އެމްޑީޕީއަކީ ހަމައެކަނި އެތެރޭގެ ސިޔާސީ ހަރަކާތްތަކާއި އިންތިޚާބުތަކަށް އަމާޒުވެފައި އޮންނަ ޕާޓީއަކަށް ނުވެ، ބައިނަލްއަޤުވާމީ ދާއިރާގައިވެސް ހަރަކާތްތެރިވާ ޕާޓީއަކަށް ވާންޖެހޭ ކަމަށް އެމްޑީޕީގެ ޗެއާޕާސަން ކެންޑިޑޭޓް އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ”އިންޑިއަން އޯޝަން ޑައިލޮގް 2026“ ނިންމަވާލެއްވުމަށްފަހު އެނބުރި ރާއްޖެ ވަޑައިގެން ބޭއްވި ނޫސްވެރިންގެ ބައްދަލުވުމުގައެވެ.
ރައީސް ނަޝީދު ފާހަގަކުރެއްވި ގޮތުގައި، ރާއްޖޭގެ އިޤްތިޞާދީ އަދި އިޖުތިމާޢީ ދާއިރާ ބޭރުގެ ޤައުމުތަކަށް ބަރޯސާވެފައިވާ މިންވަރުން، ބައިނަލްއަޤުވާމީ ގުޅުންތަކަކީ ދިވެހިންނަށް ކޮންމެހެން މުހިންމު ކަމެކެވެ. ރާއްޖޭގެ ފަތުރުވެރިކަމާއި ވިޔަފާރި ބިނާވެފައިވަނީ ބައިނަލްއަޤުވާމީ މުޖުތަމަޢާ އޮންނަ ގުޅުމުގެ މައްޗަށް ކަމަށާއި، ކާބޯތަކެތީގެ ގިނަ ބާވަތްތަކަކީވެސް ބޭރުން އިމްޕޯޓްކުރާ ތަކެތިކަން އެމަނިކުފާނު ފާހަގަކުރެއްވިއެވެ.
މި ބައްދަލުވުމުގައި ސަންގު ޓީވީން ކުރި ސުވާލަކަށް ޖަވާބު ދެއްވަމުން ނަޝީދު ވިދާޅުވީ، އެމަނިކުފާނު ބޭރުގައި ހުންނެވި ނަމަވެސް، އެމްޑީޕީގެ ޗެއާޕާސަންގެ ކެމްޕޭން ހަރަކާތްތައް ވަރަށް ފޯރިއާއެކު ކުރިއަށްދާ ކަމަށެވެ.
އެމަނިކުފާނު ޤަބޫލުފުޅު ކުރައްވާ ގޮތުގައި އެމްޑީޕީއަކީ ހަމައެކަނި ވޯޓު ހޯދާ މެޝިނެއް ނޫނެވެ. އޭގެ ބަދަލުގައި އެއީ ސިޔާސީ އިޞްލާޙީ މަސައްކަތްތަކާއި، ސަރުކާރު ޒިންމާދާރުކުރުވުމުގެ ހަރަކާތްތަކުގައިވެސް ދެމިއޮންނަންޖެހޭ ޕާޓީއެކެވެ.
ބައިނަލްއަޤުވާމީ ގުޅުންތަކުގެ މުހިންމުކަމާ ގުޅޭގޮތުން ވާހަކަފުޅު ދައްކަވަމުން ނަޝީދު ވިދާޅުވީ، ”ސިޔާސީ ޕާޓީތަކުން ދުނިޔޭގެ މަސްރަޙަށް ލޯހުޅުވިފައިވާ ބަޔަކަށް ވާންޖެހޭ. ބައިނަލްއަޤުވާމީ ގުޅުންތައް ދެމެހެއްޓުމަކީ ވަރުގަދަ ސިޔާސީ ޕާޓީއަކުން ކުރަންޖެހޭނެ ކަމެއް،“ ނަޝީދު ވިދާޅުވިއެވެ.
ރާއްޖެއަށް އެންމެ ފައިދާހުރި ގޮތްތައް ނިންމޭނީ ހަމައެކަނި އެތެރޭގެ ކަންކަމަށް ބަލައިގެން ނޫން ކަމަށްވެސް އެމަނިކުފާނު ވިދާޅުވިއެވެ.
ނިންމަވާލައްވަމުން ރައީސް ނަޝީދު ވިދާޅުވީ، އެމަނިކުފާނު ދާދިފަހުން ބައިވެރިވެވަޑައިގެންނެވި ސަރަޙައްދީ ފޯރަމަކީ ރާއްޖެއަށް ވަރަށް ބޭނުންތެރި އަދި ނަތީޖާ ނެރެވުނު ދަތުރުފުޅެއް ކަމަށެވެ. މިފަދަ ބައިނަލްއަޤުވާމީ ބައްދަލުވުންތަކުގައި ބައިވެރިވުމަކީ ރާއްޖޭގެ މަޞްލަޙަތު ހިމާޔަތްކުރުމަށް އެޅޭ މުހިންމު ފިޔަވަޅެއްގެ ގޮތުގައި އެމަނިކުފާނު ސިފަކުރެއްވިއެވެ.
