ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގައި ނިންމަންޖެހޭ މުހިންމު މަސައްކަތްތަކެއް ހުރުމުން، ދައުރުގެ މުއްދަތު މި މަހުގެ 31 ވަނަ ދުވަހުގެ ނިޔަލަށް އިތުރުކުރުމަށް މަޖިލީހުން މިއަދު ފާސްކޮށްފިއެވެ.
މަޖިލީހުގެ މިއަހަރުގެ ފުރަތަމަ ދައުރުގެ މުއްދަތު އިތުރުކުރުމަށް ރިޔާސަތުން ހުށަހެޅުއްވީ، މި ދައުރުގައި ނިންމަންޖެހޭ މުހިންމު މަސައްކަތްތަކެއް ހުރުމުން އެ މަސައްކަތްތައް ނިންމުމަށް ކަމަށް މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވިއެވެ.
މި ހުށަހެޅުމަށް މަޖިލީހުގައި މިއަދު ނެގި ވޯޓުގައި ބައިވެރިވެވަޑައިގެންނެވި 69 މެންބަރުންގެ ތެރެއިން 58 މެންބަރުން ވަނީ ދައުރު އިތުރުކުރަން ފެންނަކަމަށް ވޯޓުދެއްވާފައެވެ. ދައުރު ދަންމާލުމާ ދެކޮޅަށް ވޯޓުދެއްވީ 11 މެންބަރުންނެވެ.
މަޖިލީހުގެ ގަވާއިދު ބުނާގޮތުން، އަހަރެއްގެ ފުރަތަމަ ދައުރު ކުރިއަށްދާނީ ފެބްރުއަރީ މަހުގެ އެއްވަނަ ދުވަހުން ފެށިގެން މެއި މަހުގެ 15 ވަނަ ދުވަހުގެ ނިޔަލަށެވެ. ނަމަވެސް، ދައުރު ހަމަވާއިރު މަޖިލީހަށް ހުށަހަޅާފައިވާ މުހިންމު މަސައްކަތްތައް ނުނިމި ހުރެއްޖެނަމަ، މަޖިލީހުގެ ނިންމުމަކުން ދައުރުގެ މުއްދަތު އިތުރުކުރެވެއެވެ.
މި ދައުރުގެ މުއްދަތު އިތުރުކުރަން ނިންމިއިރު، މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް މަގާމުން ވަކިކުރުމުގެ ގަރާރެއް މަޖިލީހަށް ހުށަހަޅާފައިވާކަން ފާހަގަކުރެވެއެވެ. މިއަދުގެ ޖަލްސާގައި މަޖިލީހުގެ ޖުމްލަ 93 މެންބަރުންގެ ތެރެއިން ހާޒިރުވެވަޑައިގެން ތިއްބެވީ 72 މެންބަރުންނެވެ.
