ސްރީލަންކާގެ ބަނދަރުގައި ތާށިވެފައި ހުރި 2,500 އަށްވުރެ ގިނަ ކޮންޓައިނަރުގެ މުދާ އަންނަ ހަފުތާގެ ތެރޭގައި ރާއްޖެއަށް ގެނެވޭނެކަމަށް އިޤްތިޞާދީ ތަރައްޤީއާއި ދަތުރުފަތުރާ ބެހޭ ވަޒީރު މުޙައްމަދު ސަޢީދު ހާމަކުރައްވައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސައީދު ވިދާޅުވީ، މި މުދާތައް ރާއްޖެއަށް އުފުލުމަށް ޖުމްލަ ތިން އުޅަނދެއް ހަރަކާތްތެރިވާނެ ކަމަށެވެ.
މެދުއިރުމަތީގެ ހަމަނުޖެހުންތަކާ ގުޅިގެން ބައިނަލްއަޤްވާމީ ޝިޕިން ރޫޓުތަކަށް އައި ބަދަލުތަކުގެ ސަބަބުން، ރާއްޖެއަށް މުދާ އެތެރެކުރުމުގައި ފާއިތުވި ދުވަސްތަކުގައި ވަނީ ގޮންޖެހުންތަކެއް ކުރިމަތިވެފައެވެ. ނަމަވެސް، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ކުރަމުންދާ މަސައްކަތްތަކުގެ ސަބަބުން، މުދާ ކްލިއަރ ކުރުމާއި ލޮޖިސްޓިކްސްގެ މަސައްކަތްތައް ހަލުވިވެ، ބަނދަރުގެ ތޮއްޖެހުން ކުޑަކުރެވިފައިވާކަން ވަޒީރު ފާހަގަކުރެއްވިއެވެ.
މީގެ އިތުރުން، ރާއްޖޭގެ އިޤްތިޞާދީ ދުވެއްޔަށް އަލިއަޅުއްވާލައްވަމުން ވަޒީރު ވިދާޅުވީ، މިދިޔަ އަހަރާ އަޅާބަލާއިރު މިއަހަރުގެ މިހާތަނަށް މުދާ އެތެރެކުރި މިންވަރު 19 އިންސައްތައާއި 20 އިންސައްތައާ ދެމެދުގެ އަދަދަކަށް އިތުރުވެފައިވާ ކަމަށެވެ. މިއީ އިޤްތިޞާދީ ހަރަކާތްތައް އިތުރުވަމުންދާ ކަމުގެ ހެއްކެކެވެ.
އަގުތަކަށް އައި ބަދަލުތަކަށް ބަލާއިރު، ކާބޯތަކެތީގެ އަގު ވަނީ ނިސްބަތުން ހިފެހެއްޓިފައެވެ. ތަފާސްހިސާބުތަކުން ދައްކާގޮތުގައި:
-
ތަރުކާރީގެ އަގު: 5 އިންސައްތަ ވަނީ ހެޔޮވެފައެވެ.
-
މޭވާގެ އަގު: 15.56 އިންސައްތަ ވަނީ ދަށްވެފައެވެ.
-
އަސާސީ ކާބޯތަކެތި: ޕްރައިސް އިންޑެކްސް އިތުރުވީ އެންމެ 1.95 އިންސައްތައެވެ.
ކުރިއަށް އޮތް ދުވަސްތަކުގައި ބާޒާރުގައި މުދާ ތިޔާގިވެ، އިޤްތިޞާދީ ހަމަޖެހުން އިތުރަށް ވަރުގަދަވާނެކަމަށް މިނިސްޓަރ ވަނީ ވިދާޅުވެފަ އެވެ.
