ހުޅުމާލޭގެ ބޮޑެތި ގޯތިތައް 10 ފަންގިފިލާއަށް އިމާރާތްކުރެވޭ ގޮތަށް ހަދައި، ’ހުޅުމާލޭގެ ޑިވެލޮޕްމަންޓް ކޮންޓްރޯލްތައް ކަނޑައެޅުމުގެ ގަވާއިދު‘ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިން މިހާރު ވަނީ ޝާއިއުކޮށްފައެވެ.
މި ގަވާއިދަކީ ހުޅުމާލޭގައި ދިރިއުޅުމަށް ދޫކޮށްފައިވާ ބިންތަކުގައި އިމާރާތްކުރުމަށް ހަރުދަނާ އޮނިގަނޑެއް ތައާރަފުކޮށް، ތަރުތީބުވެފައިވާ އާބަން ތަރައްގީއަކަށް މަގުފަހިކުރުމަށް އެކުލަވާލާފައިވާ މުހިންމު އުސޫލެކެވެ. މި ބަދަލާއެކު ހުޅުމާލޭގެ ބޯހިޔާވަހިކަމުގެ މައްސަލައަށް ބޮޑު ލުޔެއް ލިބި، ބިންވެރިންނާއި ޑިވެލޮޕަރުންނަށް އައު ފުރުސަތުތަކެއް ހުޅުވިގެންދާނެއެވެ.
އައު ގަވާއިދުގައިވާ ގޮތުން، ހުޅުމާލޭގައި ދިރިއުޅުމަށް ދޫކޮށްފައިވާ ބިންތަކުގައި ކުރާ އިމާރާތްތަކުގެ ޑިޒައިން އެޕްރޫވަލް އާއި އިމާރާތްކުރުމުގެ ހުއްދަ ހޯދަންޖެހޭނީ ހައުސިންގް ޑިވެލޮޕްމަންޓް ކޯޕަރޭޝަން (އެޗް.ޑީ.ސީ) މެދުވެރިކޮށެވެ. މިކަމަށް އެދި ހުށަހަޅަންޖެހޭނީ އެ ކޯޕަރޭޝަންގެ އޮންލައިން ޕޯޓަލް މެދުވެރިކޮށް ކަމަށްވުމީ ތަރައްގީގެ މަސައްކަތްތައް ހަރުދަނާ އަދި ދެފުށް ފެންނަ ގޮތަކަށް ކުރިއަށް ގެންދިއުމަށް އެޅުނު މުހިންމު ފިޔަވަޅެކެވެ. މީގެ އިތުރުން، ބިންތަކުގެ އިންވަކިކުރާ ފާހަގަތައް ޖެހުމަކީ އެޗް.ޑީ.ސީގެ ޒިންމާއެއްގެ ގޮތުގައި ކަނޑައަޅާފައިވަނީ ރަޖިސްޓްރީކޮށްފައިވާ ބިމުގެ މިންތަކާ އެއްގޮތަށް މަސައްކަތް ކުރިއަށްދާކަން ކަށަވަރުކުރުމަށެވެ.
މި އައު އޮނިގަނޑުގެ ދަށުން އިމާރާތްތަކުގެ އެންމެ އުސްމިނަކީ 30.5 މީޓަރު ކަމަށް ވަނީ ކަނޑައަޅާފައެވެ. އެގޮތުން، 901 އަކަފޫޓަށްވުރެ ބޮޑެތި ގޯތިތައް 30.5 މީޓަރަށް ނުވަތަ 10 ފަންގިފިލާއަށް އިމާރާތްކުރުމުގެ ހުއްދަ މިހާރު ލިބިގެންދާނެއެވެ. މިއީ ކުރިއާ އަޅާބަލާއިރު ލިބުނު ބޮޑު ކުރިއެރުމެކެވެ. މީގެއިތުރުން، އުސް އިމާރާތްތަކުގައި ލިފްޓް ހުރުމާއި، ދިރިއުޅޭ ބައިތަކުގެ ސީލިންގް ހުންނަންޖެހޭ އެންމެ ދަށް އުސްމިނާއި، ޓެރަސް އަދި މެޒަނިން ފްލޯތަކާ ގުޅޭ ތަފްސީލީ މިންގަނޑުތައް ވެސް މި ގަވާއިދުގައި ބަޔާންކޮށްފައިވެއެވެ.
ހުޅުމާލޭގެ ދިރިއުޅުމުގެ މާހައުލަށް ބުރޫނާރާނެހެން އިގްތިސާދީ ހަރަކާތްތަކަށް ޖާގަ ދިނުމަކީ މި ގަވާއިދުގެ އެއް މަގުސަދެވެ. އެގޮތުން، އިމާރާތުގެ ވަކި ފަންގިފިލާތަކެއްގައި ހުއްދަދެވޭ ވިޔަފާރިތައް ހިންގުމުގެ ފުރުސަތު ލިބިދެއެވެ. ނަމަވެސް، ސިނާއީ މަސައްކަތްތަކާއި، ގުދަންކުރުމާއި، އަދި އާންމުންނަށް އުނދަގޫވާ ފަދަ ގަދަ އަޑު، ވަސް، ދުން ނުވަތަ ހިރަފުސް އުފެދޭ ފަދަ ކަންކަން ކުރުން މި ގަވާއިދުގެ ދަށުން މަނާކުރެއެވެ. މިއީ މީހުން ދިރިއުޅޭ ސަރަހައްދުތަކަކީ އަމާން އަދި ސިއްހީ ގޮތުން ރައްކާތެރި ތަންތަނުގެ ގޮތުގައި ބޭއްވުމަށް އެޅުނު މުހިންމު ފިޔަވަޅެކެވެ.
ޒަމާނީ އާބަން މާހައުލަކަށް ބޭނުންވާ މުހިންމު ކަންތައްތަކަށް މި ގަވާއިދުގައި ވަނީ ހާއްސަ ސަމާލުކަމެއް ދީފައެވެ. އޭގެ ތެރޭގައި ޕާކިންގްއަށް ޖާގަ ދޫކުރުމާއި، ކުނި ބަހައްޓާނެ ރައްކާތެރި އިންތިޒާމުތަކާއި، އިމާރާތްތަކުގެ ތެރޭގައި ވައި ދައުރުވާނެ ގޮތްތައް ހިމެނެއެވެ. އަދި ޑިޖިޓަލް އިންފްރާސްޓްރަކްޗާއަށް ބޭނުންވާ ވަސީލަތްތައް ގާއިމުކުރުމުގެ މިންގަނޑުތައް ވެސް ވަނީ ކަނޑައަޅާފައެވެ. މި ހުރިހާ ކަމަކީވެސް ހުޅުމާލޭގައި ދިރިއުޅޭ ރައްޔިތުންގެ ދިރިއުޅުމުގެ ފެންވަރު މަތިކޮށް، ތަރުތީބުވެފައިވާ ސިޓީއެއްގެ ގޮތުގައި ހުޅުމާލެ ތަރައްގީކުރުމަށް މަގުފަހިވާނެ ކަންކަމެވެ.
ހުޅުމާލޭގެ ގޯތިތައް 10 ފަންގިފިލާއަށް އިމާރާތްކުރެވޭ ގޮތަށް ހަމަޖެހުމަކީ ހުޅުމާލޭގެ ތަރައްގީގެ އައު ބާބެއްގެ ފެށުމެވެ. މި ގަވާއިދުގެ ސަބަބުން ބިންތަކުގެ ބޭނުން އެންމެ އެދެވޭ ގޮތުގައި ހިފި، އިމާރާތްކުރުމުގެ ދާއިރާގައި ހަރުދަނާ މިންގަނޑުތަކެއް ގާއިމުވެގެންދާނެއެވެ. މީގެ ނަތީޖާއަކަށް ވާނީ ހުޅުމާލެއަކީ ދިރިއުޅުމަށް ހިތްފަސޭހަ، ތަރުތީބުވެފައިވާ އަދި ޒަމާނީ ވަސީލަތްތަކުން ފުރިގެންވާ ސިޓީއަކަށް ވެގެންދިއުމެވެ.
