ތެލެސީމިއާ ދުވަސް ހަނދާންކޮށްދީ، ދަސްކޮށްދެނީ އިންސާނިއްޔަތުކަމާއި އޯގާތެރިކަމުގެ ސިފަތައް އިސްކޮށް، ކޮންމެ ދިވެހި ދަރިއަކާއި ޢާއިލާއަކަށްމެ، މުޖުތަމަޢުގެ އެހީތެރިކަމާއި އެއްބާރުލުންދީގެން ބަދަހި ޤައުމެއް ބިނާކުރުމަށްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ، ދުނިޔޭގެ ތެލެސީމިއާ ދުވަހާ ގުޅިގެން އާންމު ކުރެއްވި މެސެޖެއްގަ އެވެ.
ތެލެސީމިއާ ބަލި ތަޙައްމަލުކުރަމުންދާ ކޮންމެ ފަރުދަކަށާއި އެ ފަރުދުން ނިސްބަތްވާ ޢާއިލާތަކަށް ބޭނުންވާނޭ ޞިއްޙީ އަދި އިޖުތިމާޢީ ރައްކާތެރިކަން ފަހިކޮށްދިނުމުގައި ސަރުކާރުން އަދާކުރާ ޒިންމާ އާއި މަސްއޫލިއްޔަތުގެ މުހިންމުކަންވެސް އެމަނިކުފާނުގެ މެސެޖުގައި ފާހަގަކުރައްވާފައިވެއެވެ. މި މެސެޖުގައި ތެލަސީމިއާ ކުދިންނާއި އެކުދިންގެ އާއިލާތަކަށް އޯގާތެރިކަމާއި އިންސާނިއްޔަތުކަން އިސްކުރުމަށް މުޅި ދިވެހި މުޖުތަމައަށް ރައީސް ގޮވާލައްވައިފިއެވެ.
ރައީސް ވިދާޅުވީ ތެލަސީމިއާ ތަހައްމަލު ކުރަމުންދާ ކޮންމެ ކުއްޖަކީވެސް ތިމާގެ އަމިއްލަ އާއިލާގެ މެންބަރެއްގެ ގޮތުގައި ބަލައިގަންނަންޖެހޭ ކަމަށެވެ. އަދި ބަދަހި ގައުމެއް ބިނާކުރުމަށްޓަކައި، މިފަދަ އާއިލާތަކަށް ބޭނުންވާ އެހީތެރިކަމާއި އެއްބާރުލުން ދިނުމަކީ ކޮންމެ ދިވެއްސެއްގެވެސް ޒިންމާއެއްކަން ފާހަގަކުރެއްވިއެވެ.
ރައީސް މުއިއްޒު ވިދާޅުވީ، ތެލަސީމިއާ ކުދިންނަށް ބޭނުންވާ ފެންވަރު ރަނގަޅު ސިއްހީ ހިދުމަތްތަކާއި އިޖުތިމާއީ ރައްކާތެރިކަން ކަށަވަރުކޮށްދިނުމަކީ މި ސަރުކާރުން ނުހަނު އިސްކަންދޭ ކަމެއް ކަމަށެވެ. އެގޮތުން އެކުދިންނަށް ބޭނުންވާ ފުރުސަތުތައް ފަހިކޮށްދިނުމަކީ ދައުލަތުގެ މުހިންމު މަސްއޫލިއްޔަތެއްކަމުގައި ވިދާޅުވިއެވެ.
ދުނިޔޭގެ ތެލެސީމިއާ ދުވަސް ފާހަގަކުރަނީ ކޮންމެ އަހަރެއްގެ މޭ މަހުގެ 8 ވަނަ ދުވަހުއެވެ. ތެލެސީމިއާ ބަލި ތަޙައްމަލުކުރަމުންދާ ފަރުދުންނާއި ޢާއިލާތަކަށް، ފަރުވާއަށް ފަހި މާހައުލެއް ޤާއިމުކުރެއްވުމަކީ މި ސަރުކާރުން ޚާއްޞަ އަހުމިއްޔަތެއް ދެއްވާ މަސައްކަތެކެވެ.
