މެދުއިރުމަތީގައި ހިނގަމުންދާ ހަނގުރާމަތައް ހުއްޓުމަކަށް ގެނައުމަށާއި، ސަރަހައްދީ ހަމަޖެހުމަށްޓަކައި އީރާނާއި އެމެރިކާ އަލުން މަޝްވަރާގެ މޭޒަށް އެނބުރި ދިއުމަށް ޤަތަރުގެ ޚާރިޖީ ވަޒީރު މުހައްމަދު ބިން އަބްދުލްއަޒީޒް އަލް ޚުލައިފީ އިލްތިމާސް ކުރައްވައިފިއެވެ.
އަލްޖަޒީރާއަށް ދެއްވި ޚާއްސަ އިންޓަވިއުއެއްގައި އޭނާ ވަނީ މެދުއިރުމަތީގެ މަސްރަހު ފިނިކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ.
އަލް ޚުލައިފީ ވިދާޅުވީ އީރާނުން އަވަށްޓެރި ގައުމުތަކަށް ދޭ ހަމަލާތަކުގެ ސަބަބުން އެއްވެސް ފަރާތަކަށް ފައިދާއެއް ނުލިބޭނެ ކަމަށެވެ. އަދި ޚަލީޖުގެ ގައުމުތަކަކީ އީރާނުގެ ދުޝްމަނުން ނޫންކަން ފާހަގަކުރައްވައި، ހަމަލާ ބަދަލުކުރުމުގެ ބަދަލުގައި ޑިޕްލޮމެޓިކް މަގު އިޚްތިޔާރު ކުރުމަށް އޭނާ ބާރުއެޅުއްވިއެވެ.
އެމެރިކާއާއި އިސްރާއީލުން ދެ ހަފްތާ ވަންދެން ދިން ހަމަލާތަކަށް ރައްދުދިނުމުގެ ގޮތުން އީރާނުން ގަލްފް ސަރަހައްދާއި އަވަށްޓެރި ގައުމުތަކަށް މިސައިލާއި ޑްރޯން ހަމަލާތައް ވަނީ ދީފައެވެ. މި ހަމަލާތަކުގައި މުހިންމު ބިނާތަކަށް ގެއްލުންވުމުގެ ސަބަބުން އެ ސަރަހައްދުގެ ގައުމުތަކުގެ ހަކަތައިގެ އިޤްތިސާދަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.
މަދަނީ ބިނާތަކަށް އަމާޒުކޮށްދޭ ހަމަލާތަކާ މެދު ކަންބޮޑުވުން ފާޅުކުރައްވަމުން އަލް ޚުލައިފީ ވިދާޅުވީ، ޤަތަރުން އަދިވެސް މިފަދަ އަމަލުތަކާ މެދު އިންތިހާއަށް ކަންބޮޑުވާ ކަމަށެވެ. އޭނާ ވިދާޅުވި ގޮތުގައި ދެމެހެއްޓެނިވި ހައްލެއް ހޯދޭނީ ހަމައެކަނި މަޝްވަރާގެ މޭޒުންނެވެ.
”އަޅުގަނޑުމެން ގަބޫލުކުރާ ގޮތުގައި ދެމެހެއްޓެނިވި އަދި ދިގުދެމިގެންދާ ހައްލަކަށް އެނބުރި މުއާމަލާތުގެ މޭޒުމައްޗަށް ދިއުން ނޫން އެހެން މަގެއް ނެތް،“ އަލް ޚުލައިފީ ވިދާޅުވިއެވެ.
އިންޓަވިއު ނިންމަވާލައްވަމުން ޤަތަރުގެ ޚާރިޖީ ވަޒީރު އުންމީދު ފާޅުކުރެއްވީ، މިހާރު ކުރިއަށްދާ އަސްކަރީ އޮޕަރޭޝަންތައް ވީހާވެސް އަވަހަކަށް ނިންމާލައި، ހުރިހާ ފަރާތްތަކުން މަޝްވަރާގެ މޭޒަށް އެނބުރި އައުމަށެވެ.
