ޒިކުރާ މިސްކިތް ހުރިތަނުގައި ޒަމާނީ މިސްކިތެއް އެޅުމަށްޓަކައި ބިންގާ އަޅާނެކަމަށް އިސްލާމީ ކަންތައްތަކާއިބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިގޮތުން ބިންގާ އެޅުމަށް ހަމަޖެހިފައިވަނީ މިރޭ 9.30 ގައިކަމަށް ޝަހީމް ވިދާޅުވިއެވެ.
މާލޭ ގެ މަޖީދީމަގުގައި ހުންނަ ޒިކުރާ މިސްކިތް ހުރި ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާކަމަށް ޝަހީމް ވިދާޅުވީ މި މަހުގެ ކުރީކޮޅު އެވެ.
އެގޮތުން ޝަހީމް ވިދާޅުވީ މަޖީދީ މަގުގައި ގިނަ ދުވަސްތަކެއްވަންދެން ވަގުތީ މިސްކިތެއްގެ ގޮތުގައި ހުރި ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށްޓަކައި ބޭނުންވާ އެހީ ހަމަޖެހިފައިވާކަމަށެވެ.
ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް މި ރަމަޟާން މަހުގެ 27 ވިލޭރޭ ބިންގާ އަޅާނެކަމަށްވެސް އޭރު ޝަހީމް ވިދާޅުވިއެވެ. އެހެންނަމަވެސް މިސްކިތް ތަޅާލައި އަމަލީ މަސައްކަތް ފަށާނީ ރަމަޟާން މަސް ނިމުމުންކަމަށް ޝަހީމް ވިދާޅުވިއެވެ. މިއާއެކު މާލެ ގެ ބޮޑެތި ހުރިހައި މިސްކިތެއް އާވެގެން ދިޔައީ ކަމަށް ޝަހީމް ވިދާޅުވިއެވެ.
ފާހަގަކޮށްލެވޭ ގޮތުގައި މި އަހަރުގެ ރަމަޟާން މަހުގެ މިހާތަނަށް 15 މިސްކިތް ހުޅުވާފައިވެއެވެ. ރޯދަމަސް ނިމޭއިރު ހުޅުވޭ މިސްކިތްތަކުގެ އަދަދު 20އަށް އަރާނެކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެފަވެއެވެ.
