ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލައިގެން 2028 ވަނަ އަހަރު ބާއްވަން ނިންމުމަކީ ރައީސް ޑރ މުހައްމަދު މުއިއްޒަށް އޭގެ ނޭދެވޭ އަސަރުކޮށް، ބޮޑު ލަނޑެއް ލިބިދާނެ ކަމެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރޭ ކ. މާފުށީގައި ބޭއްވި އެމްޑީޕީގެ ކައުންސިލް އިންތިހާބުގެ ކެމްޕޭން ޖަލްސާއެއްގައި ވާހަކަފުޅު ދައްކަވަމުންނެވެ.
މިހާރު ހިނގަމުންދާ 20 ވަނަ މަޖިލީހުގެ ދައުރު 1 ޑިސެމްބަރު 2028 އަށް ކުރުކޮށް، ދެ އިންތިހާބު އެކުގައި ބޭއްވުމަށް ގާނޫނުއަސާސީއަށް ވަނީ އިސްލާހު ގެނެސްފައެވެ.
މި އިސްލާހު ތަސްދީގު ކުރުމުގެ ކުރިން ރައްޔިތުންގެ ރުހުން އޮތްތޯ ބެލުމަށް އަންނަ މަހުގެ 4 ގައި އޮންނަ ކައުންސިލް އިންތިހާބާ ދިމާކޮށް ހިޔާލު ހޯދުމުގެ ވޯޓެއް ނެގުމަށް ވަނީ ހަމަޖެހިފައެވެ. ރައްޔިތުން މިކަމަށް އެއްބަސްވެއްޖެ ނަމަ، 2028 ގެ ރިޔާސީ އިންތިހާބާއި މަޖިލިސް އިންތިހާބު ބާއްވާނީ އެއް ތާރީހެއްގައެވެ.
ސޯލިހު ވިދާޅުވީ ގާނޫނުއަސާސީއަށް ބޭނުންހާ ގޮތަކަށް އިސްލާހު ގެންނަމުންދާއިރު، އަމިއްލަ ފައިދާއަށް ކަންކަން ކުރަން ހަދައިގެން ބޮޑު ލަނޑެއް ލިބިދާނެ ކަމަށެވެ. މިކަމުގެ މިސާލެއްގެ ގޮތުން އެމަނިކުފާނު ފާހަގަކުރެއްވީ 2008 ވަނަ އަހަރުގެ އިންތިހާބެވެ. އެ އަހަރު ގާނޫނުއަސާސީ އިސްލާހު ކުރިއިރު، މަޖިލީހަށް ބޮޑެތި ބާރުތަކެއް ދިނީ އޭރުގެ އިދިކޮޅު ފަރާތްތަކަށް މަޖިލިސް ލިބޭނެ ކަމަށް ބަލައިގެން ކަމަށް ސޯލިހު ވިދާޅުވިއެވެ.
”އެކަމަކު ވެގެންދިޔައީ ކިހިނެއްތޯ؟ 2008 ވަނަ އަހަރު ވެރިކަން ލިބުނީ އަޅުގަނޑުމެން [އެމްޑީޕީ]އަށް. ރައްޔިތުންގެ މަޖިލިސް ލިބުނީ ރައީސް މައުމޫނަށް. އެހެންވީމާ ކަމެއް ކުރާއިރު ހަމައެކަނި ތިމާއަށް ފައިދާހުރި ގޮތަށް ކަމެއް ކޮށްގެން ލަނޑެއް ލިބިދޭނެ،“ ސޯލިހު ވިދާޅުވިއެވެ.
ކުރީގެ ރައީސް ސާލިޙް އިތުރަށް ވިދާޅުވީ ގާނޫނުއަސާސީ ތަރުތީބުކުރެވިފައި އޮތީ ވަރަށް ދިގުކޮށް ވާހަކަދެކެވި، ވަކި ނިޒާމެއްގެ ދަށުން ކަމަށެވެ. ނަމަވެސް މިހާރު ފެންނަނީ ސަރުކާރުން ބޭނުންވާ ގޮތަކަށް އެ ބަދަލުކުރަމުންދާ ތަން ކަމަށާއި، ރައީސް މުއިއްޒު މިހާރު ގެންނަވާ އިސްލާހުގެ ސަބަބުން 2028 ގައި އެމަނިކުފާނަށް ވެސް ބޮޑު ލަނޑެއް ލިބުމަކީ އެކަށީގެންވާ ކަމެއް ކަމަށް ސޯލިހު ވިދާޅުވިއެވެ.
ސޯލިހް ވިދާޅުވީ، 2028 ގައި ވެރިކަމަށް ހޮވޭ ސަރުކާރަކާ އެކު ރައްޔިތުންގެ މަޖިލިސް މިހާރަށް ވުރެ ބޮޑަށް ވެރިކަމުގެ ނިޒާމުގެ ތެރެއިން ބާރުވެރިވެގެންދާނެ ކަމަށެވެ.
