ވ. އަތޮޅު އަލިމަތާ ކައިރިން ފުން ސަރަހައްދަކަށް ފީނަން ގޮސް އުޅުނު އިޓަލީގެ ފަސް މީހަކު މަރުވި ހިތާމަވެރި ހާދިސާއާ ގުޅިގެން، ރާއްޖެ އާއި އިޓަލީގެ ކަމާބެހޭ އިދާރާތަކުން ފުޅާ ދާއިރާއެއްގައި ތަހުގީގުތައް ފަށައިފިއެވެ.
މިދިޔަ ބުރާސްފަތި ދުވަހު ހިނގި މި ހާދިސާގައި، އަލިމަތާ ކައިރީގައި އޮންނަ ފުން ހޮހޮޅައަކަށް ފީނަން އުޅުނު އިޓަލީގެ ފަސް ޑައިވަރަކު ވަނީ މަރުވެފައެވެ.
މި ހާދިސާގައި މަރުވި މީހުން ހޯދުމަށް ދިވެހި ސިފައިންނާއި ފުލުހުން ވަނީ ބޮޑު އޮޕަރޭޝަނެއް ހިންގާފައެވެ. މި މަސައްކަތުގައި އެހީތެރިވުމަށް ’ޑޭން ޔޫރަޕް‘ ޖަމިއްޔާއަށް ނިސްބަތްވާ ފިންލެންޑުގެ ތިން ތަޖުރިބާކާރަކު އާދިއްތަ ދުވަހު ރާއްޖެ އައިސް، ހޯމަ ދުވަހު ވަނީ ބާކީ ތިބި މީހުން ތިބި ތަން ދެނެގަނެފައެވެ. އިއްޔެ ވަނީ އެ ހޮހަޅައިގެ ތިންވަނަ ޗެމްބަރުގެ ތެރެއިން، ގާތްގަނޑަކަށް 200 ފޫޓު އަޑިން ދެ މީހެއްގެ ހަށިގަނޑު ނަގާފައެވެ. އަދި ބާކީ ތިބި ދެ މީހުންގެ ހަށިގަނޑު ނެގުމުގެ މަސައްކަތް މިއަދު ކުރިއަށްދާނެ ކަމަށް މައުލޫމާތު ލިބެއެވެ.
އިޓަލީގެ ’އަންސާ‘ ނޫހުން ރިޕޯޓުކޮށްފައިވާ ގޮތުގައި، އެ ގައުމުގެ ޕްރޮސިކިއުޓަރުން މިހާރު ވަނީ އިހުމާލުން މީހަކު މަރުވުމުގެ މައްސަލައެއްގެ ގޮތުގައި މި ހާދިސާ ތަހުގީގު ކުރަން ފަށާފައެވެ. މި ތަހުގީގުގެ ތެރެއިން، މަރުވި މީހުންގެ ހަށިގަނޑުތައް އިޓަލީއަށް ގެންގޮސް އޮޓޮޕްސީ ހެދުމުގެ އިތުރުން، އެ މީހުން ދަތުރުކުރި ’ޑިއުކް އޮފް ޔޯކް‘ ސަފާރީގެ މީހުންނާ ސުވާލުކުރުމަށް ވަނީ ހަމަޖެހިފައެވެ.
ދިވެހި ސަރުކާރުގެ ތަރުޖަމާނު މުހައްމަދު ހުސައިން ޝަރީފް ’އޭޕީ‘ ނޫސް އެޖެންސީއަށް ވިދާޅުވީ، ”ދިވެހި ސަރުކާރުން ބަލަމުން އަންނަނީ މި ދަތުރު އިންތިޒާމު ކުރި ފަރާތްތަކުން އަޅަންޖެހޭ ރައްކާތެރިކަމުގެ ފިޔަވަޅުތައް އެޅިތޯ އާއި ކުރަންޖެހޭ ރޭވުންތައް ފުރިހަމައަށް ކޮށްފައިވޭތޯ“ ކަމަށެވެ.
މި ޑައިވިން ޓީމަކީ ޔުނިވަރސިޓީ އޮފް ޖެނޯއާގެ ޕްރޮފެސަރެއް ކަމަށްވާ މޮނިކާ މޮންޓެފަލްކޯން އިސްވެ ހުރެ ކުރިއަށްގެންދިޔަ ޓީމެކެވެ. މި ހާދިސާގައި މަރުވެފައިވަނީ މޮނިކާ މޮންޓެފަލްކޯން (51އ)، އޭނާގެ ދަރިފުޅު ޖޯޖިއާ ސޮމާކަލް (20އ)، ޔުނިވަސިޓީގެ ދިރާސާވެރިން ކަމަށްވާ މިއުރިއަލް އޮޑެނީނޯ (31އ) އާއި ފެޑެރިކޯ ގުއަލްޓިއޭރީ (31އ) ގެ އިތުރުން ޑައިވިން އިންސްޓްރަކްޓަރު ގިއަންލޫކާ ބެނެޑެޓީ (41އ) އެވެ.
އޮފިޝަލުން ސިފަކުރައްވާ ގޮތުގައި، މި ދަތުރަކީ އިންތިހާއަށް ފުން، އޮއިގަދަ އަދި ހޮހަޅައިގެ ތެރޭގައި ފެންނަ މިންވަރު ސުމަކަށް ތިރިވެފައި އޮތުމުގެ ސަބަބުން ނުރައްކާތެރި ދަތުރެކެވެ. މި ހާދިސާގެ ތެރެއިން އިތުރު ހިތާމައެއް ކުރިމަތިވީ، ގެއްލުނު ޑައިވަރުން ހޯދުމުގެ މަސައްކަތް ކުރަމުން ދަނިކޮށް، އެމްއެންޑީއެފްގެ އެންމެ ތަޖުރިބާކާރު އެއް ޑައިވަރު ކަމަށްވާ ސްޓާފް ސާޖަންޓް މުހައްމަދު މަހުދީ ވެސް މަރުވުމާ ގުޅިގެންނެވެ.
