އައްޑޫ ސިޓީގެ މުނިސިޕަލް ޚިދުމަތްތައް މިހާރަށްވުރެ ހަރުދަނާކޮށް ރަނގަޅުކުރުމާ ގުޅޭގޮތުން، މިނިސްޓަރ އޮފް ސިޓީސް، ލޯކަލް ކައުންސިލް އެންޑް ޕަބްލިކް ވޯކްސް އާދަމް ޝަރީފް އުމަރާއި އައްޑޫ ސިޓީގެ މޭޔަރު އަލީ ނިޒާރު އިއްޔެ ބައްދަލުކުރައްވައި މަޝްވަރާކުރައްވައިފިއެވެ.
ސިޓީތަކާ ބެހޭ މިނިސްޓްރީގައި ބޭއްވުނު މި ބައްދަލުކުރެއްވުމުގައި، އައްޑޫ ސިޓީގެ ތަރައްޤީއަށްޓަކައި މިވަގުތަށް ކުރަންޖެހިފައިވާ އެންމެ މުހިންމު މަސައްކަތްތަކާ ގުޅޭގޮތުން ދެ ބޭފުޅުން ފުޅާ ދާއިރާއެއްގައި ވާހަކަފުޅު ދެއްކެވިއެވެ. މީގެ އިތުރުން ރާއްޖޭގެ ލާމަރުކަޒީ ނިޒާމު މިހާރަށްވުރެ ހަރުދަނާކޮށް، ރައްޔިތުންނަށް ދެވޭ ޚިދުމަތްތައް އަވަސްކުރުމާ ގުޅޭގޮތުންވެސް މަޝްވަރާކުރެވުނެވެ.
މި ބައްދަލުވުމާ ގުޅޭގޮތުން މިނިސްޓަރު އާދަމް ޝަރީފް ’އެކްސް‘ ގައި ކުރެއްވި ޕޯސްޓެއްގައި ވިދާޅުވީ، ”އައްޑޫ ސިޓީގެ މޭޔަރާ ބައްދަލުކުރެއްވުމަކީ ލިބިވަޑައިގެންނެވި ވަރަށް ބޮޑު އުފަލެއް“ ކަމަށެވެ. އަދި މި ބައްދަލުވުމުގެ ތެރެއިން އައްޑޫގެ މުނިސިޕަލް ޚިދުމަތްތައް އިތުރަށް ރަނގަޅުކޮށް، ހަރުދަނާކުރުމަށް ކުރެވިދާނެ ކަންކަމާ މެދު މުހިންމު މަޝްވަރާތަކެއް ކުރެވުނުކަން މިނިސްޓަރު ފާހަގަކުރެއްވިއެވެ.
މި ބައްދަލުވުމަކީ އައްޑޫ ސިޓީގެ މޭޔަރު އަލީ ނިޒާރު، މިނިސްޓަރު އާދަމް ޝަރީފް އުމަރާ ބައްދަލުކުރެއްވި ފުރަތަމަ ފަހަރެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކައުންސިލްތަކަށް ބާރުވެރިކަން ދިނުމަށް ކުރައްވާ މަސައްކަތުގެ ދަށުން ބޭއްވުނު މި ބައްދަލުވުމަކީ އައްޑޫގެ ތަރައްޤީއަށް އެޅުނު މުހިންމު ފިޔަވަޅެއްގެ ގޮތުގައި ބެލެވެއެވެ.
އައްޑޫ ސިޓީގެ މުނިސިޕަލް ޚިދުމަތްތަކުގެ ތެރޭގައި ހިމެނޭ ކުނި މެނޭޖްކުރުމާއި، މަގުތައް ބެލެހެއްޓުމުގެ އިތުރުން ރައްޔިތުންނަށް ބޭނުންވާ އަސާސީ އެހެނިހެން ޚިދުމަތްތައް ފޯރުކޮށްދިނުމުގައި ދިމާވާ ގޮންޖެހުންތަކަށް މި މަޝްވަރާތަކުގެ ސަބަބުން ހައްލުތަކެއް ލިބިގެންދާނެ ކަމަށް އުންމީދު ކުރެވެއެވެ.
