އަދަދު ނޫހުގެ ދެ ނޫސްވެރިން މިނިވަން ކުރުމަށް ގޮވައިލައި ބުދަ ދުވަހުގެ ރޭ މާލޭގައި ކުރި މުޒާހަރާގެ ތެރެއިން 10 މީހަކު ހައްޔަރު ކުރީ ސިޔާސީ މަގުސަދެއްގައި ކަމަށާއި އެ މީހުން ވަގުތުން މިނިވަން ކުރުމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ގޮވައިލައްވައިފިއެވެ.
ފައްޔާޒު ވިދާޅުވީ، ޤާނޫނުއަސާސީން ލިބިދޭ އަސާސީ ޙައްޤުތަކުގެ ބޭނުން ހިފުމުގެ ސަބަބުން ހައްޔަރުކުރި ފަރާތްތަކުގެ ހިތްވަރަށް ސާބަސް ދެއްވާ ކަމަށެވެ. އަދި ހައްޔަރުކޮށް ޖަލަށްލާނެ ކަމަށް ދައްކާ ބިރަކަށް ދިވެހި ރައްޔިތުން މިހާރު ފަހަތަށް ނުޖެހޭނެ ކަމަށާއި، ސިޔާސީ މަޤްޞަދުތަކެއްގައި 10 މީހަކު ޖަލަށްލުމަކީ އަނިޔާވެރިކަމާ ދެކޮޅަށް ރައްޔިތުން ކުރާ މަސައްކަތާއި އެމީހުންގެ އަޒުމް އިތުރަށް ވަރުގަދަވެގެންދާނެ ކަމެއް ކަމަށް އޭނާ ފާހަގަކުރެއްވިއެވެ.
ރޭ ހައްޔަރުކުރި މީހުންގެ ތެރޭގައި ހިމެނެނީ އަލީ ޖުމާން (ޑެތު)، މުނާޒު އަލީ، ޝުޖާއު އަފީފް، އަލީ މުޝައްފާއު، އާމިނަތު މުނާ، ޝައްމޫން ޖަލީލް (ލޫކަސް)، އަޙްމަދު ރަމީޒު (ބީންޓޭ)، އާމިނާ މަނިކެ، ޢަބްދުﷲ ޝަރީފް، އަދި އަޙްމަދު ޝަފީޤް އެވެ. މީގެ އިތުރުން ލީވާން އާއި ޝަހުޒާން ފަދަ ހައްޔަރުގައި ތިބި އެހެން ފަރާތްތަކުން ދައްކަމުންދާ ކެތްތެރިކަމާއި ސާބިތުކަން ބޭކާރުވެގެން ނުދާނެ ކަމުގެ ޔަގީންކަން ފައްޔާޒު ދެއްވައި، މިހާރުގެ ސަރުކާރަކީ ޚުދުމުޚުތާރު ސަރުކާރެއްގެ ގޮތުގައި ސިފަކުރެއްވިއެވެ.
އިދިކޮޅު ފަރާތްތަކުން ތުހުމަތުކުރާ ގޮތުގައި، މި ފަހަކަށް އައިސް ސިޔާސީ ހަރަކާތްތަކުގައި ބައިވެރިވާ ފަރާތްތަކަށް އަމާޒުކޮށް ފުލުހުން ދަނީ ހަރުކަށި ފިޔަވަޅުތަކެއް އަޅަމުންނެވެ. ނަމަވެސް ފުލުހުން މީޑިއާތަކަށް މައުލޫމާތު ދެއްވި ގޮތުގައި ބާރުގެ ބޭނުންކުރަނީ ފުލުމުންގެ އަމުރަށް ނުކިޔަމަންތެރިވުމުގެ ސަބަބުންނެވެ. ރޭ މާލޭގައި ކުރިއަށްދިޔަ އެއްވުމުގެ ތެރެއިން ހިނގި ހަމަ ނުޖެހުމެއްގައި ފުލުހެއްގެ ލޯމަތި ފަޅައިގެން ގޮސް އަނިޔާވެފައިވާ ކަމަށާއި، ނަމަވެސް ފަރުވާ ދިނުމަށްފަހު އެ ފުލުސް މީހާ މިހާރު ދޫކޮށްލާފައިވާ ކަމަށް ފުލުހުން ބުނެފައިވެއެވެ.
ފައްޔާޒުގެ މި ގޮވާލުމާއެކު، އިދިކޮޅު އެހެން ލީޑަރުންވެސް ދަނީ ހައްޔަރުކުރި މީހުން މިނިވަންކުރުމަށާއި، ޚިޔާލުފާޅުކުރުމުގެ މިނިވަންކަމަށް ހުރަސްނޭޅުމަށް ސަރުކާރަށް ގޮވާލަމުންނެވެ. މި ހައްޔަރުތަކާ ގުޅިގެން ސިޔާސީ މަޝްރަހު ވަނީ އިތުރަށް ހޫނުވެފައެވެ. އެމްޑީޕީން ސިފަކުރާ ގޮތުގައި ސަރުކާރުގެ މި އަމަލުތަކަކީ ޑިމޮކްރަސީގެ އުސޫލުތަކާ ކަނޑައެޅިގެން ޚިލާފު ކަންތައްތަކެކެވެ.
