މާލޭގެ އެންމެ ކާރޫބާރޫ ބޮޑު މަގު ކަމަށްވާ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމަށް ސަރުކާރުން ކުރިއަށްގެންދާ ބޮޑު މަޝްރޫއުގެ ދަށުން، މުހިންމު މަސައްކަތްތަކެއް ފެށުމަށް މިހާރު ވަނީ ތައްޔާރުވެފައެވެ.
މި މަޝްރޫއުގެ ދަށުން ޝީޓް ޕައިލްކުރުމުގެ މަސައްކަތް ފެށުމަށްޓަކައި މަސްވެރިންގެ ޕާކުން ފެށިގެން ބޭންކް އޮފް މޯލްޑިވްސް (ބީއެމްއެލް) އާ ހަމައަށް އޮންނަ މަގާއި ފަޅުގެ ސަރަހައްދު ބަންދުކުރުމަށް އެމްޓީސީސީން ވަނީ ނިންމާފައެވެ.
އެމްޓީސީސީން މައުލޫމާތު ދޭ ގޮތުގައި ބޮޑުތަކުރުފާނު މަގުގެ ފިޔަވަހި 1 ގެ ސެގްމަންޓް ދެއަކުން ފެށިގެން ހަތަރަކާ ހަމައަށް ޝީޓް ޕައިލްކުރުމުގެ މަސައްކަތް ކުރިއަށްދާނެއެވެ. މި މަސައްކަތަށްޓަކައި މި މަހުގެ 8 ވަނަ ދުވަހުން ފެށިގެން ޖުލައި މަހުގެ 4 ވަނަ ދުވަހުގެ ނިޔަލަށް އެ ސަރަހައްދުގެ މަގާއި ފަޅު ބަންދުވާނެއެވެ. އެހެންކަމުން، އެ ސަރަހައްދުގައި އަޅާފައިވާ ދޯނިފަހަރާއި ލޯންޗުތައް ނަގައި، ސަރަހައްދު ހުސްކޮށްދިނުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ.
މަސްވެރިންގެ ޕާކު ސަރަހައްދަކީ ރަށްރަށަށް ދަތުރުކުރާ ގިނަ އަދަދެއްގެ ލޯންޗު ފެރީތައް ގާތްކުރާ މުހިންމު ސަރަހައްދަކަށް ވުމާއެކު، މި ބަދަލުގެ ސަބަބުން އާންމު ދަތުރުފަތުރަށް ބައެއް ބަދަލުތައް އަންނާނެއެވެ. މީގެ ކުރިންވެސް ހެންވޭރު ފެރީ ޓާމިނަލް ކައިރީގެ މަސައްކަތް ފެށުމާ ގުޅިގެން، އެތަނުން ދެމުންދިޔަ އަތޮޅު ފެރީގެ ހިދުމަތްތައް ވަނީ ވިލިމާލެ އަދި ހުޅުމާލެ ފެރީ ޓާމިނަލަށް ބަދަލުކޮށްފައެވެ. މިފަދަ ބޮޑު މަޝްރޫއެއް ކުރިއަށްދާއިރު އާންމުންނަށް ދިމާވެދާނެ ދަތިތަކަށް އެމްޓީސީސީން ވަނީ މާފަށް އެދިފައެވެ.
މި މަޝްރޫއު ކުރިއަށް ގެންދަނީ އެކި ސެގްމެންޓްތަކަށް ބަހާލައިގެންނެވެ. އެންމެ ފުރަތަމަ ހެންވޭރު ޓާމިނަލުން ފެށިގެން މަސްވެރިންގެ ޕާކާ ހަމައަށް ތަރައްގީކުރިއިރު، ދެން އޮތީ މަސްވެރިންގެ ޕާކުން ފެށިގެން ފަސް ނަމްބަރު ފާލަމާ ހަމައަށްވާ ސަރަހައްދެވެ. އޭގެ ފަހުން ފަސްވަނަ ނަމްބަރު ފާލަމުން ފެށިގެން އިއްޒުއްދީން ފާލަމާ ހަމައަށް މަސައްކަތް ފުޅާވެގެންދާނެއެވެ. މިހާރުވެސް ނޯތު ހާބަރުން ފެށިގެން ޖުމްހޫރީ މައިދާނާ ހަމައަށް ތާރު އަޅައި ނިމިފައިވާއިރު، އެ ސަރަހައްދުގެ ޓްރެފިކް ތޮއްޖެހުމަށް ބޮޑު ލުޔެއް ވަނީ ލިބިފައެވެ.
ދައުލަތުގެ ބަޖެޓުން 144 މިލިއަން ރުފިޔާ ހަރަދުކޮށްގެން ކުރިއަށްގެންދާ މި މަޝްރޫއަކީ 455 ދުވަހުގެ ތެރޭގައި ނިންމުމަށް އަމާޒު ހިފާފައިވާ މުހިންމު މަސައްކަތެކެވެ. މަގުތައް ފުޅާކޮށް، ޒަމާނީ ފެންވަރަށް ތާރު އެޅުމުން މާލޭގެ ދަތުރުފަތުރުގެ ނިޒާމަށް ބޮޑު އިންގިލާބެއް އަންނާނެއެވެ. ވަގުތީ ގޮތުން ދިމާވާ ދަތިތަކާއެކުވެސް، މި މަޝްރޫއު ނިމުމުން އާންމު ރައްޔިތުންނަށް ދާއިމީ ފަސޭހަތަކެއް ލިބިގެންދާނެކަން ކަށަވަރެވެ.
