ސްކޭމްތަކާއި މާލީ ކުށްތަކާ ދެކޮޅަށް ބައިނަލްއަގުވާމީ ފެންވަރުގައި ހިންގި ”އޮޕަރޭޝަން ފްރޮންޓިއާ ޕްލަސް“ ގެ ތިންވަނަ ބުރު ކާމިޔާބީއާއެކު ނިންމާލައި، އޭގެ ނަތީޖާތައް މިއަދު އާންމުކޮށްފިއެވެ.
މި އޮޕަރޭޝަނުގެ ނަތީޖާތައް ހާމަކުރުމަށް މިއަދު ހެނދުނު ކްރޮސްރޯޑްސްގައި ބޭއްވި ނޫސްވެރިންގެ ބައްދަލުވުމެއްގައި އިންސްޕެކްޓަ އޮފް ޕޮލިސް އާދަމް ނަވީދު ވިދާޅުވީ، މިދިޔަ މަހުގެ 10 އިން މި މަހުގެ 7 ވަނަ ދުވަހުގެ ނިޔަލަށް ކުރިއަށްގެންދިޔަ މި ހަރަކާތަކީ ސްކޭމްތައް ހުއްޓުވުމަށް ކުރާ މަސައްކަތަށް ލިބުނު ވަރަށް ބޮޑު ކުރިއެރުމެއް ކަމަށެވެ.
ރާއްޖޭގެ ތަފާސްހިސާބުތައް:
މި އޮޕަރޭޝަނުގެ ތެރެއިން ރާއްޖޭގައި އެކަނިވެސް ފާހަގަކޮށްލެވޭ މަސައްކަތްތަކެއް ވަނީ ކުރެވިފައެވެ. އެގޮތުން:
- ސްކޭމާ ގުޅޭ 349 މައްސަލައެއް ތަހުގީގުކުރިއެވެ.
- މި މައްސަލަތަކުގައި ޖުމްލަ 4.02 މިލިއަން ރުފިޔާ ގެއްލިފައިވާއިރު، އޭގެ ތެރެއިން 1.2 މިލިއަން ރުފިޔާ ވަނީ އަނބުރާ ހޯދިފައެވެ.
- ސްކޭމްތަކާ ގުޅުންހުރި 664 ބޭންކް އެކައުންޓެއް ރިޕޯޓްކުރިތާ 48 ގަޑިއިރު ތެރޭ ފްރީޒްކުރިއެވެ.
- ކޯޓު އަމުރުގެ ދަށުން 158 ބޭންކް އެކައުންޓެއް ފްރީޒްކޮށްފައިވެއެވެ.
- އެންމެ ގިނައިން ހިންގާފައިވަނީ އޮންލައިން ވިޔަފާރިއާ ގުޅޭ ސްކޭމްތައްކަން ފާހަގަކުރެވުނެވެ.
އިންސްޕެކްޓަރު ނަވީދު ވިދާޅުވީ، މި އޮޕަރޭޝަނުގެ މައިގަނޑު ބޭނުމަކީ ގައުމުތައް ގުޅިގެން ސްކޭމް ހިންގާ އެކައުންޓުތައް ހުއްޓުވުމާއި، ކުށްވެރިން ހޯދައި ސުވާލުކުރުމުގެ އިތުރުން އިންޓެލިޖެންސް މައުލޫމާތު ވަގުތުން ބަދަލުކުރުން ކަމަށެވެ. މި އަހަރުގެ އޮޕަރޭޝަނުގައި 10 ގައުމަކުން އަމަލީ ގޮތުން ހަރަކާތްތެރިވިއިރު، އެހެން ގައުމުތަކުން ވަނީ މައުލޫމާތު ފޯރުކޮށްދީފައެވެ.
”އޮޕަރޭޝަން ފްރޮންޓިއާ ޕްލަސް“ އަކީ ޖުމްލަ 14 ގައުމެއްގެ އެންޓި-ސްކޭމް ސެންޓަރުތައް ގުޅިގެން އުފައްދާފައިވާ އެލަޔަންސެކެވެ. މީގެ ތެރޭގައި ރާއްޖޭގެ އިތުރުން އޮސްޓްރޭލިއާ، ސިންގަޕޫރު، މެލޭޝިއާ، ޔޫއޭއީ، ކެނެޑާ އަދި ތައިލޭންޑް ފަދަ ގައުމުތައް ހިމެނެއެވެ.
މި އޮޕަރޭޝަން މައިގަނޑު ގޮތެއްގައި އަމާޒުކޮށްފައިވަނީ އިންވެސްޓްމަންޓް ސްކޭމް، ރޮމޭންސް ސްކޭމް، އީ-ކޮމާސް އަދި ވަޒީފާގެ ނަމުގައި ހިންގާ ސްކޭމްތަކަށެވެ. ފުލުހުން ބުނި ގޮތުގައި، މިފަދަ ބައިނަލްއަގުވާމީ ގުޅުންތަކުގެ ސަބަބުން ބޯޑަރު ހުރަސްކޮށް ހިންގާ މާލީ ކުށްތައް ހުއްޓުވުމަށް ފަސޭހަވެ، ރާއްޖެއިން ބޭރަށްދާ ފައިސާ އަނބުރާ ހޯދުމުގެ ފުރުސަތު ބޮޑުވެގެންދެއެވެ.
