ދިވެހިރާއްޖެއާއި ސްރީލަންކާއާ ދެމެދު އޮންނަ ޒަމާންވީ ޚާރިޖީ ގުޅުންތައް، އަމަލީ ގޮތުން ފެންނަފަދަ އިގްތިސާދީ އަދި ވިޔަފާރީގެ ބޮޑެތި ފުރުސަތުތަކަކަށް ބަދަލުކުރަން ޖެހޭ ކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ސްރީލަންކާގައި ބޭއްވި ވިޔަފާރި ފޯރަމެއްގައި ވާހަކަފުޅު ދައްކަވަމުން މިނިސްޓަރު ސައީދު ފާހަގަކުރެއްވި ގޮތުގައި، ދެ ގައުމުގެ ދެމެދުގައި މިހާރު ކުރިއަށްދާ މަޝްވަރާތަކަކީ ހަމައެކަނި ސިޔާސީ ނުވަތަ ޚާރިޖީ ގުޅުންތަކެއް ނޫނެވެ. މި މަޝްވަރާތަކުގެ އަސްލު އަމާޒަކީ އަމިއްލަ ފަރާތްތަކަށް ވިޔަފާރީގެ މަގުތައް ފަހިކޮށްދީ، ސަރުކާރުތަކުގެ މެދުގައި އޮންނަ ގާތްކަން އިންވެސްޓްމަންޓްތަކަށް ބަދަލުކުރުން ކަމަށް މިނިސްޓަރު ވިދާޅުވިއެވެ.
މި ފޯރަމްގެ މައިގަނޑު މަގުސަދުތަކުގެ މައްޗަށް އަލިއަޅުއްވާލައްވަމުން މިނިސްޓަރު ވިދާޅުވީ، ދެ ގައުމުގެ ދެމެދުގައި ކުރެވޭ ވިޔަފާރި އިތުރަށް ހަރުދަނާކޮށް، އިންވެސްޓްކުރެވޭނެ އާ ދާއިރާތައް ދެނެގަތުމަކީ ވަރަށް މުހިންމު ކަމެއް ކަމަށެވެ. އަދި ދެ ގައުމަށް ވެސް ލާބަޔާއި މަންފާ ލިބޭނެ ފަދަ އިސްތިރާތީޖީ ގުޅުންތަކެއް ގާއިމުކުރުމަށް މިނިސްޓަރު ބާރުއެޅުއްވިއެވެ.
ސަރަހައްދީ އިގްތިސާދީ އެއްބާރުލުމާ ގުޅޭގޮތުން ވާހަކަފުޅު ދައްކަވަމުން ސައީދު ވިދާޅުވީ، މިއީ ހަމައެކަނި ރާއްޖެއާއި ލަންކާއާ ދެމެދު އޮންނަ ގުޅުމެއް ނޫން ކަމަށާއި، މުޅި ސަރަހައްދުގެ ކުރިއެރުމަށްޓަކައި ވިޔަފާރިވެރިންގެ މެދުގައި ވަރުގަދަ ގުޅުމެއް އޮތުން ކޮންމެހެން ބޭނުންތެރި ކަމަށެވެ. އެގޮތުން ދެ ގައުމުގެ އަމިއްލަ ކުންފުނިތަކާއި ވިޔަފާރިތަކުން ގުޅިގެން މަސައްކަތްކުރެވޭނެ މަގުތައް އިތުރަށް ފުޅާކުރުމަށް އެމަނިކުފާނު އިލްތިމާސްކުރެއްވިއެވެ.
މި އެއްބާރުލުން ކުރިއަށް ގެންދިއުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދި ސްރީލަންކާގެ ރައީސް އަނޫރާ ކުމާރާ ދިސާނަޔަކަ ދައްކަވާ ލީޑަރޝިޕާއި ދެއްވާ އިރުޝާދަށް މިނިސްޓަރު ވަނީ ޚާއްސަ ޝުކުރެއް އަދާކުރައްވާފައެވެ.
މިނިސްޓަރު ސައީދުގެ ވާހަކަފުޅު ނިންމަވާލެއްވީ، ގައުމުތަކުގެ މެދުގައި އޮންނަ ސިޔާސީ ގުޅުމުގެ ބޭނުން ހިފައިގެން އިގްތިސާދީ ނަތީޖާ ދެއްކުމަށް ގޮވާލައްވަމުންނެވެ. އަދި ދެ ގައުމުގެ ވިޔަފާރިވެރިން އެކަކު އަނެކަކުގެ ގައުމުގައި އިންވެސްޓްކޮށް، ދެމެހެއްޓެނިވި އިގްތިސާދީ ބައިވެރިވުމެއް ބިނާކުރުމަށް އެމަނިކުފާނު ހިތްވަރު ދެއްވިއެވެ.
