މިއަހަރުގެ އަޟްހާ ޢީދު ނަމާދު މާލެ ސަރަހައްދުގެ 25 މިސްކިތެއްގަޔާއި ހަތަރު ސަރަހައްދެއްގައި ބޮޑު ޖަމާޢަތުގައި ކުރުމަށް އިސްލާމީ ކަންތައްތަކާބެހޭ ވުޒާރާއިން ވަނީ ނިންމައިފައެވެ
މިނިސްޓްރީން ހާމަކޮށްފައިވާ ގޮތުގައި މާލެ، ވިލިމާލެ އަދި ހުޅުމާލޭގައި ބޮޑު ޖަމާޢަތުގައި ޢީދު ނަމާދު ކުރުމުގެ އިންތިޒާމުތައް މިހާރު ވަނީ ފުރިހަމައަށް ހަމަޖައްސައިފައެވެ.
މިއަހަރުގެ އަޟްހާ ޢީދު ނަމާދު ފެށުމަށް ހަމަޖެހިފައިވަނީ ހެނދުނު 7:00 ގައެވެ. މިއީ ކުރިން 7:30 ގައި ކުރަމުން އައި ނަމާދު ވަގުތު، އަވަސްކުރުމަށް ފަހުން ނިންމާފައިވާ ގަޑިއެވެ. މި ބަދަލާއެކު ޢީދު ނަމާދުގެ ޖަމާޢަތްތައް މާލެ ސަރަހައްދުގައި އެއް ވަގުތެއްގައި ފެށިގެންދާނެއެވެ.
ބޮޑު ޖަމާޢަތުގައި ޢީދު ނަމާދުކުރުމަށް ހަމަޖެހިފައިވާ ހަތަރު މައިދާނަކީ މާލޭގެ މާފަންނު ސްޓޭޑިއަމާއި، ވިލިމާލެ ފުޓުބޯޅަ ދަނޑާއި، ހުޅުމާލޭގެ ފުރަތަމަ ފިޔަވަހީގެ ސިންތެޓިކް ޓްރެކްގެ އިތުރުން ހުޅުމާލެ ދެވަނަ ފިޔަވަހީގެ ހުސްބިމެކެވެ. ހުޅުމާލެ ދެވަނަ ފިޔަވަހީގައި ޢީދު ނަމާދުކުރާނީ މަސްޖިދުލް ޙަސަން އާދަމާއި، ނިރޮޅުމަގާއި ހީނާމާ ހިނގުމާއި ފޭރުގަސް މަގާއި، ދުބުރި ގަސްމަގާ އިންވެގެން އޮންނަ ހުސްބިމުގައެވެ.
މައިދާންތަކުގެ އިތުރުން މާލެ ސަރަހައްދުގެ 25 މިސްކިތެއްގައި ވެސް ޢީދު ނަމާދު ކުރުން ކުރިއަށްދާނެ ކަމަށް އިސްލާމީ ކަންތައްތަކާބެހޭ ވުޒާރާއިން މަޢުލޫމާތު ދެއެވެ. ވުޒާރާއިން ވަނީ ޢީދު ނަމާދު ކުރާނެ މިސްކިތްތަކުގެ ތަފްޞީލީ ލިސްޓެއް ވެސް މިހާރު ޢާންމުކޮށްފައެވެ.
ކޮންމެ އަހަރަކު ވެސް ޢީދު ނަމާދުގެ ބޮޑު ޖަމާޢަތް ބާއްވާ ހުރިހާ މައިދާންތަކާއި މިސްކިތްތަކުގައި އަންހެނުންނަށް ނަމާދު ކުރެވޭނެ އިންތިޒާމުތައް ހަމަޖައްސާފައިވާނެ ކަމަށް ވުޒާރާއިން ފާހަގަކުރެއެވެ. މިއީ ވީހާވެސް ގިނަ ބަޔަކަށް ޢީދު ނަމާދުގެ ޖަމާޢަތުގައި ބައިވެރިވުމުގެ ފުރުޞަތު ދިނުމަށް ކުރެވޭ މަސައްކަތެކެވެ.
އިސްލާމީ ކަންތައްތަކާބެހޭ ވުޒާރާއިން އިތުރަށް ވިދާޅުވީ، މޫސުން ތަން ނުދިނުމުގެ ސަބަބުން މައިދާންތަކުގައި ބާއްވާ ބޮޑު ޖަމާޢަތް ކެންސަލް ކުރަން ޖެހިއްޖެ ހާލަތެއްގައި، ހުކުރު ކުރާ ހުރިހާ މިސްކިތެއްގައި ޢީދު ނަމާދު ކުރާނެ ކަމަށެވެ. އެހެންކަމުން މޫސުމަށް އަންނަ ބަދަލުތަކަށް ސަމާލުވުމަށް ވެސް ވުޒާރާއިން ވަނީ އިލްތިމާސްކޮށްފައެވެ.
