ޕީޕީއެމްގެ ޓިކެޓްގައި ލޯކަލް ކައުންސިލް އިންތިޚާބަށް ކުރިމަތިލުމަށް ފޯމް ހުށައެޅުުމުގެ މުއްދަތު 13 ޖެނުއަރީ 2020ގެ 16:00ގެ ނިޔަލަށް އިތުރުކޮށްފިއެވެ.
ޕީޕީއެމުން އެކަން ހާމަކުރީ އެ ޕާޓީން ކުރި ޓްވީޓެއްގައެވެ.
ޕީޕީއެމްއިން މިފަދައިން އިޢުލާންކޮށްފައިވާއިރު، މިއަހަރުގެ އެޕްރީލް މަހުގެ4 ވަނަ ދުވަހު ބޭއްވުމަށް ހަމަޖެހިފައިވާ ކައުންސިލް އިންތިހާބުގައި ހުރިހައި ދާއިރާއަކަށް ވާދަ ކުރުމަށް ސަރުކާރު ހިންގާ ކޯޅިޝަންގައި ހިމެނޭ ޖުމްހޫރީ ޕާޓީންވެސް ވަނީ ނިންމާފައެވެ.
މީގެއިތުރުން އެމްޑީޕީންވެސް ވަނީ ކެނޑިޑޭޓުން ހޯދަން އޢިުލާންކޮށްފައެވެ. ދާއިރާތަކަށް ވާދަކުރައްވަން ބޭނުންފުޅުވާ ޕާޓީގެ މެންބަރުން އެބޭފުޅަކު ކުރިމަތިލައްވަން ބޭނުންފުޅުވާ ދާއިރާއަށް ކުރިމަތިލުމަށް އެދޭފޯމް ފުރިހަމަކޮށް ފޯމާއެކު ހުށައަޅަންޖެހޭ އެންމެހާ ލިޔެކިޔުންތަކާއެކު ޕާޓީގެ ސެކްރެޓޭރިއަޓަށް 10 ޖެނުވަރީ 2020 ވާ ހުކުރު ދުވަހުގެ 18:00 ގެ ކުރިން ހުށައެޅުއްވަންއެމްޑީޕީއިންއެދިފައިވެއެވެ.