ދާދިފަހުން ނެދަލޭންޑްސްގެ ދިދަޖަހާފައިވާ ”MV Hondius“ ނަމަކަށް ކިޔާ ކްރޫޒް ލައިނަރަކުން ފެނުނު ނުރައްކާތެރި ހެންޓާވައިރަސް (Hantavirus) ގެ ބަލިމަޑުކަމާ ގުޅިގެން، ބައިނަލްއަގުވާމީ ސިއްހީ އިދާރާތަކުން ބޮޑު އޮޕަރޭޝަނެއް ފަށައިފިއެވެ. މި ބަލީގައި މިހާތަނަށް ތިން މީހަކު މަރުވެފައިވާއިރު، ބަލި ފެތުރިފައިވާ މިންވަރު ދެނެގަތުމަށް ގައުމުތަކުން ދަނީ ގުޅިގެން މަސައްކަތް ކުރަމުންނެވެ.
ދުނިޔޭގެ ސިއްހަތު ޖަމްއިއްޔާ (WHO) އިން ހާމަކޮށްފައިވާ ގޮތުގައި، މި ބަލިމަޑުކަމާ ގުޅުންހުރި އަށް ކޭސްއެއް މިހާތަނަށް ވަނީ ފާހަގަކުރެވިފައެވެ.
މީގެ ތެރޭގައި ލެބޯޓްރީން ކަށަވަރުކުރެވިފައިވާ ފަސް ކޭސްއަކާއި، ބަލި ޖެހިފައިވާ ކަމަށް ޝައްކުކުރެވޭ ތިން ކޭސް ހިމެނެއެވެ. ބަލީގައި މަރުވި މީހުންގެ ތެރޭގައި ނެދަލޭންޑްސްގެ ދެމަފިރިއަކާއި ޖަރުމަނުވިލާތުގެ ފަސިންޖަރަކު ހިމެނެއެވެ. އަދި ބަލި ހާލަތު ބޮޑުވި އެހެން ފަސިންޖަރަކަށް މިހާރު ދަނީ ދެކުނު އެފްރިކާގެ އައި.ސީ.ޔޫގައި ފަރުވާ ދެމުންނެވެ.
މި ފަހަރު ފެނިފައިވަނީ ހެންޓާވައިރަސްގެ ނާދިރު ބާވަތެއް ކަމަށްވާ ”އެންޑީސް ވައިރަސް“ (Andes virus) ކަމަށް މާހިރުން ލަފާކުރެއެވެ. މިއީ އިންސާނުންގެ މެދުގައި ބަލި ފެތުރުމުގެ ފުރުސަތު އޮންނަ ބާވަތެކެވެ. ނަމަވެސް، ސިއްހީ މާހިރުން ވިދާޅުވާ ގޮތުގައި މި ވައިރަސް ކޮވިޑް-19 ފަދައިން ހަލުވިކަމާއެކު ނުފެތުރޭނެތީ، އާންމު ރައްޔިތުންނަށް އޮތް ނުރައްކާ އަދި ކުޑައެވެ.
މި ބަލިމަޑުކަން ފެންމަތިވީ އާޖެންޓީނާއިން ފުރައިގެން ކެނޭރީ އައިލެންޑްސްއަށް ދަތުރުކުރި އުޅަނދެއްގައެވެ. އޭޕްރިލް މަހުގެ ކުރީކޮޅު ފަސިންޖަރުންގެ ކިބައިން ފެނުނު އަލާމާތްތަކުގެ ތެރޭގައި ހުން އައުމާއި، މަސްތަކުގައި ރިއްސުމާއި، ވަރުބަލިވުން ހިމެނެއެވެ. މި އަލާމާތްތައް ފަހުން ނިއުމޯނިއާއަށް ބަދަލުވެ، ނޭވާލާ ނިޒާމު ފެއިލްވުމާ ހަމައަށް ދެއެވެ.
މި ބައްޔަކީ އާންމުކޮށް މީދާ ފަދަ ތަކެތީގެ ކުޑަކަމުދާ އެއްޗެހީގެ ޒަރީއާއިން ފެތުރޭ ބައްޔެކެވެ. މި ބަލީގައި މަރުވާ މީހުންގެ ނިސްބަތް 50 އިންސައްތައަށް އަރާފާނެ ކަމަށް ޑަބްލިޔު.އެޗް.އޯ އިން އިންޒާރު ދެއެވެ.
މި ހާދިސާ އިތުރަށް ނުތަނަވަސްވީ، ބަލިމަޑުކަން ރަސްމީކޮށް ކަށަވަރުވުމުގެ ކުރިން އެތައް ބަޔަކު އުޅަނދުން ފައިބައިގެން އެކި ގައުމުތަކަށް ދަތުރުކޮށްފައިވާތީއެވެ. މިހާރު އެމެރިކާ، އިނގިރޭސިވިލާތް، އޮސްޓްރޭލިއާ، ސިންގަޕޫރު، އަދި ކެނެޑާ ފަދަ ގައުމުތަކުން ދަނީ އެ ފަސިންޖަރުން ހޯދައި، އެމީހުންގެ ސިއްހީ ހާލަތު ބަލަމުންނެވެ.
ދުނިޔޭގެ ސިއްހަތު ޖަމްއިއްޔާއިން މިހާރު ދަނީ ގައުމުތަކުގެ ލެބޯޓްރީތަކަށް ބަލި ދެނެގަންނަ 2,500 އަށްވުރެ ގިނަ ޓެސްޓިން ކިޓް ފޯރުކޮށްދެމުންނެވެ. އަދި މި ބަލި ކޮންޓްރޯލް ކުރުމަށްޓަކައި ބައިނަލްއަގުވާމީ ފެންވަރުގައި ގުޅިގެން މަސައްކަތް ކުރުމުގެ މުހިންމުކަން އެ ޖަމްއިއްޔާއިން ވަނީ ފާހަގަކޮށްފައެވެ.
