތިތަކުން އަރައިގަންނާނީ ކުރިއަށްވުރެ ވެސް ބާރުގަދަ ގައުމެއްގެ ގޮތުގައި ކަމަށެވެ. މިއީ ސަރަހައްދީ ހަމަނުޖެހުންތަކާ ގުޅިގެން ޔޫއޭއީގެ އެންމެ މަތީ ވެރިޔާ މިފަދަ ހަރުކަށި ރާގަކަށް ވާހަކަދެއްކެވި ފުރަތަމަ ފަހަރެވެ.
މި ހަމަލާތަކުގެ ތެރޭގައި، ވައިގެ ތެރެއިން ގޮއްވާލި މިސައިލެއްގެ ބައިތައް ވެހިކަލެއްގައި ޖެހިގެން އޭޝިއާ ބައްރަށް ނިސްބަތްވާ ޑްރައިވަރަކު މަރުވެފައިވާ ކަމަށް ދުބާއީ މީޑިއާ އޮފީހުން ވަނީ ރިޕޯޓްކޮށްފައެވެ. ނަމަވެސް، މަރުވި މީހާގެ ގައުމާއި ބެހޭ އިތުރު ތަފްސީލެއް ކަމާބެހޭ އިދާރާތަކުން ހާމަކޮށްފައެއް ނުވެއެވެ.
